1
. اتے خداوند نے موسیٰ نال کلام کر کے آکھیا پئی۔
2
. بنی اسرائیل نال کلام کر اتے آکھ۔ پئی میں تہاڈا خداوند رب ہاں۔
3
. تسی مصر دِیاں لتاں، جتھے تسی رہئے، اُتے نا چلو۔ اتے نا ای کنعان دی دھرتی دِیاں خصلتاں دے موافق، جتھے میں تہانوں گھلاں گا، کم کرو۔ اتے اوہناں دے ریت رواج اُتے تسی نا چلو۔
4
. میرے حکماں نوں منو۔ میرے قانون تے چلو، اتے اوہناں دی پیروئی کرو۔ کیوں جو میں خداوند تہاڈا رب ہاں۔
5
. اخیر میرے قانوناں اتے میرے حکماں اُتے عمل ورتو۔ پئی جہڑا اوہناں اُتے عمل ورتے تاں اوہ اوہناں پاروں جیوندا رہؤے گا۔ میں خداوند ہاں۔
6
. تہاڈے وچوں کوئی آپنی نیڑے دی رشتے دار دے جُسے نوں ننگا نا کرے۔ میں خداوند ہاں۔
7
. توں آپنی ماں دے جُسے نوں، جہڑا تیرے پیو دا حق اے، ننگا نا کرِیں۔ کیوں جو اوہ تیری ماں اے۔ توں اوہدے جُسے نوں ننگا نا کرِیں۔
8
. توں آپنے پیو دی ووہٹی دے جُسے نوں ننگا نا کرِیں، کیوں جو اوہ تیرے پیو دا جُسا اے۔
9
. توں آپنی بھین دے جسے نوں ، بھانویں اوہ تیرے پیو دی دھی ہؤے یاں تیری ماں دی، اتے بھانویں اوہ گھر وچ جمی ہؤے بھانویں ہور کِتے، ننگا نا کرِیں۔
10
. توں آپنی پوتری یاں دوہتری دے جُسے نوں ننگا نا کرِیں، کیوں جو اوہناں دا جُسا تاں تیرا ای جُسا اے۔
11
. تیرے پیو دی ووہٹی دی دھی جہڑی تیرے پیو تھوں جمی اے، تیری بھین اے۔ توں اوہدے جُسے نوں ننگا نا کرِیں۔
12
. توں آپنی پھُپھی دے جُسے نوں ننگا نا کرِیں۔ کیوں جو اوہ تیرے پیو دی نیڑے دی رشتے دار اے۔
13
. توں آپنی ماسی دے جُسے نوں ننگا نا کرِیں، کیوں جو اوہ تیری ماں دی نیڑے دی رشتے دار اے۔
14
. توں آپنے پیو دے بھرا دے جُسے نوں ننگا نا کرِیں، مطلب اوہدی ووہٹی دے نیڑے نا جاؤیں، کیوں جو اوہ تیری چاچی اے۔
15
. توں آپنی نُونھ دے جُسے نوں ننگا نا کرِیں، کیوں جو اوہ تیرے پُتر دی ووہٹی اے۔ ایس لئی توں اوہدے جُسے نوں ننگا نا کرِیں۔
16
. توں آپنی بھرجائی دے جُسے نوں ننگا نا کرِیں، کیوں جو اوہ تیرے بھرا دا جُسا اے۔
17
. توں کسے بی بی اتے اوہدی دھی دونواں دے جُسے نوں ننگا نا کرِیں، اتے نا توں اوس بی بی دی پوتری یا دوہتری نال ویاہ کر کے اوہناں وچوں کسے دے جُسے نوں ننگا کرِیں۔ کیوں جو اوہ دونویں اوس بی بی دی نیڑے دِیاں رشتے دار نیں۔ ایہہ چوکھی خباثت اے۔
18
. توں آپنی سالی نال ویاہ کر کے اوہنوں آپنی ووہٹی دی سوکن نا بناؤیں پئی دوجی دے جیوندیاں اوہدے جُسے نوں وی ننگا کریں۔
19
. توں بی بی دے کول اوہدے حیض دے دیہاڑیاں دی نجاست دے ویلے نا جانویں۔ تاں جو اوہدے جُسے نوں ننگا کریں۔
20
. اتے توں آپنے آپ نوں نجس کرن جوگی آپنے گوانڈی دی ووہٹی نال صحبت نا کرِیں۔
21
. توں آپنی نسل وچوں مولک جوگی نذر نا کرِیں۔ اتے آپنے رب دے ناں نوں داغ نا لاوِیں۔ میں خداوند ہاں۔
22
. اتے توں بندے دے نال بی بی وانگ صحبت نا کرِیں۔ کیوں جو ایہہ مکروہ کم اے۔
23
. تون کسے ڈنگر نال صحبت نا کرِیں، پئی اوہدے نال نجس ہؤیں گا۔ اتے کوئی بی بی ڈنگر دے اگے نا کھلؤےپئی اوہدے تھوں صحبت کرؤائے۔ کیوں جو ایہہ چوکھی بدی اے۔
24
. تسی ایہناں گلاں وچوں کسے نال آپنے آپ نوں نجس نا کرنا۔ کیوں جو اجہیاں گلاں نال اوہ قوماں نجس ہوئیاں، جنہاں نوں میں تہاڈے اگوں کڈھ دؤاں گا۔
25
. اتے دھرتی ناپاک ہوئی۔ اخیر میں اوہدی بدی دی سزا دؤاں گا۔ اتے دھرتی آپنے رہن والیاں نوں اُلٹی کر کے کڈھ دؤے گی۔
26
. اخیر تسی میڑے قانوناں اتے میرے حکماں اُتے عمل ورتو۔ اتے اجہیاں مکروہ گلاں وچوں تسی، بھانوین دیسی بھانویں پردیسی، جہڑا تہاڈے وچ رہندا اے، کوئی نا کرو۔
27
. کیوں جو ایہہ سبھے پلیت کم دھرتی دے واسیاں نے، جہڑے تہاڈے تھوں پہلوں سن، کیتے اتے دھرتی ناپاک ہوئی۔
28
. تاں جو جد تسی دھرتی نوں ناپاک کرو تاں اوہ تہانوں اُلٹی کر کے کڈھ نا دؤے۔ جیویں پئی تہاڈے تھوں پہلے والیاں قوماں نوں اوہنے کڈھ دِتا۔
29
. کیوں جو ایہناں پلیتیاں وچوں جہڑا وی کجھ کرے گا، تاں سبھے کرن والے آپنے لوکاں وچوں کڈھے جاؤن گے۔
30
. اخیر میرے حکماں اُتے عمل ورتو۔ تاں جو اوہناں پلیت کماں وچوں جہڑے تہاڈے تھوں پہلوں کیتے گئے، کوئی نا کرو۔ اتے آپنے آپ نوں اوہناں پاروں پلیت نا کرو۔ میں خداوند تہاڈا رب ہاں۔