1
۱۔اوُں ویلے اوُں نے اُنہاں کو اِیں غرض تھوں کہ ہمیشہ دُعا کرو اَتے ہمت نہ ہارو تمثیل آکھی۔
2
۲۔کیئں شاہر اِچ ہک قاضی ہا۔ جیہڑا نہ تاں خدا تھوں ڈردا ہا اَتے نہ ای کیئں بندے دی پرواہ کریندا ہا۔
3
۳۔اوُں ای شاہر اِچ ہک بیوہ ہائی اَتے بار بار اوُندے کول آندی تے آدھی،"میڈے مخالف تھوں انصاف گھنن اِچ میڈی مدد کر۔"
4
۴۔بہوں عرصہ تایئں اوُں نے اوُندی مدد نہ کیتی پر کجھ دیر دے بعد اوُں نے اپنے آپ کوُ آکھیا۔"حالانکہ میں خدا تھوں نہیں ڈردا اَتے کیئں بندے دی پرواہ نیئں کریندا۔
5
۵۔ایں دے باوجود کہ ایہہ بیوہ میکوُ ستاندی ہے۔ انصاف دے بارے وِچ میں ایندی مدد کر یساں،تاکہ لگاتار آون دے باعث اوہ میکوُ تنگ نہ کرے۔
6
۶۔ پَر خداوند آکھیا سنو بے انصاف قاضی کیاآدھے ۔
7
۷۔ہن کیا خدا وی اپنے چُنے ہویاں کوُ جیہڑے ڈِیں رات اوندے اَگے روندے راہندے ہَن ؟ دیر نہ کریسی ؟
8
۸۔میں تہاکوُں آدھا ہاں کہ اوہ بہوں جلدی اُنہاں کوُ انصاف ڈیسی۔تاں وی جڈاں، اِبنِ آدم آ سیں تاں کیا اوہ زمین تے ایمان پا سی؟
9
۹۔وَل اوُں نے بعض لوگاں کوُ جیہڑے اپنے آپ اِچ راضی ہَن کہ اوہ نیک ہَن اَتے اوہ ڈوجھیاں لوگاں کولوں نفرت کریندے ہَن تمثیل آکھی۔
10
۱۰۔ڈو بندے ہیکل اِچ دُعا کرن کیتے گئے ہک فریسی ہا تے ڈوجھا چُنگی گھنن آلا ہا۔
11
۱۱۔فریسی کھڑا تھیا اَتے اپنے کیتے ایویں دُعا کیتی کہ خداوند میں تیڈا شُکر کریندا ہاں کہ میں ڈوجھیاں بندیاں دی طرح نیئں جیہڑے کہ چور،بے انصاف اَتے زِنا کرن آلے ہَن تے ناں ہی ایں چُنگی گھنن آلے دی طرح ہاں ۔
12
۱۲۔میں ہک ہفتے اِچ ڈو روزے رکھیندا ہاں جیہڑا کچھ میکو مِلدے اوہ ساریاں دی دہ یکی ڈیندا ہاں ۔
13
۱۳۔پَر چُنگی گھنن آلے نے جیہڑا کجھ پند تے کھڑا ہا اوُں نے اے وی چنگا نہ سمجھیا کہ اپنی اَکھاں اُتاں چاواں پَر اپنی چھاتی پٹدا ریہا تے آکھیا خدا میڈے جیئے گنہگار تے رحم کر۔
14
۱۴۔میں تہاکوُ آدھا ہاں کہ ایہہ بندہ ڈوجھے دے برعکس راستباز تھی کہ اپنے گھر لگا گیا۔کیونکہ ہر کوئی جیہڑا اپنے آپ کوُ وڈا کریندا ہے نِکا کیتا ویسی،پر ہر کوُئی جیہڑا اپنے آپ کوُ فروتن کریندا ہے وڈا کیتا ویسی۔
15
۱۵۔لوگ اپنے بالاں کوُ اوندے کول گھن آئے تاں جو اُنہاں تے ہتھ رکھے پَر جیہڑے ویلے شاگرداں نے ایہہ ڈِٹھا تاں اُنہاں نے اُنہاں کوُ جھڑکیا۔
16
۱۶۔لیکن یسوع نے اُنہاں کوُ سڈیا اَتے آکھیا۔"بالاں کوُ میڈے کول آون ڈیو اَتے اُنہاں کوُ منع نہ کرو کیوں جو آسمان دی بادشاہی اُنہاں دی ہے۔
17
۱۷۔میں تہاکوُ سچ آدھا ہاں کہ جیہڑا کوئی بالاں دی مانند خدا دی بادشاہی کوُ قبول نہ کریسی اوہ بقیناََ اوُندی بادشاہی وِچ داخل نہ تھیسی۔
18
۱۸۔ہک حاکم نے اوُں دے کولوَں پچھیا اَتے آکھیا، اے نیک استاد میں ابدی زندگی پاؤن کیتے کیا کراں؟
19
۱۹۔یسوع نے اوُں کوُ آکھیا ''میکوُ نیک کیوں آدھے ہو؟ خدا دے سِواکوُئی نیک نہیئں۔
20
۲۰۔تساں حکماں کوُ تاں جان دے ہو۔ زنا نہ کرنا، خون نہ کرنا، چوری نہ کرنا، کوُڑی گواہی نہ ڈیوناں، اپنے ماں پیئو دی عزت کرنا۔
21
۲۱۔حاکم نے آکھیا کہ میں اِنہاں ساریاں گالہیں تے نِکے تھیندیاں ہی عمل کیتا ہے۔
22
۲۲۔جیہڑے ویلے یسوع نے ایہہ سُنیا تاں اوُں کو آکھیا۔ تیڈے وچ ہک گالھ دی کمی ہالی وی ہے۔ ضرور ہے کہ اپنا سارا کجھ ویچ کے اَتے غریباں وچ ونڈ چھوڑ وَل تیکوُ آسمان تے خزانہ مِلسی اَتے آمیڈے پیچھوں ٹُرپو۔
23
۲۳۔پر جیہڑے ویلے امیر بندے نے ایہ گالہیں سُنیاں تاں اوُں کوُ بہوں ڈکھ تھیا کیوں جو اوہ بہوں امیر بندہ ہا۔
24
۲۴۔وَل یسوع نے اوُں کوُ ڈکھی ڈیکھ کے آکھیا۔ ''امیر بندے دا خدادی بادشاہی اِچ وڑنا بہوں مشکل ہے!۔
25
۲۵۔اُٹھ دا سوئی دے مورے وچوں نکل ونجنا امِیر بندے دا خدادی بادشاہی وچ وڑن کولوں آسان ہے۔
26
۲۶۔سنن آلیاں نے آکھیا۔ وَل کون نجات پاسگدے؟۔
27
۲۷۔یسوع نے جواب ڈِتا ''جیہڑا کم انسان کیتے ناممکن ہے اوہ خدا کرسگدے۔
28
۲۸۔پطرس نے آکھیا ''ڈیکھ اساں اپنا سارا کجھ چھوڑ کے تیڈے پیچھے ٹُرپئے ہاں۔
29
۲۹۔وَلا یسوع نے اُنہاں کو آکھیا میں تہاکوُ سچ آدھا ہاں کہ ایہو جیا کوئی وی نہیں جیئں خدا دی بادشاہی کیتے اپنے گھر یا ذال یا بھرواں یا ماں پیئو اَتے اپنے بالاں کوُ چھوڑ ڈِتا ہوئے۔
30
۳۰۔اَتے اوہ اِیں زمانے اچ بہوں زیادہ صلہ نہ پاوے اَتے آون آلے زمانے اَچ ہمیشہ دی زندگی۔
31
۳۱۔اوُں نے بارہ کوُ کٹھا کر کے انہاں کوُ آکھیا اساں یروشلیم ویندے پئے ہاں اتے اوہ ساریاں گالہیں جیہڑیاں نبیاں دی معرفت لکھیاں گئیاں ہَن ابنِ آدم دے بارے وچ پوریاں ہوسن۔
32
۳۲۔کیوں جو اوہ غیرقوماں دے حوالے کیتا ویسی اَتے ذلیل کیتا ویسی تے اوندے نال شرمناک سلوک کریسن۔ تے اوُندے تے تھوکسن۔
33
۳۳۔کوڑے مارن دے بعد اوہ اوُں کوُ قتل کریسن۔ اَتے اوہ تر یجھے ڈِیں دوبارہ زندہ تھی ویسی۔
34
۳۴۔اُنہاں کو وی اِنہاں گالہیں دی کوُئی وی سمجھ نیئں آئی اَتے ایہہ کلام اَنہاں کولوں لُکا رہ گیا اَتے جیہڑیاں گالہیں انہاں کو آکھیاں گیئاں ہَن انہاں کو سمجھ نیئں آئیاں۔
35
۳۵۔جڈاں یسوع یریحو دے کول اَپڑ گیا تاں ہک اندھا بندہ راہ دے کنارے بھیک منگدا پیا ہا۔
36
۳۶۔جیہڑے ویلے ایہہ کٹھ اوُندے کولوں لنگھیا تاں کٹھ دی آواز سُن کے اوُں نے پچھیا کہ ایہ کیا تھیندا پئے؟۔
37
۳۷۔انہاں نے اوُں کو ڈسایا کہ ناصرۃ دا یسوع ویندا پئے۔
38
۳۸۔تاں اوہ اندھا شخص اُٹھا تے چلاندے ہویاں آکھن لگا۔ ''اے یسوع ابنِ داوُد میڈے تے رحم کر۔
39
۳۹۔اَتے جیہڑے اوندے اَگے اَگے ویندے پئے ہَن۔ اُنہاں نے اوُں اندھے شخص کو جھرکیا تے آکھیا چُپ رہ پر اوہ بہوں زیادہ اُچی آواز نال بولن لگ پیا۔ ''اے ابن داؤد میڈے تے رحم کر''۔
40
۴۰۔یسوع نے کھڑے تھی کے حکم ڈِتا کہ ایں بندے کوُ میڈے کول گِن آؤ۔ جڈاں اوہ اندھا یسوع دے کول آیا تاں یسوع نے اوُں کوُ آکھیا۔
41
۴۱۔توُں کیا چاہندا ہیئں کہ میں تیڈے کیتے کراں ؟اوُں نے آکھیا"اے خداوند میں ڈیکھنا چاہندا ہاں"۔
42
۴۲۔یسوع نے اوُں کوُ آکھیا"سوجا کھا تھی ونج۔تیڈے ایمان نے تیکوُ چنگا کر ڈِتا ہے۔
43
۴۳۔اوہ فوراََ سو جا کھا تھی گیا اَتے اوُں دے پیچھوں ٹُر پیا تے خداوند دی تمجید کرن لگ پیا ایہہ سارا کچھ ڈیکھ کے سارے بندیاں نے خداوند دی حمد کیتی۔