¹ Yesu ta wul mǝri dǝnwos tu, ''Ngǝtn yo ɗaŋ taca zarsǝ tǝ ndaɗi ta mbwaaɗi shaŋtaŋ, beɗ tǝ gi, wo giir dashi ɗaŋ wo na nǝ tǝpm maalghǝn wasǝŋ. ² Ɗaŋ gon tǝ ca gon a mǝri mǝrin tǝ fi kuskǝ ngǝtn, wo moɓ ndaraghǝn tǝ naɗtǝ dǝllǝ lamɗǝ mǝn a yerwos tǝ kurtii giɓ gǝrǝŋ zha. ³ Ɗaghǝnɗa nǝ gama wan ǝŋ yessa ya fighǝ kuskǝ ngǝtn mǝn, dlwaa tǝ yet, ǝŋ ya wulghǝ tu a ndaaɗi, dlaa loŋseshi. ⁴ Ko ya fighǝ kuskǝ ngǝtn mǝn tǝpm wattsǝmai ɗaŋ a polghǝ ghai hŋ a dzaŋ namboŋyi, hal yaan ca wul tu, ''Ma ndaaɗi, dlaam loŋshi mǝni, she a dlaa loŋsheshi. ⁵ Mǝn laa Cokes tǝ wul Daadǝn tu, ''Daɗak mii caaghǝn raawopm ngai.'' ⁶ She Yesu ta wul tu, ''yan kǝ yir caaghǝn raa ɗaŋ a tuli ko ŋannjwatn ɗaŋ tsǝr mastaɗ, ka wul dǝllǝ gwasǝn tu, ga lǝbǝnni a tlǝn dluur gamai dlǝk rupm, cik kǝn wo laaɓ ngǝtn yo ɗaŋ kǝ kon tu tǝ fi. ⁷ Ɗaŋngǝni, nǝ nu a giɓi wan yan yir mon ɗaŋ ca fitǝ laa mǝn ɗaŋ ya sutǝɗi a lǝǝɓ laa, wo wul tǝ tu, ''fi motlak a man tsǝtnni a ci ngǝtn cighǝnio? ⁸ A bamvi gi, ka wultǝ tu, ''tuurǝm ngǝtnngǝ cighǝn suutu mǝni, a lǝrǝm mǝnɗi mǝ ci, mǝ tlya, ɗa kaari annda a ci gwa hŋaa'? ⁹ Taa yi nyar mon mǝn duryo tu a fi laa woshi ɗa giiri ya? ¹⁰ Cik kǝn kyaani beɗ, yan kyaa fi ngǝtn yi kaɓ ɗaŋ caa wulki tu a fi, she a wulǝn tu, ''Minǝ gom nǝ monsǝ. Myanni gopm migha fighǝn laa yo ɗaŋ yigha dul gama wopm mǝǝ fi.'' ¹¹ Ɗaŋ Yesu ngaɓ tǝpm tlǝghǝn Urshelima, She a ta mbi a vi teghǝ Samariya tǝ galilii. ¹² Ca na nda a ŋaa yatl won, she ndomtsǝ dzuɓ tǝ dlǝǝrɗi ŋaɗonngai tǝ yan, ¹³ tǝǝ wul tlya tlya tu, ''Yesu, Daadǝn, yel gwanndǝ wopm.'' ¹⁴ Ɗaŋ Yesu yelshi, she a wulshi tu, ''Tlǝn a giɗ gamawan a gya pǝris.'' Cigha tǝpm tlǝghǝn kǝnndi, she ndomtsǝ ta ɓanni. ¹⁵ Ɗaŋ namboŋ wasǝŋ a yel a fuuɗi, she a tabsutǝ a Yesu, yi luu Cognvon tlya tlya. ¹⁶ A ta man zuɓni a keb Yesu nyar tǝ mǝn. Mures ta yi nǝ mǝn Samariya. ¹⁷ Yesu wul tu, tu ɓaa, nǝ zarsǝ dzuɓ kǝn mǝ fuɗshi hŋaan? ¹⁸ Toknanndames ci ɗo? Ni ǝn a ca she sǝmmbǝrǝn teŋraŋ annda a sutǝɗi tǝ nyar Cognvon mǝnne? ¹⁹ Yesu wul tǝ tu, ''Shishi a tlii ngǝtnwa, caaghǝn raa wa a fuɗkǝi.'' ²⁰ Dzaŋ gon Farisawa tǝ ta ceɗ Yesu nǝ kili yo ɗaŋ wo nda guŋndǝ Cognvon wo man ngai, she a ta wulshi tu, Ai manngǝnɗi guŋndǝ Cognvon caa yi yeli tǝ yir hŋ. ²¹ Gon wo kǝǝm wul tu, ''Ai yaghǝni ko yaghǝnɗi hŋ, duryo tu guŋndǝ Cognvon yi ɓaski.'' ²² Yesu ta man wul mǝri dǝnwos tu, ''Dzaŋ a manngǝnɗi ɗaŋ suu a yek dzaŋ namboŋ a giɓkǝ dzaŋngǝ ŋaa zaar, beɗ tǝ gi ka tu ka yel hŋ. ²³ Zarsǝ ta wulki tu, 'yaalǝn ɗan, ko yaalǝn ɗuun!' beɗ tǝ gi bak kaɓ tu kyaa tlǝ tu a yeli hŋ. ²⁴ Kili yo ɗaŋ ŋaa ghǝ zaar wo man sutǝɗi ɗa, wo man ɗaŋ falaŋ ɗaŋ ca tlaɗi gaami yaal ko lǝǝɓi gyoi ɓuruk. ²⁵ Beɗ tǝ gi she ŋaa zaar ya buŋ monnda gham, hal zarsǝ a kili gi tǝǝ ta ndǝr tǝ nyaŋngastǝ. ²⁶ Ɗaŋ gi ɗaŋ a ta yi a jinndi Nuhui, cik kǝn wo na a kili yo ɗaŋ ŋaa zaar wo sutǝɗi. ²⁷ Zarsǝ cigha cighǝn tǝ tlyaaghǝn, mǝn monci cigha kaɓkǝn guɗi, guɗi cigha kaɓkǝn tuur, hal dzaŋngi ɗaŋ Nuhu ta ndai giɓ zhirgi zha, von ta tufana ta man dlǝmpshi washi kaɓ. ²⁸ Cik kǝn a ta yi a kili Loɗ, ko nu ta yi a cighǝn tǝ tlyaghǝn, cigha ɗiɓkǝn tǝ ɗiiɓarghǝn, cigha giighǝn kitn, cigha nalghǝn dǝnsǝ. ²⁹ She dzaŋngi ɗaŋ Loɗ ta nyol ga Sodomi von wuɗ tǝ gǝzǝrnyi ta shiiɗi gaami, a ta tlaashi washi ɗeɓaɗ. ³⁰ Cik kǝn wo man na dzaŋngi ɗaŋ ŋaa zaar wo mbwaaɗi. Dzaŋngi gon ɗaŋ ci dul gamvin, tǝ buŋ a ndaghǝn giɓ vin tu tǝ nyom woshi hŋ. ³¹ Cik kǝn muryo ɗaŋ cigha kitn giighǝn, tǝ sutǝ dǝn hŋ beɗ. ³² Ɓitalǝn gǝɗi Loɗ. ³³ Ɓuruk gon ɗaŋ ya suu raai wos naŋ, wo nati, gon ɗaŋ ya vǝr raai woshi, wo tutii. ³⁴ Mya fuki, a kaari gi ɗaŋ ta fi ngǝrshes, zarsǝ mbǝtlǝm cigha mbuɗkǝn a lǝǝɓ mbuɗ, ta mbi namboŋǝi ta ga namboŋ ɗa ɗan. ³⁵ Guɗi mbǝtlǝm cigha nyighǝn nyoptǝ a vun, beɗ wasǝŋ, ta mbi namboŋǝi tǝ ga namboŋ ɗa ɗan.'' ³⁶ ''Mǝn monci won mbǝtlǝm ta bwaa goni ta ga kamshi ɗa ɗa'' ³⁷ She mǝri dǝnes tǝ ta ceɗ tǝ tu, ''Teɗo Daadǝn? A ta wulshi tu, ''lǝǝɓ yo ɗaŋ ngǝtn mǝskai, ɗan ǝŋ koɗaksǝ ta jwaamshi ghai.