¹ Yesu ta ndai cigha latsǝghǝn te yeriko. ² Swaaɗ she murwon ghǝncin sǝmwos tu zakka. Cinǝ munvar ghǝ kaɓkǝn zhakka, cinǝ murghǝ tughǝn beɗ. ³ A ta ya fi tǝ yel ko nuughǝn nǝ Yesuo, duryi tu a luu hŋ. ⁴ She a ta kir ndai ken tlǝn tai gha dǝllǝ gwaas won tu tǝ yeltǝ, duryo tu Yesu wo kǝǝn te tǝpi gyes. ⁵ Ɗaŋ Yesu ta tuliɗi ɗa lǝɓi, a ta yaal gaami wultu, ''Zakka, shiiɗi motl motl duryo tu yawon ciɓ ma mbuɗ ɗaghǝ dǝn .'' ⁶ She a ta vaatǝ shiiɗi yatl kaɓtǝ tǝ polghǝn. ⁷ Ɗaŋ konu ta yel gin, she ɓuruk tǝ kwaan mǝri vii, tǝ yi wultu, ''A tlǝni sǝmmbǝr gha muryo ɗaŋ nǝ murghǝ kuskǝngǝtn. ⁸ Zakka dlǝǝr wul Daadǝn tu, ''yel, Daadǝn, ma vǝr gya naakui kummbai ghǝ tughǝnetn, ghǝn yan hal ma mwaaɓ gon nǝ ngǝtnwon, ma sular tǝ mǝn dǝni wuɓsǝ.'' ⁹ Yesu wul tǝ tu, ''yawon kaɓkǝn a man a dǝnǝn, duryo tu yan beɗ cinǝ ŋaaghǝ Ibrahim ɗaŋ. ¹⁰ Duryo tu ŋaa zaar man tǝ ŋaal tǝ ndǝr tǝ vum ni zarsǝ mǝn maalghǝ.'' ¹¹ Ɗaŋ tǝ wum ngǝrshi gya gin, a ci ken tǝ wulghǝn vi ǝnnda fuushi yervi, duryo tua ta naa mel tǝ Urshelima, she tǝ ta mbiigha raa tu guŋndu Cogn wo fi mbwaaɗi swaaɗ. ¹² She a wultu, ''Murghǝ guŋndu won ɗa ɗaŋ a tlii a yatlwon ɗongai tu tǝ kaɓ guŋndu gamashi mǝnɗi ghǝnnda tǝ sutǝɗi. ¹³ A cim monsǝwos ɗi dzuɓ she wulshi tu, 'suntaas ghai ǝnnda mǝ sumɗi.' ¹⁴ Beɗ tǝ gi zarsǝwos tǝ ta nyaŋngas tǝ she tǝ ta shin mǝn shinngǝn a kaarwos tu 'ɓak ma suu mǝ ga muri gin tǝ fi guŋndu a dulgamawopm hŋ.' ¹⁵ She a ta man a kiliyo ɗaŋ a sutǝ ɗi kaar saɗɗa, ɗaŋ a ta tu guŋdeshi, she a ta caa tǝ cim gya monsǝi ɗaŋ a ta vǝrshi wurɓai, duryo tu tǝ yisǝŋ duul yo ɗaŋ tǝ tughai a sughǝn taashes. ¹⁶ Kǝ keni a ta man ɓastǝ, wultu, 'Daadǝn, pam wa a lǝǝr pam dzuɓɗi ɗa duuli.' ¹⁷ Murghǝ guŋndes wultǝ tu. 'she kyan vaan, monngǝ mbuuni. Duryo tu kǝ fi zaar a ngǝtn ŋaa njwaatii, ka naa tǝ vartǝ a dǝllǝŋsǝ yatl dzuɓ. ¹⁸ Kǝ mbǝtlǝmi ta man , caa wultu, 'pam wa Daadǝn a lǝǝr pam nandamɗi ɗa dulli.' ¹⁹ Murghǝ guŋndes wultu, 'mbii vartǝ kǝ dǝllǝŋsǝ yatl nanndam.' ²⁰ Gon beɗ a man, wultu, 'Daadǝn, pam wa ghǝni, ɗaŋ mǝ gaa tǝ ndaara a giɓkǝ pǝri, ²¹ Dur tu mǝ ci vǝrtǝ wa, duryo tu kinǝ zaarwon ɗakvɗak. kya mbii ngǝtn yo ɗaŋvkyani ǝŋ kǝ ga hŋ, kya tlaa ngǝtn yo ɗaŋ kyani ghǝn kǝ kǝɓ hŋ.' ²² Murghǝ guŋndes wultǝ tu, 'Tǝ ngǝtnsǝ wa ghǝn ma ngyerghǝ vi mǝn, kyan kuskǝ mon. kaa yisǝŋǝi tu minǝ zaar ɗak ɗak, mya mbii ngǝtn yo ɗaŋ myani ghǝn mǝ gaa hŋ, mǝ ndǝr mǝ tlaa ngǝtn yo ɗaŋ mǝ kǝɓ hŋ. ²³ Ta niighǝn a caa kǝ tlǝn gǝm wurɓe tǝn giɓ fugn wurɓa gaaghǝn hŋe, duryo tu ɗa kaari ghǝn mya sumɗi mǝ nan kaɓ tǝ duli hŋe?' ²⁴ Murghǝ guŋndes a wul gya gyo ɗaŋ cigha dlǝrghǝn ɗa ɗan, ' kaɓɓǝn pammeshi ɗaŋ yi ɓastii, a vǝrǝn murghǝ pam dzuɓii. ²⁵ Tǝǝ wultǝ tu, 'Daadǝn, citǝ pam dzuɓ.' ²⁶ Mya fuuki tu, ɓuruk gyo ɗaŋ yir ma daɗak tǝ mǝn ghai, beɗ tǝ givgyo ɗaŋ yir hŋ, ko gi ɗaŋ yiiri beɗ taa kaɓi ɓastǝ. ²⁷ Beɗ tǝ gi gya mǝn nyaŋngaskǝnnetn, gya gyo ɗaŋ caa suu mǝ fi guŋndu a dulgamawasǝŋ hŋǝi, lǝǝrǝnshiɗi ɗuun a tlaashi washi a kenan.''' ²⁸ Ɗaŋ a kon ngǝrshi gya ginni, a ci ken tǝ tlǝghǝn Urshelima. ²⁹ Cigha cighǝi she a kiliyo ɗaŋ tǝ tuli mel tǝ Batafaji tǝ Batani, a dulghǝ wuurwon ɗaŋ caa cim tu Zaitun, a ta shin mǝǝri dǝnes mbǝtlǝŋ, ³⁰ Wul tu, ''Ndan giɓ yatl kǝ keni. Ǝŋ kyaa nda, ka tu ŋaa zhwaaki ɗan taayi taghai hŋ. Tǝrǝghǝntii a lǝǝrǝmtǝ mǝnɗi. ³¹ Ǝŋ gon ya ceɗki, ''nighǝn a ca kyaa tǝrǝŋte?' wulǝn tu, 'Daadǝn ǝŋ caa suu.''' ³² Gya gyo ɗaŋ tǝ shinshiwasǝi tǝ ta tlǝn tu ŋaa zhwaakes daɓak ɗaŋ gyo ɗaŋ Yesu fuushi. ³³ Ɗaŋ tǝ ta yigha tǝrǝŋngǝn ŋaa zhwaakes, she mǝn zhwaakee tǝ ta wulshi tu, ''Ni ca kyaa tǝrǝŋ ŋaa zhwaakesse?'' ³⁴ Tǝ ta wultu, ''Daadǝn ghǝn ca suuo.'' ³⁵ Tǝ ta tlǝǝr Yesu mǝn, tǝ ta tatl lǝŋsǝ wasǝŋ a dul ŋaa zhwaakes she tǝ mbii Yesu tǝ gaa ghai. ³⁶ Ɗaŋ cigha tlǝghǝn tǝ ta tatl lǝŋsǝ wasǝŋ a datǝpm. ³⁷ Ɗaŋ a naa mel tǝ lǝɓi ɗaŋ wuur Zaitun zoɓɗighayii, she ɓuruk gutǝli mǝridǝnnes a ta nguɓshi polghǝn cii luu Cogn tǝ yer tlyaa tylaa nǝ ɓuruk ngǝtn kosarghǝn yo ɗaŋ tǝ yelli, ³⁸ Cigha wulghǝn tu, ''murghǝ mbuuni ghǝn nǝ guŋ yo caa man a giɓkǝ sǝmngǝ Daadǝn! Raa wusni tǝ tsogn gaami, zhimngǝn tǝ naa tsogn von.'' ³⁹ Farisawa gya gon a giɓkǝ gutules tǝ wul tu, 'Malǝm dlwaa yer mǝri dǝnwan.'' ⁴⁰ Yesu suɗa a wultu, ''Mya fuuki, ǝŋ caa mwaali, gya puus tavnguɓ dlaarghǝn vii.'' ⁴² Ɗaŋ a naa mel tǝ dǝllǝ yatles, she a ngwaar nǝ durwos, ⁴¹ Yi wultu, ''kǝn hal yan kaayi yisǝŋ dzaŋǝnni ya wonǝn, ko kyaani beɗ, gya ngǝtn yo ɗaŋ caa lǝǝki raa wusni mǝnɗi! Beɗ tǝ gi ɗaŋngǝnin cinǝ waaɗkǝn a yirwan. ⁴³ Duryo tu dzaŋ wo man ki mǝn ɗaŋ gya mǝn nyaŋngaskǝn wan ta nal gwaghaɗ mek ɓaski, tǝ ngirǝŋ ki waanii, ta ndǝr ta ɗaaɗki mǝnɗi a ko le laŋshi gyo. ⁴⁴ Ta zaŋ zaŋ ki waani yatl kyaani tǝ mǝri wa. Ta gaa puus kǝ dǝnsǝ waan gon namboŋ a dul kamshi hŋ, duryo tu ɓak kǝ ga raa ghai a dǝǝl yobɗaŋ Cogn ta ya suu tǝ kaɓkiwani hŋ.'' ⁴⁵ Yesu ta ndai ɗa vinlades kǝnnda yi nyolar gya gyo ɗaŋ tǝ ta yigha ɗiɓarghǝn ngǝtn, ⁴⁶ Yi wulshi tu, ''yinǝ dlyaaɗkǝn, Dǝnnatn wo naa nǝ dǝn karaghǝn Cogn, beɗ tǝ gi kaa sulartii nǝ tuur mǝrǝŋsǝ.'' ⁴⁷ Ɗaŋ Yesu ta ya kuɓar shi ghai giɓ vin ladiko dzaŋgyo. Tsǝnwaari vari tǝ munvaraŋsǝ mǝn dlyaaɗkǝn waar tǝ mǝnvaraŋsǝ yatl tǝǝ ta ya suu tu tǝ ɗuuti, ⁴⁸ Beɗ tǝ gi tǝǝ ta tu mboi hŋ, duryo tu zarsǝ tǝǝ ta yi a sǝǝggǝn wos kǝǝm mbun mbun.