1
۱۔یسوع نگاہ کیِتی تاں ڈِٹھا جو امیر بندے ہیکل دے خزانے وِچ اپنے ہدیے پیندے پیئے ہِن۔
2
۲۔اوُں ہِک بیوہ (رَنڈڑ) کوُں وی ڈؤ سِکے پیندیاں ڈِٹھا۔
3
۳۔تے اوُں آکھیا، میں تہاکوُں سچ آدھا ہاں جو ایں غریب رنڈڑ (بیوہ) ڈوجھیاں کَنوں زیادہ پاتے۔
4
۴۔اُنہاں ساریاں اپنے چنگے چوکھَے مال وِچوں پاتے، لیکن اوُں رنڈڑ (بیوہ) اپنی غربت دے باوجود اپنا سب کجھ ڈے ڈِتے جیندے تے اوُں گزارہ کرنا ہا۔
5
۵۔کجھ لوکاں ایہہ آکھیا جو خدا دا گھر نزر کیتی گیئاں شیئاں دی وجہ کَنے بہوں اعلیٰ پتھریں نال سجیا ہویا اِے، اوُں آکھیا۔
6
۶۔جیہڑیاں شئیں تُساں ڈھیڈے ہیوے، او ڈینہ آسن جو اِنہاں وِچوّں پتھر اُتّے پتھر وی باقی نہ راہَسی، جیہڑا ڈھٹا نہ ہوسی۔
7
۷۔اُنہاں پچھیا ''استاد ایہہ واقعہ کڈن تِھسی؟ تےِ ایں وقوعے دے کیا نشان ہوسن؟''
8
۸۔یسوع جواب ڈِتا، خبردار دھوکا نہ کھوائے، میڈا ناں گِھن کے بہوں سارے آؤسن تے آکھسن جو میں اُوہو ہاں کیوں جو ویلہ بہوں تھوڑا ہے اُنہاں دے پِچھوُں نہ ونجائے۔
9
۹۔جئیں ویلے تُساں جنگاں تے لڑائیاں دیاں افوائیں سُن سو، تے گھبرا نہ ونجائے، ایں گالہیں دا ہوؤنا ضروری ہِے۔ لیکن اوُں ویلے اخیر نہ تھیسی۔
10
۱۰۔وَل اوُں اُنہاں کوُں آکھیا۔ قوم تے قوم ، اَتے حکومت تے حکومت چڑھائی کریسی۔
11
۱۱۔وَلا زمین تے وڈے وڈے زلزلے آوسَن، کال اِی پوسَن، آفتاں نازِل تھیسن، اَتے وڈے عجیب تے حیران کرڈیون آلے واقعے آسمان تے ظاہر تھیسن۔
12
۱۲۔لیکن اِیں ساریاں گالہیں دے تھیون توں پہلے، اُنہاں کوُں پکڑ گھِن سَن تے مارکٹائی ہوسی، تہاکوُں عبادت خانیاں تھوں بےدخل کریَسن تے قید وچ سٹ ڈیسن، میڈے ناں دی وجہ کنے تہاکوں بادشاہاں تے حاکماں دے اگوں حاضر کیتا ویسی۔
13
۱۳۔ایہہ تہاڈے کیتے گواہی ڈیون ڈا موقع ہوسی۔
14
۱۴۔ایں واسطے یاد رکھو جو تُساں فکر مند نہ تھی ونجائے جو اُنہاں کوُں کِیا جواب ڈیسوں۔
15
۱۵۔اِیندے کیتے میں تہاکوُں ایہو جئی زبان تے حکمت ڈیساں جو تہاڈے کہیں مخالفت کوُں وی تہاڈا ساہمنا کرن یا خلاف آکھن دی جرات نہ ہوسی۔
16
۱۶۔ایں تائیں جو تہاڈا ماں پیئو، بھین بھرا، رشتہ دار تے سنگتی تہاکوں دھوکا ڈیسَن، تے تہاڈے وچوں کیئاں کوُ پکڑویسن تے بعض کوُ موت دے حوالے کریسن۔
17
۱۷۔ہر کوئی میڈے ناں دی وجہ کَنے تہاڈے نال نفرت کریسی۔
18
۱۸۔لیکن تہاڈے سِردا ھِک وال وی فنا نہ تِھیسی۔
19
۱۹۔تساں اپنے ایمان نال اپنیاں زندگیاں بچا گِنسو۔
20
۲۰۔جئیں ویلے تُساں یروشیلم کوُں فوج نال گھیرا پاتا ہویا ڈیکھو تاں سمجھ ونجائے جو اُوندا اُجڑ ونجنا نیڑے ہِے۔
21
۲۱۔وَل جیہڑے یہودیہ وِچ ہوون اوہ پہاڑاں دو دھروک ونجن۔ تے جیہڑے یروشلیم وچ ہوون اوُں جاء تھوں نکل ونجن، اُتے جیہڑے وستیاں وِچ ہوون او شہر وِچ نہ وڑن
22
۲۲۔ایہہ وڈے مَہر دے ڈیں ہوسَن، ایں واسطے جیہڑیاں گالہیں لِکھیاں لاتِھیاں ہِن اوہ پوریاں تھی سن۔
23
۲۳۔افسوس اُنہاں تے جیہڑیاں اُنہاں ڈیہاں وِچ حاملہ ہوون تے اپنے بچیاں کوں کھیریلیندیاں ہوون! زمین اُتے بہوں وڈی مصیبت ہوسی تے لوکاں تے عذاب نازل تھیسی
24
۲۴۔لوک اُنہاں کوُں تلواراں نال مار ڈیسن تے قید وچ سَٹ ڈیسن، تے جے تائیں غیرقوماں دا ویلہ پورا نہ تھی ونجے یروشلیم غیرقوماں تھوں لتڑیندا راہسی۔
25
۲۵۔سِجھ، چندر تے تاریاں وچ نشان ظاہر تھی سن تے قوماں وڈی مصیبت وِچ ہوسن کیوں جو سمندر دے شور تے چھَلاں توں گا بھر ولیَسن۔
26
۲۶۔آسمانی طاقتاں ہلائیاں ولیَسن تے لوک خوفزدہ تھِی کے زمین اُتے آون آلیاں مصیبتاں دا راہ ڈیدھیاں ڈیدھیاں، لوکاں دی جان وچ جان نہ راہسی۔
27
۲۷۔وَل اوہ ابنِ آدم کوُں قوت تے جلال نال بدلاں اُتے آندا ڈیکھ سَن۔
28
۲۸۔لیکن جئیں ویلے ایہہ گالہیں تھینداں پیاں ہوون تے کھڑ تے سر اُتاں چوائے ، کیوں جو تہاڈا چھُٹکارا نیڑے آگِیا ہوسی۔
29
۲۹۔یسوع ولا اُنہاں کوں ہک مثال سنائی جو تُساں انجیر دے درخت تے ڈوجھیاں درختاں کوُں ڈیکھو۔
30
۳۰۔جَد اُتھاں تے پُمپبھلیاں ڈیدھے وِے تاں تہا کوُ پتہ لگ ویندے کہ گرمی آون آلی ہِے۔
31
۳۱۔تے ایویںِ جَد تُساں اِے شئیاں تھیندیاں ڈِیکھو، تاں جان گِھنو جو خدا دی بادشاہی نیڑے ہِے۔
32
۳۲۔میں تہاکوں سچ آدھا ہاں جو ایہہ نسل ختم نہ تھیسی، جے تاہئیں ایہہ سَاریاں گالہیں پوریاں نہ تھی ویسَن۔
33
۳۳۔آسمان تے زمین مٹ ویسن، پر میڈیاں گالہیں قائم راہسن۔
34
۳۴۔پر خبردار راہو جو ایویں نہ تھیوے کہ تہاڈے دل خمار تے نشہ بازی اَتے زندگی دیاں فکراں نال سُست تھی ونجن اوہ ڈینہ جیہڑا اچن چیت پھا ہی وانگ آویسی۔
35
۳۵۔کیوں جو ایہہ ساری زمین تے راہون آلے لوگاں تے ایویں آ پوسی۔
36
۳۶۔پر ہر ویلے تیار رَاہوو، دعا کرو کہ تساں بچ نِکلن کیتے مظبوط تھی ونجو، اُنہاں ساریاں گالہیں تُھوں جیہڑیاں تھیون آلیاں ہِن، تے ابنِ آدم دے سامنے کھڑسَگو۔
37
۳۷۔اوہ ہر روز ہیکل وچ تعلیم ڈیندا اَتے راتیں باہروں نِکل ویندا تے ساری رات اوہ پہاڑ تے گزریندا ہا جیہڑا زیتون دا پہاڑ اکھویندا ہا۔
38
۳۸۔سارے لوگ فجرے ای ہیکل وچ اُندیاں گالہیں سنن کیتے آندے ہَن۔