1
. اتے خداوند نے موسیٰ اتے ہارون نوں کلام کر کے آکھیا پئی۔
2
. بنی اسرائیل نوں کلام کر کے آکھو پئی ہر اک بندہ جہدے جُسے وچ جریان دا مرض ہؤے اوہ اوسے دے پاروں ناپاک اے۔
3
. اتے جریان دی پلیتی انج ہؤے گی پئی اوہدے جُسے وچوں بی وگے یاں نا وگے دونواں وچ اوہدی پلیتی اے۔
4
. جہڑے بسترے اُتے سونویں اوہ پلیت ہؤے گا۔ اتے جہڑی شئے اُتے اوہ بہؤے اوہ ناپاک ہؤے گی۔
5
. اتے جہڑا اوہدے بسترے نوں ہتھ لاؤے اوہ آپنے کپڑے دھؤے اتے پانی نال نھائے اتے دھمی ویلے تیکر ناپاک رہؤے گا۔
6
. جہڑا وی اوس شئے اُتے بہؤے، جہدے اُتے پئی جریان والا بئٹھا سی، تان اوہ آپنے کپڑے دھؤے اتے پانی نال نھائے اتے دھمی ویلے تیکر ناپاک رہؤے گا۔
7
. اتے جہڑا وی جریان والے دے جُسے نوں ہتھ لاؤے اوہ آپنے کپڑے دھؤے اتے پانی نال نھائے اتے دھمی ویلے تیکر ناپاک رہؤے گا۔
8
. جیکر جریان والا کسے شئے اُتے، جہڑی پاک اے، تھُک دؤے تاں اوہ آپنے کپڑے دھؤے اتے پانی نال نھائے اتے دھمی ویلے تیکر ناپاک ہؤے گا۔
9
. اتے ہر اوہ زین جہدے اُتے جریان والا سوار ہؤے، ناپاک ہؤے گی۔
10
. جیکر کوئی کسے شئے نوں، جہڑی جریان والے دے تھلے سی، تاں اوہ دھمی ویلے ویلے تیکر ناپاک ہؤے گا۔ اتے جیکر کوئی اجیہی شئے نوں چُکے، تاں آپنے کپڑے دھؤے۔ اتے پانی نال نھائے اتے دھمی ویلے تیکر ناپاک ہؤے گا۔
11
. جیکر جریان والا کسے نون ہتھ دھوتے بنا ہتھ لاؤے تاں اوہ آپنے کپڑے دھؤے اتے پانی نال بھائے اتے دھمی ویلے تیکر ناپاک ہؤے گا۔
12
. جیکر جریان والا کسے مٹی دے بھانڈے نوں ہتھ لاؤے، تاں اوہ بھنئیا جاؤے، اتے جیکر لکڑی دا بھانڈا ہؤے تاں اوہ پانی نال دھوتا جاؤے۔
13
. اتے جدوں جریان والا چنگا ہو جاؤے تاں اوہدے چنگے ہؤن تھوں ست دیہاڑے گِنے جاؤن۔ اوہ آپنے کپڑے دھؤے اتے سجرے پانی نال نھائے تاں اوہ پاک ہؤے گا۔
14
. اتے اٹھویں دیہاڑے دو گھگیاں یاں کبوتر دے دو بچے لے کے حضوری دے تنبو دے بوہے اُتے خداوند دے ساہمنے آؤے اتے اوہناں نوں کاہن دے ہتھ حوالے کرے۔
15
. تاں کاہن اوہناں وچوں اک نوں خطا دی قربانی اتے دوجے نوں سوختنی قربانی کرے۔ اتے خداوند دے ساہمنے اوہدے جوگی اوہدے جریان دا کفارہ دؤے۔
16
. جیکر کسے بندے دا بی وگے تاں اوہ پنا سارا جُسہ پانی نال دھؤے اتے دھمی ویلے تیکر ناپاک رہؤے گا۔
17
. اتے جہڑے کپڑے یاں چمڑے اُتے اوہدے وچوں کجھ لگ جاؤے، تاں اوہ پانی نال دھوتا جاؤے، اتے دھمی ویلے تیکر ناپاک رہؤے۔
18
. جیکر کوئی بندہ کسے بی بی نال ہم بستری کرےاتے وگ جاؤے، تاں اوہدے وانگ پانی نال نھائے اتے دونویں دھمی ویلے تیکر ناپاک ہؤن گے۔
19
. جدوں مہواری ویلے اُتے بی بی دے جُسے وچوں لہؤ وگے تاں اوہ ست دیہاڑے تیکر آپنے حیض وچ وکھ کیتی جاؤے۔ اتے جہڑا وی اوہنوں ہتھ لاؤے دھمی ویلے تیکر ناپاک رہؤے۔
20
. اتے سبھے کجھ جہدے اُتے اوہ آپنے حیض وچ سونویں، ناپاک ہؤے گا اتے سبھے کجھ جہدے اُتے اوہ بہؤے، ناپاک ہؤے گا۔
21
. اتے جہڑا وی اوہدے بسترے نوں ہتھ لاؤے، آپنے کپڑے دھؤے اتے پانی نال نھائے اتے دھمی ویلے تیکر ناپاک رہؤے۔
22
. اتے جہڑا وی کسے اجیہی شئے نوں ہتھ لاؤے، جہدے اُتے اوہ بئٹھی سی، آپنے کپڑے دھؤے اتے پانی نال نھائے اتے دھمی ویلے تیکر ناپاک رہؤے۔
23
. جیکر اوہدے بسترے اُتے، جہدے اُتے اوہ بئٹھی اے، کوئی ہور شئے پئھی ہؤے، تاں جہڑا اوہنوں ہتھ لاؤے، دھمی ویلے تیکر ناپاک رہؤے گا۔
24
. جیکر کوئی بندہ اوہدے نال ہم بستری کرے، جدوں پئی اوہنوں حیض آ رہئیا اے، تاں اوہ ست دیہاڑے تیکر ناپاک رہؤے گا۔ اتے ہر بسترا جہدے اُتے اوہ سونویں، ناپاک ہؤے گا۔
25
. جیکر کسے بی بی نوں اوہدے حیض ویلے تھوں وکھ چوکھے دیہاڑے تیکر لہؤ آؤے یاں اوہدے مگروں آؤے تاں اوہ آپنی نجاست دے وگن دے سبھے دیہاڑے وچ آپنے حیض دے دیہاڑیاں وانگ ہؤے گی۔ اوہ ناپاک ہؤے گی۔
26
. اتے ہر بسترا، جہدے اُتے اوہ آپنے سیلان دے دیہاڑے وچ سونویں، اوہدے حیض دے بسترے وانگ ہؤے گا۔ اتے جہدے اُتے اوہ بہؤے، اوہدے حیض دی نجاست وانگ ناپاک ہؤے گا۔
27
. اتے جہڑا وی اوہدے وچوں کسے شئے نوں ہتھ لاؤے ناپاک رہؤے گا۔
28
. اتے جدوں اوہ آپنے سیلان تھوں پاک ہؤے تاں آپنے جوگی ست دیہاڑے گِنے۔ ایس تھوں مگروں اوہ پاک ہؤے گی۔
29
. اتے اٹھویں دیہاڑے اوہ دو گھگیاں یاں کبوتر دے دو بچے لؤے اتے اوہناں نوں کاہن کول حضوری دے تنبو دے بوہے اُتے لئیاؤے۔
30
. تاں کاہن اوہناں وچوں اک نوں خطا دی قربانی اتے دوجے نوں سوختنی قربانی کرے۔ اتے کاہن اوہدے سیلان دی نجاست دا کفارہ خداوند اگے دؤے۔
31
. اخیر تسی بنی اسرائیل نوں اوہناں دی نجاست تھوں پرہیز کراؤ۔ تاں جو اوہ آپنی نجاست وچ نا مرن۔ جیس ویلے پئی اوہ میرے تنبو نوں جہڑا اوہناں دے وچ اے، ناپاک نا کرن۔
32
. ایہو ای شریعت اوہدے جوگی اے، جنہوں جریان ہؤے۔ اتے جہدا بی وگدا ہؤے۔ ایہناں دونہواں تھوں اوہ ناپاک ہوندا اے۔
33
. اتے اوس بی بی جوگی جنہوں حیض اے، اتے بندے یاں بی بی جوگی جنہوں سیلان اے، اتے اوس بندے جوگی جہڑا ناپاک بی بی نال ہم بستر ہوندا اے۔