¹ ۔ تَدّ الیفز تیما نیؔ نے جواب دِتا تے آکھیا ۔ ² ۔ کیہ کوئی بندہ خُدا نُوں نفع دے سکدا اے ؟ بناں شَک عقلمند اَپنے ای کَم آؤندااے ۔ ³ ۔ جے تُوں نیک ایں تے خُدا نُوں کاہدا نفع اے ۔ یا تُوں اَپنیاں راہواں نُوں پاک رکھیں ۔ تے خُدا نُوں کیہ فیدا اے ؟ ⁴ ۔ کیہ اوہ تیری خُدا ترسی دے پاروں تینوں جھِڑکدا اے ۔ یا تینوں عدالت چہ لیاؤندا اے ؟ ⁵ ۔کیہ تیری شرارت وَڈی نئیں ۔ تیری بدی بے اَنت نئیں اے؟ ⁶ ۔ کیوں جو تُوں اَپنے بھرا دا مال بے سبب گِروی رکھیا تے ننگیاں دے کَپڑے کھو لئے ۔ ⁷ ۔ تُوں ترہائے نُوں پانی نئیں پیایا ۔ تے بھُکھے توں اَپنی روٹی ڈھک لئی ۔ ⁸ ۔ جیہڑا بندہ تگڑا ہُندا اے ۔ زمین اوہدے ای قبضے چہ ہُندی اے ۔ تے عزت والا بندہ ای اوہدے چہ وَسدا اے ۔ ⁹ ۔ تُوں رنڈیاں نُوں خالی گھل دِتا ۔ تے میٹراں دیاں باہنواں بھن دِتیاں نیں ۔ ¹⁰ ۔ ایسے لئی تیرے چواں پاسے پھا نئیں ۔ ناں وِسن والا خوف تینوں دُکھ دیندا اے ۔ ¹¹ ۔ یا ایہو جیہا ہنیرا جِہنوں تُوں ویکھ نئیں سکدا ۔ تے پانی دا ہَڑ تینوں لُکا لیندا اے ۔ ¹² ۔ کیہ اسمان دی اُچیائی تے خُدا نئیں تے اُچے تاریاں تے نظر نئیں کردا؟ ¹³ ۔ فیر تُوں آکھنا ایں پئی خُدا کیہ جاندا اے ؟ کیہ اوہ ہنیرے چوں عدالت کرے گا ؟ ¹⁴ ۔ تے بدّلاوہدے پردے نیں تے اوہ ویکھ نئیں سکدا ۔ اوہ اسمان دے چویں پاسے پھِردا اے۔ ¹⁵ ۔ کیہ تُوں اَپنی پُرانی راہ تے ٹُردا رئیں گا ؟ جِہدے تے شرارت کرن والے ٹُردے رہے نیں۔ ¹⁶ ۔ جیہڑے اَپنے ویلے توں پیلوں چُک لئے گئے ۔ جِہدوں ہَڑ اوہناں دیاں نیاں نُوں روہڑ کے لے گیا ۔ ¹⁷ ۔ جِہناں نے خُدا نُوں آکھیا ۔ ساڈے کولوں ٹُر جا ۔ تے قادرِ مُطلق ساڈ ا کیہ کر سکدا اے۔ ¹⁸ ۔ فیر وی اوہنے اوہناں دے گھراں چہ چنگیاں چنگیاں شیواں بھر دِتیاں۔ تے شرات کرن والیاں دی صلاح اوہدے توں پَراں ای رئی ۔ ¹⁹ ۔ صادق ویکھن گے تے خُوش ہون گے ۔ تے بے گُناہ اوہناں دا ہاسا اُڈاندے نیں ۔ ²⁰ ۔ اوہ آہندے نیں ویکھ ۔ ساڈے ویری مُک گئے نیں ۔ سگون بَچیاں ہوئیاں نُوں اَگ کھا گئی ۔ ²¹ ۔ ایس لئی اوہدے نیڑے رہ تے نیکی کر ۔ ایسراں کرن نال تُوں چنگیاں چنگیاں شیواں لویں گا ۔ ²² ۔ اوہدے مُونہہ دیہ شریعت نُوں مَن لے ۔ تے اوہدیاں گلاں اَپنے دِل چہ رَکھ ۔ ²³ ۔ کیوں جو تُوں قادرِ مُطلق وَل پرتیں تے فیر بحال کیِتا جاویں گا ۔ پِر توں بدی نُوں اَپنے ڈیرے توں پراں کَر دے ۔ ²⁴ ۔ تَدّ خزانیاں نُوں دھُوڑ جان تے اوفیر ؔ دے سونے نُوں وادیاں دے پتھر اں وانگوں ۔ ²⁵ ۔ تَدّ خُداوند تیرا سونا تیری چاندی دا خِزانہ ہووے گا ۔ ²⁶ ۔ اوس ویلے خُداند چہ تُوں سواد پاویں گا ۔ تے تُوں خُداوند وَل اَپنا مُونہہ کریں گا ۔ ²⁷ ۔ تے تُوں اوہدے توں دُعا کریں گا تے اوہ سُن لوے گا ۔ تے تُوں اَپنیاں مَنتّاں پُوریاں کریں گا ۔ ²⁸ ۔ تے جیہڑی گَل دا تُوں سوچیں گا ۔ اوہ تیری پُوری ہو جاوے گی ۔ تے تیریاں راہواں چہ لو چمکے گی ۔ ²⁹ ۔ کیوں جو جیہڑا نیوا ں ہویا اوہ اُچا کیِتا جاوے گا ۔ تے خاکسار بچایا جاوے گا ۔ ³⁰ ۔ اوہ پاپ کرن والے نُوں چھُٹکارہ دئے گا ۔ اوہ تیرے ہَتھاں دے پاک ہون دے پاروں چھُٹکارہ پاوے گا۔