1
. اتے خداوند نے موسیٰ نال کلام کیتا، مگروں ایس دے پئی ہارون دے دو پُتر خداوند جوگی نذر لئیائے، اتے مر گئے۔
2
. تاں خداوند نے موسیٰ نوں آکھیاپئی آپنے بھرا ہارون نوں آکھ پئی ہر ویلے سبھ تھوں پاک تھاں وچ پردے دے اندررحم گاہ دے کول جہڑا صندوق اے، نا آؤے تاں جو مر نا جاؤے۔ کیوں جو میں بدل وچ رحم گاہ دے اُتے ظاہر ہؤاں گا۔
3
. ہارون پاک ترین تھاں دے اندر انج آؤے پئی پہلے اک وچھا خطا دی قربانی جوگی اتے اک بھیڈو سوختنی قربانی جوگی کرے۔
4
. اتے اوہ کتان دا پاک کُڑتا پاؤے اتے اوہدے تن اُتے کتان دا پجاما ہؤے۔ اتے کتان دے لکدے نال اوہدا لک کسئیا ہویا ہؤے اتے کتان ای دی پگ اوہدے سِر اُتے بنھی ہؤئے۔ ایہہ پاک لباس نیں، اتے اوہ ایہناں نوں پانی نھا کے پاؤے۔
5
. اتے بنی اسرائیل دی منڈلی تھوں خطا دی قربانی جوگی دو بکرے اتے سوختنی قربانی جوگی اک بھیڈو لؤے۔
6
. اتے ہارون خطا دی قربانی دے وچھے نوں، جہڑا اوہدے ول اے، کر کے آپنے اتے آپنے گھر جوگی کفارہ دؤے۔
7
. فیر اوہناں دونہواں بکریاں نوں لے کے اوہناں نوں منڈلی دے تنبو دے بوہے اُتے خداوند دے حضور کھلاہرے۔
8
. اتے ہارون اوہناں دونہواں بکریاں اُتے چِٹھیاں پاؤے۔ اک چِٹھی خداوند جوگی اتے دُوجی عزازیل جوگی ہؤے۔
9
. اتے جہڑے بکرے اُتے خداوند دے ناں دی چِٹھی نکلے اوہنوں ہارون لے کے خطا دی قربانی جوگی چاڑھے۔
10
. پر جہڑے بکرے اُتے عزازیل دے ناں دی چِٹھی نکلے اوہ خداوند دے حضور جیوندا کھلاہریا جاؤے، تاں جو اوہدے نال کفارہ دِتا جاؤے اتے اوہ عزازیل جوگی جنگل وچ چھڈیا جاؤے۔
11
. اتے ہارون خطا دی قربانی دے وچھے نوں جہڑا اوہدے ول اے، اگے لئیا کے آپنے اتے آپنے گھر جوگی کفارہ دؤے اتے اوس وچھے نوں جہڑا اوہدے پاسے ، خطا دی قربانی جوگی اے، ذبح کرے۔
12
. اتے اوہ اک بخور دان نوں لؤے، جہدے وچ خداوند دے مذبحے دی اگ دے پخدے کولے بھرے ہؤن، اتے آپنیاں مُٹھاں بریِک خشبودار بخور نال بھر لؤے۔ اتے اوہنوں پردے دے اندر لئیاؤے۔
13
. اتے اوس بخور نوں خداوند دے حضور اگ وچ پاؤے تاں جو بخور دا دھؤاں سرپوش نوں، جہڑا شہادت دے صندوق دے اُتے اے، لکا لؤے۔ پئی اوہ مر نا جاؤے۔
14
. فیر اوہ اوس وچھے دا کجھ لہؤ لے کے اوہنوں آپنی انگلی نال چڑھدے پاسے ولوں سرپوش دے اُتے چھِنکے اتے سرپوش دے اگے وی کجھ لہؤ آپنی انگلی نال ست واری چھِنکے۔
15
. فیر اوہ خطا دی قربانی دے اوس بکرے نوں ذبح کرے جہڑا سبھے منڈلی ولوں اے، اتے اوہدے لہؤ نوں پردے دے اندر لئیا کے جو کجھ اوہنے وچھے دے لہؤ نال کیتا سی، اوہو ای ایہدے نال وی کرے۔ اتے اوہنوں سرپوش دے اُتے اتے اوہدے ساہمنے چھِنکے۔
16
. اتے بنی اسرائیل دی سبھے نجاستاں اتے گناہواں اتے خطاواں دے پاروں پاک ترین تھاں جوگی کفارہ دؤے۔ اتے اجیہا ای اوہ منڈلی دے تنبو جوگی وی کرے۔ جہڑا اوہناں دے نال اوہناں دی نجاستاں دے وچ رہندا اے۔
17
. اتے جد اوہ کفارہ دیئن نوں پاک ترین تھاں اندر جاؤے تاں جد تیکر اوہ آپنے اتے آپنے گھرانے اتے بنی اسرائیل دی سبھے منڈلی جوگی کفارہ دے کے باہر نا آ جاؤے۔ اوس ویلے تیکر کوئی بندی منڈلی دے تنبو وچ نا وڑے۔
18
. فیر اوہ نکل کے اوس مذبحے دے کول، جہڑا خداوند دے حضور اے، جاؤے اتے اوہدے جوگی کفارہ دؤے۔ اتے اوس وچھے اتے بکرے دا تھوڑا تھوڑا جہیا لہؤ لے کے مذبحے دے سِنگاں اُتے آل دوالے لاؤے۔
19
. اتے کجھ لہؤ اوہدے اُتے ست واری آپنی انگلی نال چھِنکے اتے اوہنوں بنی اسرائیل دی نجاستاں تھوں پاک اتے مقدس کرے۔
20
. اتے جد اوہ پاک ترین تھاں اتے منڈلی دے تنبو اتے مذبحے جوگی کفارہ دے لؤے تاں اوس جیوندے بکرے نوں اگے لئیاوے۔
21
. اتے ہارون آپنے دونویں ہتھ اوس جیوندے بکرے دے سِر اُتے رکھ کے اوہدے اُتے بنی اسرائیل دی سبھے بدکاریاں اتے۔
22
. اتے بکرا اوہدے سبھے گناہ چُک کے ویران دھرتی ول لے جاؤے گا۔ تد اوہ بکرے نوں جنگل وچ چھڈ دؤے۔
23
. تد ہارون حضوری دے تنبو اندر آؤے۔ اتے کتانی کپڑے جہڑے اوہنے مقدِس وچ وڑن ویلے پائے سن، لاہ دؤے۔ اتے اوہناں نوں اوتھے چھڈ دؤے۔
24
. تد پاک تھاں وچ آپنا جُسا پانی نال دھؤے اتے آپنے کپڑے پاؤے اتے باہر نکلے۔ تد آپنی سوختنی قربانی اتے قوم دی سوختنی قربانی کرے اتے آپنے جوگی اتے قوم جوگی کفارہ دؤے۔
25
. اتے خطا دی چربی مذبحے اُتے ساڑے۔
26
. اتے اوہ جنہے عزازیل دا بکرا چھڈیا، اوہ آپنے کپڑے دھؤے اتے پانی نال نھائے۔ اتے ایس تھوں مگروں تنبو احاطے وچ وڑے۔
27
. اتے خطا دا وچھا اتے خطا دا بکرا جنہاں دا لہؤ کفارے جوگی مقدِس وچ واڑیا گئیا، اوہناں نوں تنبو احاطے وچوں باہر لے جاؤن۔ اتے اوہناں دِیاں کھلاں اتے اوہناں دا گوشت اتے اوہناں دِیاں آلائشاں اگ نال ساڑِیاں جاؤن۔
28
. اتے اوہ جنہے اوہناں نوں ساڑیا، آپنے کپڑے دھؤے اتے آپنا سبھے جُسا پانی نال دھؤے اتے اوہدے مگروں تنبو احاطے وچ وڑے۔
29
. ایہہ تہاڈے جوگی ہمیشاں دا فرض ہؤے گا پئی ستویں مھینے دی دسویں تریخ نوں تہاڈے وچوں ہر اک بھانؤیں دیسی ہؤے یاں پردیسی آپنے نفس نوں مارے اتے ہور کوئی کم نا کرے۔
30
. کیوں جو اوس دیہاڑے تہاڈی پاکی جوگی تہاڈے لئی کفارہ دِتا جاؤے گا۔ تد تسی آپنے سبھے گناہواں تھوں خداوند دے اگے پاک ہو جاؤ گے۔
31
. ایہہ تہاڈے جوگی چھُٹی دا سبت ہؤے گا۔ ایس دیہاڑے تسی آپنے نفس نوں مارو ۔ ایہہ ہمیشاں دا فرض ہؤے گا۔
32
. اتے کاہن جہڑا مسح کیتا ہویا اے، اتے جہدے ہتھاں دی تقدیس کیتی گئی اے پئی آپنے پیو دی تھاں کہانت دا کم کرے۔ کفارہ دؤے گا اتے کتانی کپڑے مطلب پاک کپڑے پاؤے گا۔
33
. اتے اوہ مقدِس جوگی اتے حضوری دے تنبو جوگی اتے مذبحے جوگی اتے کاہن جوگی اتے سبھے قوم جوگی کفارہ دؤے گا۔
34
. ایہہ تہاڈے جوگی ہمیشاں دا فرض ہؤے گا۔ پئی بنی اسرائیل دے سبھے گناہواں جوگی ورھے وچ اک واری کفارہ دِتا جاؤے۔ اخیر جیویں خداوند نے موسیٰ نوں حکم دِتا، اوہنے کیتا۔