¹ ۱۔ پس پیارے پُتراں آلی کار بنو۔ ² ۲۔ اَتے محبت نال چلو۔ جیویں مسیح نے تُہاڈے نال محبت کیتی اِتے ساڈے کیتے اپنے آپ کوُ خوشبو دی کار خدا دی نذر کر کے قربان چا کیتا۔ ³ ۳۔ اَتے جیویں کہ پاک بندیاں کوُ مُناسب ہِے تُہاڈے وِچ حرام کاری تے بئی کئیں طرح دی ناپاکی یا لالچ دا ذکر تک نہ تھیوے۔ ⁴ ۴۔ اَتے نہ بےشرمی تے بیہودہ گوئی تے ٹھٹھا بازی دا کیونکہ اِے لائق نئیں بلکہ ایندے برعکس شکر گزاری ہوئے۔ ⁵ ۵۔ کیوں جو تُساں ایہہ خوب جان دے ہیوے کہ کئیں حرامکار یا ناپاک یا لالچی دی جیہڑی بُت پرست دے برابر ہِے مسیح تے خدا دی بادشاہی اِچ کجھ میراث نئیں۔ ⁶ ۶۔ کوُئی تُہاکوُ بےفائدہ گالہیں دے نال دھوکا نہ ڈیوے کیونکہ اِنہاں گُناہاں دے پاروُں نافرمانی دے پُتراں تے خدا دا غصہ نازل تھیندا ہِے۔ ⁷ ۷۔ پا اُنہاں دے کماں اِچ شریک نہ تھیوو۔ ⁸ ۸۔کیوں جو تُساں پہلے اندھارا ہاوے پر ہُن خداوند اِچ نُور ہیوے۔ پس نُور دے پُتراں آلی کار چلو۔ ⁹ ۹۔ ( اِیں کیتے کہ نُور دا پھل ہر طرح دی نیکی تے راست بازی تے سچائی ہِے )۔ ¹⁰ ۱۰۔ اَتے تجربے نال پتا کریندے راہوو جو خداوند کوُ کیا پسند ہِے۔ ¹¹ ۱۱۔ اَتے اندھارے دے بےپھل کماں اِچ شریک نہ تھیوو بلکہ اُنہاں تے ڈانٹ پھٹکار ہی کیتا کرو۔ ¹² ۱۲۔ کیوں جو اُنہاں دے لُکے ہوئے کماں دا ذکر کرنا وی شرم دی گالہہ ہِے۔ ¹³ ۱۳۔ اَتے جیہڑیاں شئیاں تے ڈانٹ پھٹکار تھیندی ہِے اوہ سارہ کجھ نُور توں ظاہر تھیندِے کیونکہ جو کجھ ظاہر کیتا ویندے اوہ سوجھلا کیتا ویسی۔ ¹⁴ ۱۴۔ اِیں کیتے اوُں فرمائے اِے سوون آلے جاگ اَتے مُویاں وِچوں زندہ تھی تاں مسیح دا نُور تیڈے تے سوجھلا کریسی۔ ¹⁵ ۱۵۔ وِل غور نال ڈیکھو جو کیویں ٹُردے ہو۔ گالہیاں دی کار نئیں بلکہ عقلمنداں دی کار ٹُرو۔ ¹⁶ ۱۶۔ اَتے ویلے کوُ غنیمت جانو کیونکہ ڈِیں بُرے ہِن۔ ¹⁷ ۱۷۔ اِیں دے پاروُں جھلے نہ بنو بلکہ خداوند دی مرضی کوُ سمجھو کہ کیا ہِے۔ ¹⁸ ۱۸۔ اَتے شراب اِچ متوالے نہ تھیوو کیونکہ ایندے نال بدچلنی تھیندی ہِے بلکہ روُح نال بھریندے ونجو۔ ¹⁹ ۱۹۔ اَتے آپس اِچ مزمور تے گیت تے روحانی غزلاں گایا کرو تے دِل تھوں خداوند کی اَتے گاندے وجاندے ریہا کرو۔ ²⁰ ۲۰۔اَتے سارہیاں گالہیں وِچ ساڈے خداوند یسوع مسیح دے ناں توں ہر ویلے خدا باپ دا شُکر کریندے راہو۔ ²¹ ۲۱۔ اَتے مسیح دے خوف توں ہِک ڈوجھے دے تابع راہو۔ ²² ۲۲۔ اِے ذالو! اپنے پئے دے ایویں تابع راہو جیویں خداوند دی۔ ²³ ۲۳۔ کیونکہ پئے ذال دا سر ہِے جیویں مسیح کلیسیا دا سَر ہِے اَتے اوہ آپ بدن کوُ بچاون آلا ہِے۔ ²⁴ ۲۴۔ پر جیویں کلیسیا مسیح دے تابع ہِے اوُں وے ہی ذال وی ہر گالہہ اِچ اپنے پئے دے تابع ہوون۔ ²⁵ ۲۵۔ اِے پئے! اپنی ذالیں نال محبت رکھو جیویں مسیح نے وی کلیسیا نال محبت کر کے اپنے آپ کوُ اوُں دے کیتے موت دے حوالے کر ڈِتا۔ ²⁶ ۲۶۔ تاکہ اوُں کوُ کلام تھوں پانی نال دھنوا کے تے صاف کر کے پاک بنائے۔ ²⁷ ۲۷۔ اَتے ہِک ایہو جئی جلال آلی کلیسیا بنا کے اپنے کول حاضر کرے جیندے بدن اِچ داغ یا جُھری یا کوُئی بئی ایہو جئی شئے نہ ہووے بلکہ پاک تے بےعیب ہووے۔ ²⁸ ۲۸۔ اِیں طرح پئے کوُ لازم ہِے کہ اپنی ذالیں نال اپنے بدن دی کار محبت رکھن۔ جیہڑا اپنی ذال نال محبت رکھیندا ہِے اوہ اپنے آپ نال محبت رکھیندا ہِے۔ ²⁹ ۲۹۔ کیونکہ کڈائیں وی کئیں نے اپنے جسم نال دُشمنی نئیں کیتی بلک اُں کوُ پلیندا تے پرورش کریندا ہِے جیویں کہ مسیح کلیسیا کوُ۔ ³⁰ ۳۰۔ اِیں کیتے کہ اساں اوُں دے بدن دے عضو ہئیں۔ ³¹ ۳۱۔ اِیں دے پاروں بندہ اپنے پئیو نال تے ماں نال جُدا تھی کے اپنی ذال نال راہسی اَتے اوہ ڈوُہیں ہِک جسم تھی سن۔ ³² ۳۲۔ایہہ بھید تاں وڈا ہِے لیکن میں مسیح تے کلیسیا دسے بارے آدھا ہاں۔ ³³ ۳۳۔ بہر حال تُہاڈے وِچوں وی ہر ہِک اپنی ذال دے نال اپنی کار محبت رکھے اَتے ذال وی اِیں گالہہ دا خیال رکھے کہ اپنے پئے کولوں ڈردی راہوے۔