1
. اتے خداوند نے موسیٰ نال کلام کر کے آکھیا۔
2
. پئی ہارون اتے اوہدے پُتراں اتے سبھے بنی اسرائیل نال کلام کر اتے اوہناں نوں آکھ۔ پئی خداوند نے ایہہ آکھیا اے۔
3
. پئی جیکر کوئی شخص اسرائیل دے خاندان وچوں ڈھگے یاں بھیڈ یاں بکری تنبو احاطے وچ یاں تنبو احاطے وچوں باہر ذبح کرے۔
4
. اتے اوہنوں حضوری دے تنبو دے بوہے اُتے خداوند دی قربانی کرن جوگی اوہدے مسکن اگے نا لئیاوے۔ تاں اوہدے اُتے لہؤ دا الزام ہؤے گا۔ پئی اوہنے لہؤ وگایا۔
5
. تاں جو بنی اسرائیل آپنی قربانیاں، جنہاں نوں اوہ میدان وچ ذبح کردے نیں، کاہن دے کول لئیاؤن اتے اوہناں نوں خداوند جوگی حضوری دے تنبو دے بوہے اُتے کرن اتے خداوند جوگی سلامتی دی قربانیاں ذبح کرن۔
6
. تاں کاہن اوہناں دا لہؤ حجوری دے تنبو دے بوہے کول خداوند دے مذبحے اُتے چھِنکے۔ اتے اوہدی چربی نوں خداوند دی اعلا خشبو جوگی ساڑے۔
7
. اتے اگے تھوں اوہ شیطاناں جوگی، جنہاں دے منن والے ہو کے اوہناں نے بدکاری کیتی ، آپنی قربانیاں ذبح نا کرن گے۔ ایہہ اوہناں جوگی ہمیشاں دا فرض پیڑھی تھوں پیڑھی تیکر ہؤے گا۔
8
. اتے توں اوہناں نوں آکھ پئی جہڑا شخص اسرائیل دے خاندان وچوں یاں پردیسیاں وچوں، جہڑا اوہناں دے وچ اے، آپنی سوختنی قربانی یاں ذبیحا چاڑھے۔
9
. اتے اوہنوں حضوری دے تنبو دے بوہے اُتے خداوند جوگی چاڑھن نا لئیاوے، اوہ شخص آپنے لوکاں وچوں کڈھیا جاؤے۔
10
. جیکر کوئی شخص اسرائیل دے خاندان وچوں یاں پردیسیاں وچوں جہڑا اوہناں دے وچ نیں، لہؤ کھاؤے، تاں میں آپنا مونھ اوس لہؤ خور دے خلاف کر لؤاں گا۔ اتے اوہنوں اوہدے لوکان وچوں کڈھ دؤاں گا۔
11
. کیوں جو جُسے دی جان لہؤ وچ اے، اتے ایسے لئی میں اوہنوں تہاڈے کولوں مذبحے اُتے رکھوایا۔ تاں جو اوہدے نال تہاڈی جاناں دا کفارہ دِتا جاؤے۔ کیوں جو لہؤ جان دا کفارہ دیندا اے۔
12
. ایسے لئی مین بنی اسرائیل نوں آکھیا پئی تہاڈے وچوں کوئی وی لہؤ نا کھاؤے۔ اتے کوئی پردیسی وی جہڑا تہاڈے وچ اے، لہؤ نا کھاؤے۔
13
. اتے جہڑا بندہ اسرائیل وچوں اتے پردیسیاں وچوں جہڑے تہاڈے وچ نیں، کسے جنگلی ڈنگر یاں پکھیرو دا، جنہاں دا کھانا روا اے، شکار کرے، تاں اوہ اوہدا لہؤ وگائے اتے اوہنوں دھوڑ تھوں لکاؤے۔
14
. کیوں جو ہر اک جُسے دی جان اُہدا لہؤ اے۔ اوہ اوہدی جان دی تھاں اے، اتے ایسے لئی میں بنی اسرائیل نوں آکھیا پئی جُسے دا لہؤ نا کھاؤو۔ پئی ہر اک جُسے دی جان اوہدا لہؤ اے۔ جہڑا وہ اوہنوں کھاؤے گا، کڈھیا جاؤے گا۔
15
. اتے جہڑا وہ شخص آپنے آپ مؤن والے یا وحشی دے پاڑے ہوئے جانور نوں کھاؤے، بھانویں دیسی ہؤے یاں پردیسی، اوہ آپنے کپڑے دھؤے اتے نھاؤے، اتے دھمی ویلے تیکر ناپاک رہؤے۔ تد اوہ پاک ہؤے گا۔
16
. جیکر نا دھؤے اتے نا نھاؤے۔ تاں گناہ اوہدے سِر اُتے ہؤے گا۔