1
. اتے خداوند نے موسیٰ نال کلام کر کے آکھیا۔
2
. پئی کوڑھی جوگی اوہدی طہارت دے دیہاڑے دی ایہہ شریعت اے۔ اوہ کاہن دے کول لئیایا جاؤے۔
3
. تد کاہن تنبو احاطے وچوں باہر جاؤے اتے جد اوہ ویکھے پئی کوڑھی دراصل کوڑھ دی بیماری تھوں چنگا ہو گئیا اے۔
4
. تاں کاہن حکم کرے پئی جہدی طہارت ہؤن والی اے، اوہدے جوگی دو جیوندیاں چِڑیاں اتے دیودار دی لکڑی اتے قرمز اتے زوفا لئیاؤن۔
5
. اتے کاہن حکم کرے پئی اک چڑی مٹی دے بھانڈے وچ جیوندی پانی اُتے ذبح کیتی جاؤے۔
6
. اتے اوہ جیوندی چڑی اتے دیودار دی لکڑی اتے قرمز اتے زوفا نوں لؤے اتے اوہناں نوں جیوندی چڑی سنھے اوس چڑی دے لہؤ وچ جہڑی جیوندی پانی اُتے ذبح کیتی گئی، ڈوبے۔
7
. اتے جہدی کوڑھ تھوں طہارت ہون والی اے، ست واری چھڑکے اتے اوہنوں پاک کرے۔ اتے جیوندی چڑی نوں میدان ول چھڈ دؤے۔
8
. تد اوہ جہدی طہارت کیتی جاندی اے، آپنے کپڑے دھؤے اتے آپنے جُسے دے سبھے وال مُنوائے اتے پانی نال نھاؤے تاں اوہ پاک ہؤے گا۔ ایس تھوں مگروں اوہ تنبو احاطے وچ آؤے پر ست دیہاڑے تیکر آپنے تنبو تھوں باہر رہؤے۔
9
. اتے ستویں دیہاڑے آپنے سِر دے سبھے وال اتے آپنی داڑھی اتے آپنے بھروَٹے اتے آپنے سبھے جُسے دے وال مُنوائے اتے آپنے کپڑے دھؤے۔ تاں اوہ پاک ہو جاؤے گا۔
10
. اتے اٹھویں دیہاڑے اوہ دو بے عیب نَر میمنے اتے اک مادہ میمنا اک سال دے بے عیب ۔ اتے نذر دی قربانی جوگی ایفا دے ترَے دسویں حصے میدے تیل وچ ملے ہوئے اتے اک ترے پیمانا تیل لئیائے۔
11
. اتے پاک کرن والا کاہن اوہنوں، جہدی طہارت کیتی جاندی اے، خداوند دے ساہمنے حضوری دے تنبو دے بوہے کول لئیاؤے۔
12
. اتے کاہن اک نَر میمنا تقصیر دی قربانی جوگی تیل دے پیمانے سنھے چاڑھے۔ اتے اوہناں نوں ہلاؤن دی قربانی جوگی خداوند دے ساہمنے ہلاؤے۔
13
. اتے اوس میمنے نون پاک تھاں وچ جتھے پئی خطا دی قربانی اتے سوختنی قربانی ذبح کیتی جاندی اے، ذبح کرے۔ کیون جو ایہہ تقصیر دی قربانی خطا دی قربانی وانگ کاہن دی اے۔ ایہہ چوکھی پاک اے۔
14
. تد تقصیر دی قربانی دے لہؤ وچوں کجھ لؤے اتے اوس شخص دے، جہدی طہارت کیتی جاندی اے، سجے کن دی چُنج اُتے اتے سجے ہتھ دے انگوٹھے اُتے اتے سجے پیر دے انگوٹھے اُتے لاؤے۔
15
. تد اوہ اوس تیل دے پیمانے وچوں کجھ لؤے، اتے آپنے کھبے ہتھ دی تلی اُتے روڑھے۔
16
. تد اوہ اوس تیل وچ جہڑا اوہدی کبھی تلی اُتے اے، آپنی سجی انگلی ڈوبے اتے اوہدے وچوں خداوند اگے ست واری آپنی انگلی نال چھڑکے۔
17
. تد باقی تیل نوں جہڑا وہدی تلی اُتے اے، لؤے اتے اوس شخص دے جہدی طہارت کیتی جاندی اے، سجے کن دی چُنج اُتے اتے اوہدے سجے ہتھ دے انگوٹھے اُتے اتے اوہدے سجے پیر دے انگوٹھے اُتے تقصیر دی قربانی دے لہؤ اُتے لاؤے۔
18
. اتے باقی تیل جہڑا کاہن دی تلی اُتے اے، طہارت کیتے جاؤن والے شخص دے سِر اُتے لُدے۔ اتے خداوند دے ساہمنے اوہدا کفارہ دؤے۔
19
. تد کاہن خطا دی قربانی چاڑھے۔ اتے اوہدی ناپاکی جوگی جہدی طہارت کیتی جاندی اے، کفارہ دؤے۔ تد سوختنی قربانی نوں ذبح کرے۔
20
. اتے کاہن سوختنی قربانی اتے نذر دی قربانی مذبحے اُتے چاڑھے۔ اتے کاہن اوہدے جوگی کفارہ دؤے۔ تد اوہ پاک ہو جاؤے گا۔
21
. اتے جیکر اوہ ماتڑ ہؤے اتے اینی توفیق نا رکھدا ہؤے۔ تاں اوہ اک میمنا تقصیر دی قربانی دا ہلاؤن جوگی لئیاؤے تاں جو اوہدا کفارہ دِتا جاؤے۔ اتے نذر دی قربانی جوگی ایفا دا دسواں حصا میدے نوں تیل وچ ملئیا ہویا اتے اک پیمانہ تیل۔
22
. اتے دو گھگیاں یاں کبوتر دے دو بچے آپنی توفیق دے موافق لؤے۔ اک اوہناں وچوں خطا دی قربانی جوگی اتے دوجا سوختنی قربانی جوگی۔
23
. اوہناں نوں آپنی طہارت دے اٹھویں دیہاڑے کاہن کول حضوری دے تنبو دے بوہے اُتے خداوند دے ساہمنے لئیاؤے۔
24
. د کاہن تقصیر دی قربانی دا میمنا اتے پیمانہ تیل دا لؤے اتے کاہن اوہناں دونواں نوں ہلاؤن دی قربانی جوگی خداوند دے ساہمنے لئیاؤے۔
25
. فیر اوہ تقصیر دی قربانی دے میمنے نوں ذبح کرے۔ اتے اوہدے لہؤ وچوں لے کے اوس شخص دے، جہدی طہارت کیتی جاندی اے، سجے کن دی چُنج اُتے اتے اتے سجے ہتھ دے انگوٹھے اُتے اتے سجے پیر دے انگوٹھے اُتے لاؤے۔
26
. اتے کاہن اوس تیل وچوں کجھ آپنی سجی تلی اُتے لُدے۔
27
. اتے اوس تیل وچوں جہڑا اوہدی کھبی تلی اُتے اے، اوہ آپنی سجی انگلی نال ست واری خداوند دے ساہمنے چھڑکے۔
28
. اتے اوس تیل وچوں جہڑا اوہدی تلی اُتے باقی اے، طہارت کیتے جاؤن والے شخص دے سجے کن دی چُنج اُتے اتے اوہدے سجے ہتھ دے انگوتھے اُتے اتے اوہدے سجے پیر دے انگوٹھے اُتے تقصیر دی قربانی دے لہؤ اُتے لاؤے۔
29
. اتے باقی تیل جہڑا کاہن دی تلی وچ اے، طہارت کیتے جاؤن والے شخص دے سِر اُتے لُدے۔ تاں جو اوہدے جوگی خداوند دے ساہمنے کفارہ دؤے۔
30
. تد اوہ گھگیاں وچوں اک یاں کبوتر دے بچیاں وچون اک، جہدای اوہنوں توفیق ہؤے، کرے۔
31
. اوہو ای جہدی اوہنوں توفیق ہوئی، نذر دی قربانی سنھے اک خطا دی قربانی جوگی اتے دوجا سوختنی قربانی جوگی ہؤے گا۔ اتے کاہن طہارت کیتے جاؤن والے شخص دا خداوند دے ساہمنے کفارہ دؤے۔
32
. ایہہ شریعت اوہدے جوگی اے، جنہوں کوڑھ دی بیماری ہؤے، اتے جنہون طہارت دِیاں مانگاں دی توفیق نئیں۔
33
. اتے خداوند نے موسیٰ نال کلام کر کے آکھیا۔
34
. جد تسی کنعن دے دیس وچ، جہڑا میں تہاڈی ملکیت جوگی دؤان گا، وڑو، اتے میں تہاڈی ملکیت دے کسے گھر اُتے کوڑھ دی بلا لئیاؤاں۔
35
. تاں جہدا گھر اے، اوہ کاہن کول آ کے خبر دؤے، اتے آکھے پئی مینوں اجیہا معلوم ہوندا اے پئی گھر وچ کجھ بلا جیہی اے۔
36
. تد کاہن حکم کرے پئی اوس گھر نوں، ایس تھوں پہلوں پئی بلا نوں ویکھن جوگی اوہ اوس گھر وچ وڑے، خالی کرن۔ تاں جو سبھے سامان جہڑا گھر وچ اے، ناپاک نا ہو جاؤے اتے اوس تھوں مگروں اوہدے گھر نوں ویکھن جوگی اوہدے وچ وڑے۔
37
. اتے اوس بلا نوں ویکھے اتے جیکر ویکھے پئی اوہ بلا اوس گھر دی کندھاں وچ ہریالگی یاں لالگی دی پکی لکیراں وانگ اے، اتے کندھ وچ سطح دے وچ نظریں آؤندی اے۔
38
. تاں کاہن گھر وچوں باہر نکل کے گھر دے بوہے اُتے جاؤۓ اتے گھر نوں ست دیہاڑے لئی بند کر دؤے۔
39
. اتے ستویں دیہاڑے فیر آن کے اوہنوں ویکھے۔ جیکر اوہ بلا گھر دِیاں کندھاں اُتے کھِلری ہوئی نظریں آؤے۔
40
. تاں کاہن حکم دؤے پئی اوہناں پتھراں نوں، جنہاں وچ اوہ بلا اے، کڈھ کے شہر تھوں باہر کسے ناپاک تھاں وچ سُٹ دیئن۔
41
. فیر اوہ اوس گھر نوں اندرو اندری چواں پاسیؤں کھروچوائے اتے اوس کھروچی ہوئی مٹی نوں شہر دے باہر کسے ناپاک تھاں وچ سُٹن۔
42
. اتے اوہ اوہناں پتھراں دی تھاں ہور پتھر لئیا کے لاؤن اتے کاہن سجرے گارے نال اوس گھر دی استرکاری کراؤے۔
43
. اتے جیکر پتھراں دے کڈھے جاؤن اتے اوس گھر دے کھرچے اتے استرکاری کرائے جاؤں مگروں وی اوہ بلا فیر آ جاؤے اتے اوس گھر وچ پھُٹ پؤے۔
44
. تاں کاہن اندر وڑ کے ویکھے اتے جیکر ویکھے پئی اوہ بلا گھر وچ کھِلر گئی اے تاں اوس گھر وچ کھا جاؤن والا کوڑھ اے۔ اوہ ناپاک اے۔
45
. تد اوہ اوس گھر نوں اوہدے پتھراں اتے لکڑیاں اتے اوہدی سبھے مٹی نوں ڈیگ دؤے، اتے اوہ اوہناں نوں شہر دے باہر کڈھ کے کسے ناپاک تھاں وچ لیجاؤے۔
46
. ایس تھوں وکھ پئی جہڑا اوس گھر دے بند کیتے جاؤں دے دیہاڑیاں وچ اوہدے اندر وڑے تاں اوہ دھمی ویلے تیکر ناپاک رہؤے گا۔
47
. اتے جہڑا اوس گھر وچ سونؤے، اوہ آپنے کپڑے دھوؤے، اتے جہڑا اوس گھر وچ کجھ کھاؤے اوہ وی آپنے کپڑے دھوؤے۔
48
. اتے جیکر کاہن اندر وڑ کے ویکھے پئی گھر دی استرکاری دے مگروں اوہ بلا اوس گھر وچ نئیں کھِلری تاں اوہ اوس گھر نوں پاک مِتھے۔ کیوں جو اوہ بلا دور ہو گئی۔
49
. اتے اوہ اوس گھر نوں پاک مِتھن جوگی دو پکھیرو اتے دیودار دی لکڑی اتے لال کپڑا اتے زوفا لؤے۔
50
. اتے اوہ اوہناں پکھیرؤان وچوں اک نوں مٹی دے کسے بھانڈے وچ وگدے ہوئے پانی اُتے ذبح کرے۔
51
. فیر اوہ دیودار دی لکڑی اتے زوفا اتے لال کپڑے اتے اوس جیوندے پکھیرو نوں لے کے اوہناں نوں ذبح کیتے ہوئے پکھیرو دے لہؤ وچ اتے اوس وگدے ہوئے پانی وچ غوطا دؤے اتے ست واری اوس گھر اُتے چھڑکے۔
52
. اتے اوہ اوس پکھیرو دے لہؤ نال وگدے ہوئے پانی اتے جیوندے پکھیرو اتے دیودار دی لکڑی اتے زوفا اتے لال کپڑے نال اوس گھر نوں پاک کرے۔
53
. اتے اوس جیوندے پکھیرو نوں شہر دے کھلے میدان وچ چھڈ دؤے۔ انج اوہ گھر جوگی کفارہ دؤے تاں اوہ پاک مِتھیا جاؤۓ گا۔
54
. کوڑھ دی ہر قسم دی بلا دے اتے سعفا جوگی۔
55
. اتے کپڑے اتے گھر دے کوڑھ جوگی۔
56
. اتے ورم اتے پپڑی اتے چمکیلے داغ جوگی ایہہ شریعت اے۔
57
. تاں جو دسیا جاؤۓ پئی کدوں اوہ ناپاک اتے کدوں پاک مِتھے جاؤن۔ کوڑھ جوگی شریعت ایہو ای اے۔