¹ . اتے جیکر کوئی ایہہ خطا کرے پئی اوہ گواہ ہووے، اتے اوہنوں سونھ دِتی جاوے پئی کیہ توں کجھ ویکھیا یاں سُنیا۔ اتے اوہ نا دسے۔ تاں گناہ اوہدے سِر ہووے گا۔ ² . جیکر کوئی کسے ناپاک شئے، جیویں پئی مویا ناپاک جنگلی جانور یاں موئے ناپاک ڈنگریاں موئے ناپاک رینگن والے جاندار نوں ہتھ لاوے اتے اوس تھوں ایہہ گل ڈھکی رہوے تان اوہ خطا وار گِنیا جاوے گا۔ ³ . یاں جیکر کسے نے کسے انسان دِیاں سبھے نجاستاں وچوں کسے نجاست نو، جہدے نال اوہ ناپاک ہندا اے، ہتھ لایا۔ اتے ایہہ گل اوس تھوں ڈھکی رہوے تاں جد اوہنوں معلوم ہووے تد اوہ گناہی گِنیا جاوے گا۔ ⁴ . جیکر کسے نے سونھ کھاہدی اتے آپنے بُلھاں نال انسان انھے واء سونھ کھا کے آکھدا اے۔ اتے ایہہ گل اوس تھوں ڈھکی رہوے تاں جد اوہنوں معلوم ہو جاوے تد اوہ اجیہی گل دا گناہی گِنیا جاوے گا۔ ⁵ . ایس لئی جد اوہ ایہناں وچوں کسے خطا وچ پھسیا ہووے تاں جہڑا گناہ اوہنے کیتا اے، اوہدا اقرار کرے۔ ⁶ . اتے اوس خطا جوگی جہڑی اوہنے کیتی اے، خداوند دے اگے خطا دی قربانی جوگی بھیڈاں یاں بکریاں وچوں اک مادہ لئیاوے۔ تد کاہن اوہدی خطا دا کفارہ دؤے گا۔ ⁷ . اتے جیکر اوہ بھیڈ بکری لئیان جوگا نا ہووے تاں آپنی خطا دی قربانی جوگی جہدا اوہ خطاکار ہویا، اوہ گھگیاں یاں کبوتر دے دو بچے لئیاوے۔ اک خطا دی قربانی جوگی اتے دوجا سوکتنی قربانی جوگی۔ ⁸ . اوہناں دونہواں نوں کاہن دے کول لئیاوے اتے پہلے اوہنوں جہڑا خطا دی قربانی جوگی اے، کوئھے۔ اتے اوہدا سِر دھون دے کولوں مروڑے، پر وکھ نا کرے۔ ⁹ . اتے خطا دی قربانی دے لہؤ وچوں مذبحے دی کندھ اُتے چھڑکے۔ اتے باقی لہؤ مذبحے دے پاوے کول روڑھیا جاوے۔ کیوں جو ایہہ خطا دی قربانی اے۔ ¹⁰ . اتے دوجے نوں سوختنی قربانی کر کے چاڑھے۔ اتے کاہن اوس خطا دا جہڑی اوہنے کیتی اے، کفارہ دؤے گا۔ تد اوہنوں بخشیا جاوے گا۔ ¹¹ . اتے جیکر اوہ گھگیاں یاں کبوتر دے بچے لئیان جوگا نا ہووے تاں خطا جوگی جہڑی اوہنے کیتی اے، ایفا دا دسواں حصا میدہ خطا دی قربانی جوگی جوگی لئیاوے۔ اوہدے اُتے تیل نہ سُٹے نا اوہدے اُتے لُوبان رکھے۔ کیوں جو ایہہ خطا دی قربانی اے۔ ¹² . اوہنوں کاہن کول لئیاوے تاں کاہن اوہدے وچوں اک مٹھ اوہدی یادگاری جوگی لؤے۔ اتے اوہنوں مذبحے اُتے خداوند دی اگ والی قربانیاں اُتے ساڑے۔ کیوں جو ایہہ خطا دی قربانی اے۔ ¹³ . اتے کاہن اوس خطا جوگی جہڑی اوہنے ایہناں گلاں وچوں کسے بارے کیتی اے، کفارہ دؤے۔تاں اوہنوں بخشیا جاوے گا۔ اتے باقی نذر دی قربانی وانگوں کاہن دا ہووے گا۔ ¹⁴ . اتے خداوند نے موسیٰ نال کلام کر کے آکھیا۔ ¹⁵ . جیکر کوئی جی قصور کرے اتے بھل بھلیکھے خداوند دِیاں پاک شیئواں وچ خطا کار ہووے۔ تاں خداوند لئی آپنی تقصیر دی جوگی گلے وچوں اک بے عیب بھیڈو چاندی دے مثقالاں وچ مِتھے ہوئے مُل دی لئیاوے۔ ¹⁶ . اتے جہنے مقدِس دِیاں شئیواں وچوں خطا کیتی، اوہدا بدلا دؤے۔ اتے اوہدے اُتے پنجواں حصا ودھائے۔ اتے کاہن دے ہتھ حوالے کرے۔ تاں کاہن تقصیر دے بھیڈو نال کفارہ دؤے۔تاں اوہنوں بخشیا جاوے گا۔ ¹⁷ . اتے جیکر کوئی انسان خطا کرے اتے اجیہی گل کرے، جہدے کرن تھوں خداوند دے موڑیا اے، اتے نا جانے ، تاں اوہ خطا دا گناہی اے، اتے گناہ اوہدے سِر ہووے گا۔ ¹⁸ . اوہ کاہن دے کول گلے وچوں اک بے عیب بھیڈو گناہ دے حساب نال مِتھے ہوئے مُل دی لئیاوے۔ اتے کاہن اوہدی کوتاہی جوگی جہڑی اوہنے کیتی اتے نا جانئیا، کفارہ دؤے۔تاں اوہنوں بخشیا جاوے گا۔ ¹⁹ . ایہہ خطا جوگی اے، ایس لئی پئی اوہ خداوند دا گناہی گِنیا گیا اے۔