1
. اتے خداوند نے موسیٰ نال کلام کر کے آکھیا۔
2
. پئی بنی اسرائیل نوں آکھ پئی جیکر کوئی جی بھُل کے کسے کم وچ کوتاہی کرے، جہدے نا کرنے دا خدواند نے حکم کیتا اے اتے اوہ اوہنوں کر بہوے۔
3
. جیکر مسح کیتا ہویا کاہن کوتاہی کرےاتے لوک اوہدی پیروئی وچ کوتاہی کرن تاں اوہ آپنی کوتاہی جوگی جہڑی اوہنے کیتی، اک بے عیب وچھا خداوند جوگی خطا دی قربانی کر کے لئیاوے۔
4
. اوس وچھے نوں خداوند دے ساہمنے حضوری دے تنبو کول لئیاوے۔ اتے اوہدے سِر اُتے آپنا ہتھ رکھے اتے خداوند دے اگے اوہنوں ذبح کرے۔
5
. اتے مسح کیتا ہویا کاہن وچھے دے لہؤ وچوں کجھ لے کے اتے حضوری دے تنبو وچ آوے۔
6
. اتے کاہن اوہدے وچ آپنی انگل ڈوبے اتے خداوند دے ساہمنے مقدِس دے پردے اگے ست واری اوہدے وچ چھڑکے۔
7
. اتے کاہن لہؤ وچوں خشبودار بخور دی قربان گاہ دے سِنگاں اُتے جہڑے حضوری دے تنبو وچ نیں، خداوند دے اگے لاوئے ۔ اتے وچھے دا باقی لہؤ سوختنی قربانی دے مذبحے دے پاوے دے نیڑے، جہڑا حضوری دے تنبو دے بوہے کول اے، روڑھ دیوے۔
8
. اتے خطا دے وچھے دی ایہہ شیؤاں اوہدے نالوں وکھ کرے۔ سبھے چربی جہڑی آندراں نوں لکاؤندی اے، اتے سبھے چربی جہڑی اوہناں دے اُتے اے۔
9
. اتے دونوِیں گردے اتے اوہناں اُتے دی چربی جہڑی دونہواں پاسے اے، اتے کلیجے دی جھلی نوں دوہنواں گردیاں سنھے وکھ کرے۔
10
. جیویں پئی سلامتی دے ذبیحے دے ڈھگے تھوں وکھ کیتی جاندی اے۔ اتے کاہن اوہنوں سوختنی قربانی دے مذبحے اُتے ساڑے۔
11
. اتے وچھے دی کھل اتے اوہدا ابھے گوشت اوہدے سِر اتے کھُراں اتے آندراں اتے اوہدی آلایش سنھے۔
12
. اتے وچھے دا باقی سبھے کجھ تنبو احاطے دے باہر پاک تھاں وچ جتھے راکھ پائی جاندی اے، لیجائے۔ اتے لکڑیاں اُتے اگ نال ساڑے۔ راکھ پاؤن دی تھاں تے اوہ ساڑیا جاوے۔
13
. جیکر بنی اسرائیل دی سبھے منڈلی نے بھُل کے خطا کیتی ہووے، اتے ایہہ منڈلی دِیاں اکھاں تھوں لُکی رہئی پئی منڈلی نے اک اجیہا کم کیتا جہدے کرن تھوں رب نے موڑیا اے، تاں اوہ قصوروار گِنی جاوے گی۔
14
. اتے جد ایہہ خطا جہڑی اوہناں نے کیتی اے، اوہناں نوں معلوم ہو جاوے، تاں سبھے منڈلی خطا دے ذبیحے جوگی اک وچھا لئیاوے۔ اتے اوہنوں حضوری دے تنبو اگے لئیان۔
15
. اتے منڈلی دے وڈے وڈیرے خداوند دے اگے اوس وچھے دے سِر اُتے آپنا ہتھ رکھن اتے خداوند دے اگے وچھا ذبح کیتا جاوے۔
16
. اتے مسح کیتا ہویا کاہن وچھے دے لہؤ وچوں کجھ حضوری دے تنبو وچ لئیاوے۔
17
. اتے کاہن آپنی انگل اوہدے وچ ڈوبے اتے خداوند دے ساہمنے پردے دے اگے ست واری چھڑکے۔
18
. اتے اوہدے وچوں مذبحے دے سِنگاں اُتے جہڑے حضوری دے تنبو وچ نیں، خداوند دے ساہمنے لاؤے۔ اتے باقی لہؤ سوختنی قربانی دے مذبحے دے پاوے دے کول جہڑا حضوری دے تنبو دے بوہے دے نیڑے اے، روڑھ دیوے۔
19
. اتے اوہدی سبھے چربی اوہدے تھوں وکھ کرے، اتے مذبحے اُتے ساڑے۔
20
. اتے جیویں خطا دی قربانی دے وچھے نال کیتا سی، تیویں ای ایہدے نال کرے اتے کاہن اوہناں جوگی کفارہ دیوے گا، تاں اوہناں نوں بخشیا جاوے گا۔
21
. اتے وچھے نوں تنبو احاطے وچوں باہر لیجاوے اتے جیویں پہلے وچھے نوں ساڑیا سی، تیویں ای اوہنوں ساڑے کیوں جو ایہہ منڈلی دی خطا دی قربانی اے۔
22
. اتے جیکر کوئی سرپنچ خطا کرے پئی بھُل کے اجیہا کم کرے جہدے کرن تھوں خداوند نے موڑیا اے اتے گناہی گِنیا جاوے۔
23
. تاں جد اوہ خطا جہڑی اوہنے کیتی اے، اوہنوں معلوم ہو جاوے تاں اوہ اک بکری دا بے عیب نَر بچا آپنی قربانی جوگی لئیاوے۔
24
. اتے آپنا ہتھ اوہدے سِر اُتے رکھے۔ اتے اوہنوں خداوند دے اگے سوختنی قربانی دے ذبح کرن دی تھاں وچ ذبح کرے۔ کیوں جو ایہہ خطا دی قربانی اے۔
25
. تد کاہن خطا دی قربانی دے لہؤ وچوں کجھ آپنی انگلی نال لئوے اتے سوختنی قربانی دے مذبے دے سِنگاں اُتے لاؤے۔ اتے سوختنی قربانی دے مذبحے دے پاوے دے کول لہؤ نوں روڑھ دؤے۔
26
. اتے اوہدی سبھے چربی سلامتی دے ذبیحے دی چربی وانگ مذبحے اُتے ساڑے۔ اتے اوہدے جوگی کاہن اوہدی خطا دا کفارہ دؤے گا، تاں اوہنوں بخشیا جاوے گا۔
27
. اتے جیکر دھرتی دے عام لوکاں وچوں کوئی بھُل بھلیکھے خطا کرے اتے اک اجیہا کم کرے جہدے کرن تھوں خداوند نے موڑیا اے، اتے مجرم گِنیا جاوے۔
28
. فیر جد اوہ خطا جہڑی اوہنے کیتی اے، اوہنوں معلوم ہو جاوے تد اوہ آپنی قربانی جوگی بے عیب بکریاں وچوں اک بکری آپنی خطا جوگی جہڑی اوہنے کیتی اے، لئیاوے۔
29
. اتے خطا دی قربانی دے سِر اُتے آپنا ہتھ رکھے اتے سوختنی قربانی دی تھاں وچ خطا دی قربانی نوں ذبح کرے۔
30
. تد کاہن اوہدے لہؤ وچوں آپنی انگلی نال کجھ لئوے اتے سوختنی قربانی دے مذبحے دے سِنگاں اُتے لاوے اتے اوہدا باقی لہؤ مذبحے دے پاوے کول روڑھ دؤے۔
31
. اتے اوہدی سبھے چربی جیویں پئی سلامتی دے ذبیحے دی چربی وکھ کیتی اے، اوہدے نالوں وکھ کرے اتے کاہن اوہنوں مذبحے اُتے خداوند دے لئیاعلا خشبو جوگی ساڑے اتے اوہدے جوگی کاہن کفارہ دؤے گا تاں اوہنوں بخشیا جاوے گا۔
32
. اتے جیکر اوہ آپنی قربانی جوگی خطا دی قربانی بھیڈ لئیاوے تاں بے عیب مادی لئیاوے۔
33
. اتے خطا دی قربانی دے سِر اُتے آپنا ہتھ رکھے اتے خطا جوگی اوہنوں اوس تھاں وچ ذبح کرے جتھے پئی سوختنی قربانی کیتی جاندی اے۔
34
. تد کاہن خطا دی قربانی دے لہؤ وچوں کجھ آپنی انگلی نال لئوے اتے سوکتنی قربانی دے مذبحے دے سِنگاں اُتے لاوے اتے مذبحے دے کول اوہدا باقی لہؤ روڑھ دؤے۔
35
. اتے اوہدی سبھے چربی اوہدے نالوں وکھ کرے، جیویں پئی سلامتی دے ذبیحے دے میمنے دی چربی وکھ کیتی جاندی اے۔ اتے کاہن اوہنوں مذبحے اُتے خداوند دی اگ والی قربانیاں اُتے ساڑے۔ اتے کاہن اوس خطا دا، جہڑی اوہنے کیتی اے، کفارہ دؤے گا۔ تاں اوہنوں بخشیا جاوے گا۔