1
. اتے خداوند نے موسیٰ نال کلام کر کے آکھیا۔
2
. جہڑا وی خطا کرے اتے خداوند نال بے وفائی کرے، پئی آپنے گوانڈی دی امانت یاں رکھی ہوئی یاں لُٹی ہوئی شئے دا انکاری ہوئےیاں کوئی شئے زورا زوری کھو لؤے۔
3
. یاں اوہدی گواچی ہوئی شئے لبھ لؤے اتے اوہدا انکاری ہوئے اتے سبھے گلاں وچ جہڑیاں انسان کردا اےکسے وچ جھوٹی سونھ کھاؤے تاں اوہ گناہی گِنیا جاؤے گا۔
4
. ایس لئی جد اوہنے خطا کیتی تاں گناہ اوہدے سِر چڑھیا۔تاں اوہ لُٹی ہوئی شئے نوں یاں دھرو نال لئی ہوئی یاں امانت رکھی ہوئی شئے نوں یاں گواچی ہوئی شئے نوں جہڑی اوہنوں لبھی، پرتا دؤے۔
5
. یاں سبھے کجھ جہدے پاروں اوہنے جھوٹی سونھ کھاہدی، پوری پوی پرتائے اتے پنجواں حصا اوہدے اُتے ودھائے۔ اتے اوہنوں، جہدی اوہ شئے ہے وے، آپنی تقصیر دی قربانی لئیان دے دیہاڑے دے دؤے۔
6
. اتے آپنی تقصیر جوگی خداوند لئی قربانی نوں کاہن کول لئیاوے۔ مطلب گلے وچوں اک بے عیب بھیڈو جہدا مُل خطا دے حساب نال مِتھیا گئیا اے۔
7
. اتے کاہن خداوند اگے اوہدا کفارہ دؤے۔ تاں اوہنوں اوہ سبھے کجھ، جہدے پاروں اوہ گناہی گِنیا گئیا اے، بخشیا جاوے گا۔
8
. اتے خداوند نے موسیٰ نال کلام کر کے آکھیا۔
9
. ہارون اتے اوہدے پُتراں نوں حکم کر اتے آکھ پئی سوختنی قربانی مذبحے دی انگیٹھی اُتےساری رات سویر تک رہوے۔ اتے مذبحے اُتے اگ بلدی رہوے اتے اوہ کدی وی نا بُجھے۔
10
. اتے کاہن آپنا کتان دا کُڑتا اتے کتان دا پجاما پاؤے۔ اتے سوختنی قربانی دی راکھ نوں جہڑی مذبحے اُتے اگ نے ساڑ دِتی اے، چُکے اتے اوہنوں مذبحے دے اک پاسے پاؤے۔
11
. تب اوہ آپنے کپڑے لاہوے اتے دوجے پاؤے۔ اتے راکھ نوں تنبو احاطے تھوں باہر پاک تھاں وچ لیجاؤے۔
12
. اتے مذبحے اُتے اگ بلدی رہوے ، اتے اوہ کدی وی نا بجھے۔ اتے کاہن ہر سویرے اوہدے اُتے لکڑیاں ٹکاؤے اتے اوہدے اُتے سوختنی قربانی رکھے۔ اتے سلامتی دی قربانیاں دی چربی اوہدے اُتے ساڑے۔
13
. مذبحے اُتے ہمیشاں اگ بلدی رہوے، اتے اوہ کدی وی نا بجھے۔
14
. اتے نذر دی قربانی دی ایہہ شریعت اے پئی ہارون دے پُتر مذبحے دے ساہمنے خداوند دے اگے لئیاؤن۔
15
. اتے اوہدے وچوں اک مٹھ میدہ اتے تیل اتے سبھے لوبان جہڑا اوہدے اُتے اے، لئین۔ اتے مذبحے اُتے اوہدی یادگاری جوگی اعلا خشبو خداوند جوگی ساڑن۔
16
. اتے جو بچ جاؤے اوہنوں ہارون اتے اوہدے پُتر فطیری ای کھاؤن۔ مقدس تھاں وچ حضوری دے تنبو دے صحن وچ اوہنوں کھاؤن۔
17
. اوہ خمیری نا پکائی جاؤے۔ کیوں جو میں اوہنوں آپنی اگ والی قربانیاں وچوں حصا دِتا اے۔ اوہ خطا اتے تقصیر دی قربانیاں وانگوں چوکھی پاک اے۔
18
. ہارون دی اولاد وچوں نِرے مرد ای اوہنوں کھاؤن۔ خداوند دی اگ والی قربانیاں جوگی ایہو ای ابدی فرض پیڑھیاں تیکر ہووے گا۔ جہڑا اوہنوں ہتھ لاؤے، پاک ہو جاؤے گا۔
19
. اتے خداوند نے موسیٰ نال کلام کر کے آکھیا۔
20
. پئی ہارون اتے اوہدے پُتراں دی قربانی، جہڑی اوہ آپنے مسح دے دیہارے لئیاؤن ایہہ اے۔ میدہ ایفا دا دسواں حصا۔ ادھا صبح نوں اتے ادھا ڈیگر ویلے ہمیشاں لئی نذر دی قربانی جوگی لئیاؤن۔
21
. اوہ تیل وچ توے اُتے پکایا جاؤے۔ اتے پکیا ہویا ای لئیایا جاؤے۔ نذر دی قربانی دے پکے ہوئے ٹکڑے توں خداوند دی اعلا خشبو جوگی لئیا۔
22
. اتے اوہدے پُتراں وچوں مسح کیتا ہویا کاہن اوہنوں لئیاؤے۔ خداوند جوگی ایہہ ہمیشاں دا فرض اے۔ اوہ پورا ساڑیا جاؤے۔
23
. کاہن دی ہر اک نذر دی قربانی پوری ساڑی جاؤے۔ اوہ کھادی نا جاؤے۔
24
. اتے خداوند نے موسیٰ نال کلام کر کے آکھیا۔ ہارون اتے اوہدے پُتراں نوں آکھ دے۔ پئی خطا دی قربانی دی ایہہ شریعت اے پئی جہڑی تھاں سوختنی قربانی ذبح کیتی جاندی اے، اتھے ای خطا دی قربانی وی خداوند اگے ذبح کیتی جاؤے۔ کیوں جو اوہ چوکھی پاک اے ۔
25
. اتے جہڑا کاہن خطا جوگی اوہنوں لئیاؤندا اے ، اوہنوں پاک تھاں وچ کھاؤے۔ حضوری دے تنبو دے صحن وچ اوہ کھاہدی جاؤے۔
26
. جہڑا اوہدے گوشت نوں ہتھ لاؤے، اوہ پاک ہو جاؤے گا۔جیکر کسے کپڑے اُتے اوہدا لہؤ ڈِگے، تاں اوہنوں پاک تھاں وچ دھوتا جاؤے۔
27
. اتے مِٹی دا بھانڈا جہدے وچ اوہ پکایا گئیا اے، بھنیا جاؤے۔ جیکر اوہ پِتل دے بھانڈے وچ پکایا گئیا اے، تاں اوہ مانجھیا جاؤے اتے پانی نال دھوتا جاؤے۔
28
. کاہناں دی منڈلی دے سبھے مرد اوہدے وچوں کھاؤن۔کیوں جو ایہہ چوکھا پاک اے۔
29
. اتے کوئی خطا دی قربانی ، جہدے لہؤ وچوں کجھ حضوری دے تنبو اندر واڑیا گئیا ، تاں جو اوہنوں مقدِس وچ کفارہ دتا جاؤے، نا کھاہدی جاؤے۔ سگوں اگ وچ ساڑی جاؤے.
30
. تے کوئی خطا دی قربانی جہدے خون وچوں کجھ حضوری دے خیمے دے اندر داخل کیتا گیا ۔تاں جو اوہدے توں مقدش چہ کفارہ دِتا جاوے۔نہ کھائی جاوے ۔سگوں آگ وچ ساڑی جاوے۔