1
. اتے تقصیر دی قربانی دی ایہہ شریعت اے۔ اوہ چوکھی پاک اے۔
2
. تقصیر دی قربانی سوختنی قربانی دی تھاں وچ ذبحھ کیتی جاؤے، اتے اوہدا لہؤ مذبحے اُتے اوہدے آل دوالے چھڑکیا جاؤے۔
3
. اتے اوہ اوہدی پُشل دی سبھے چربی اتے چربی جہڑی آندراں نوں ڈھکدی اے، چاڑھے۔
4
. اتے دونویں گردے اتے اوہناں اُتے دی چربی جہڑی دونواں وکھیاں وچ اے، اتے کلیجے دی جھلی دونواں گردیاں سنھے وکھ کرے۔
5
. اتے کاہن اوہناں نوں مذبحے اُتے ساڑے پئی خداوند جوگی اگ والی قربانی ہوؤے۔ کیوں جو ایہہ تقصیر دی قربانی اے۔
6
. کاہناں دی منڈلی دا ہر مرد اوہنوں کھاؤے۔ پاک تھاں وچ اوہ کھاہدی جاؤے۔ کیوں جو اوہ چوکھی پاک اے۔
7
. تقصیر دی قربانی خطا دی قربانی وانگ اے۔ دونواں جوگی اک ای شریعت اے۔ جہڑا کاہن اوہدے نال کفارہ دیندا اے، اوہ اوسے ای دی ہوؤے گی۔
8
. اتے جہڑا کاہن کسے دی سوختنی قربانی کردا اے، قربانی مگروں کھل اوسے دی ہوؤے گی۔
9
. اتے ہر اک نذر دی قربانی جہڑی تندور وچ پکائی گئی یاں ہانڈی وچ یاں توے اُتے بنائی گئی، اوس کاہن دی ہوؤے گی، جہڑا اوہنوں کردا اے۔
10
. اتے ہر اک نذر دی قربانی تیل وچ ملی ہوئی یاں سُکی، ہارون دے سبھے پُتراں دی ہوؤے گی۔ ہر اک آپنے بھرا دے برابر۔
11
. اتے سلامتی دے ذبیحے دی جہڑا خداوند جوگی کیتا جاوے ایہہ شریعت اے۔
12
. جیکر شُکرانے جوگی کیتا جاؤے تاں اوہ شکرانے دے ذبیحے نال فطیری روغنی کُلچے اتے فطیری تیل نال چوپڑی ہوئی چپاتیاں اتے تیل وچ پکے ہوئے میدے دے کُلچے کرے۔
13
. خمیری روٹی دے کلچیاں نال اوہ آپنی قربانی شکرانے دے ذبیحے سنھے جہڑا سلامتی دا اے، کرے۔
14
. اتے ایس ساری قربانی وچوں اک خداوند دے مونھ دھروئیں چُکن دی نذر جوگی کرے۔ اوہ اوس کاہن دا ہوؤے گا، جہڑا سلامتی دے ذبیحے دا لہؤ چھڑکدا اے۔
15
. اتے سلامتی دے شکرانے دے ذبیحے دا گوشت قربانی دے دیہاڑے ای کھاہدا جاؤے۔ اوہدے وچوں کجھ اگلے دیہاڑے تیکر نا چھڈیا جاؤے۔
16
. اتے جیکر اوہدی قربانی دا ذبیحا منت دا یاں آپنی خوشی دا ہوؤے تاں اوہ اوہدے کرن دے دیہاڑے وچ کھاہدا جاؤے اتے جنا بچے اوہ اگلے دیہاڑے کھاہدا جاؤے۔
17
. پر ذبیحے دے گوشت وچوں، جہڑا تیجے دیہاڑے تیکر بچیا رہوے، اوہ اگ وچ ساڑیا جاؤے۔
18
. اتے جیکر سلامتی دے ذبیحے دے گوشت وچوں تیجے دیہاڑے کجھ کھاہدا جاؤے تاں اوہ قبولئیا نا جاؤے گا۔ اتے کرن والے دا گِنیا نا جاؤے گا۔ سگوں اوہ مکروہ ہو ؤے گا اتے جہڑا اوہدے وچوں کھاؤے گا، اوہدے سِر گناہ ہوؤے گا۔
19
. اتے جہڑا گوشت کسے ناپاک شئے نال مسیا ہوؤے تاں اوہ نا کھاہدا جاؤے۔ ہر اک جہڑا پاک اے، ایس سلامتی دی قربانی دا گوشت کھاؤے۔
20
. جیکر کوئی آپنے اُتے نجاست رکھئیاں سلامتی دے ذبیحے دا جہڑا خداوند جوگی کیتا گئیا اے، گوشت کھاؤے۔ تاں اوہ آپنے لوکاں وچوں باہر کڈھ دتا جاؤے۔
21
. جیکر کوئی نجس شئے نوں ہتھ لاؤے، انسان دی یاں ناپاک ڈنگر دی نجاست نوں یاں پلیت نوں جہڑی ناپاک کردی اے، اتے سلامتی دے ذبیحے وچوں جہڑا خداوند جوگی کیتا گئیا اے، کھاؤے تاں اوہ آپنے لوکاں وچوں کڈھ دتا جاؤے۔
22
. اتے خداوند نے موسیٰ نال کلام کر کے آکھیا۔
23
. بنی اسرائیل نال کلام کر اتے اوہناں نوں آکھ دے پئی سبھے چربی ڈھگے دی یاں بھیڈ دی یاں بکری دی، اوہ نا کھاؤن۔
24
. اتے آپنے آپ موئے اتے وحشی درندیاں دے پاڑے ہوئے ڈنگر دی چربی ہر کم وچ ورتی جاؤے۔ پر تُسی اوہنوں کھاؤنا نئیں۔
25
. جہڑا اجیہے ڈنگر دی چربی کھاؤے پئی جہدے نال خداوند جوگی اگ والی قربانی کیتی جاندی اے، اوہ آپنے لوکاں وچوں کڈھ دتا جاؤے۔
26
. اتے تسی آپنے گھراں وچ نا پنکھاں اتے نا ڈنگراں دا لہؤ کھاؤنا۔
27
. اتے جنہے لہؤ چوں کجھ کھاہدا اوہ آپنے لوکاں وچوں کڈھ دتا جاؤے گا۔
28
. اتے خداوند نے موسیٰ نال کلام کر کے آکھیا۔
29
. بنی اسرائیل نال کلام کر اتے آکھ دے پئی جہڑا سلامتی دا ذبیحا خداوند جوگی کرے، تاں آپنے سلامتی دے ذبیحے وچوں خداوند جوگی آپ قربانی لئیاؤے۔
30
. اوہ خداوند دی اگ والی قربانیاں نوں آپنے ہتھاں نال چکے۔ اتے چربی سینے سنھے لئیاؤے۔ پئی سینا ہلاؤن دی قربانی جوگی خداوند دے ساہمنے ہلایا جاؤے۔
31
. اتے کاہن چربی نوں مذبحے اُتے ساڑے اتے سینا ہاروں اتے اوہدے پُتراں دا ہوؤے گا۔
32
. اتے آپنے سلامتی دے ذبیحیاں وچوں تسی سجا موہڈا کاہن نوں چُکن دی قربانی جوگی دؤو۔
33
. ہارون دے پُتراں وچوں جہڑا سلامتی دے ذبیحے دا لہؤ اتے چربی کردا اے، سجا موہڈا اوہدا ہوؤے گا۔
34
. کیوں جو بنی اسرائیل دی سلامتی دے ذبیحیاں وچوں میں ہلاؤن دا سینا اتے چُکن دا موہڈا لئیا اے۔ اتے ہارون اتے اوہدے پُتراں نوں دِتا اے۔ ایہہ ہمیشاں دا فرض بنی اسرائیل وچ ہوؤے گا۔
35
. ایہہ خداوند دی اگ والی قربانیاں وچوں ہارون اتے اوہدے پُتراں دا حصا اے۔ جہڑے دیہاڑے اوہ نذر کیتے گئے تاں جو خداوند دے کاہن بنن۔
36
. اتے جہدا حکم خداوند نے کیتا اے پئی اوہناں دے مسح دے دیہاڑے بنی اسرائیل وچوں اوہناں نوں دتا جؤے گا۔ اوہناں دِیا پیڑھیاں وچ ایہہ ہمیشاں دا فرض اے۔
37
. سوختنی قربانی اتے نذر دی قربانی اتے خطا دی قربانی اتے تقصیر دی قربانی اتے تقدیس اتے سلامتی دے ذبیحے دی ایہو ای شریعت اے۔
38
. جہدا خداوند نے موسیٰ نوں سینا دے پہاڑ اُتے حکم دِتا ۔ جہڑے دیہاڑے پئی اوہنے بنی اسرائیل نوں آکھیا پئی سینا دے جنگل وچ خداوند جوگی آپنی قربانیاں کرن۔