¹ ۱۔ تے بناط تے پُتر یربُعام دے راج دے اٹھارویں ورّے ابیاہ ، یہوداہ دا بادشاہ بنیا۔ ² ۲۔ تے اوہنے یروشلیم وِچّ تِن ورّے راج کیِتا۔ اوہدی ماں دا ناں معکہ سی جیہڑی ابی سلوم دی دھی سی۔ ³ ۳۔ اوہنے اوہ سارےپاپ کیِتے جیہڑے اوہدے توں پہلاں اوہدے پئو کیتے سَن تے اوہ سچے دِلوں خُداوند اپنے رَبّ دا وفادار نیئں سی جیہا اوہدے پئو داود دا دِل سی ۔ ⁴ ۴۔ تاویں داود دے لئی خُداوند اوہدے خُدا نے اوہنوں یروشلیم وِچّ اِک دیوا یعنی اوہنوں اِک پُتر دِتّا جیہڑا اوہدا جانشین ہووے تے خُدا نے یروشلیم نوں ٹوری رکھیا۔ ⁵ ۵۔ کیوں جو داود نے اوہ ہو کم کیتا جیہڑا خُداوند دی نظر وِچّ چنگا سی تے اورِیّاہ حِتی دی گل دے سوا اوہنے رَبّ دے حُکماں وِچوں کِسے حُکم نوں منن وِچّ کوتاہی نہ وَرتی۔ ⁶ ۶۔ تے ابیاہ دی ساری حیاتی وِچّ رحُبعام تے یربُعام وِچّ جنگ چھڑی رہی۔ ⁷ ۷۔ کی ابیاہ دے راج دے دور دے دُجے واقعے تے سب کُجھ جیہڑا اوہنے کِیتا اوہ یہوداہ دے بادشاہواں دی تاریخ دی کتاب وِچ نیئں لکھیا ہویا؟ تے ابیاہ تے یربعُام وِچّ جنگ چھڑی رہی۔ ⁸ ۸۔ تے ابیاہ اپنے پئو دادے نال سو گیا تے داود دے شہر وِچ دفن کیتا گیا تے اوہدا پُتر آسا بادشاہ دے طور تے اوہدا جانشین ہویا۔ ⁹ ۹۔ تے اِسرائیل دے بادشاہ یربعام دے راج دے ویویں ورّ ے وِچّ آسا ، یہوداہ دا بادشاہ بنیا۔ ¹⁰ ۱۰۔ تے اکتالی ورّے یروشلیم وِچّ راج کردا رہیا۔ اوہدی دادی دا ناں معکہ سی جیہڑی ابی سلوم دی دھی سی۔ ¹¹ ۱۱۔ تے آسا نے اپنے پئو دادے وانگ اوہو ہی کیتا جیہڑا ربّ دی نظر وِچّ چنگا سی۔ ¹² ۱۲۔ اوہنے لُوطیاں نوں دیسوں کڈھ دِتّا تے اوہ سارے بُت جیہڑے اوہدے پئو دادے بنائے سَن ، دُور کر دِتا۔ ¹³ ۱۳۔ اوہنے اپنی دادی معکہ نوں وی رانی ماتا دے رُتبے توں لاہ دِتا کیوں جو اوہنے اِک نفرت جوگی مُورتی بنا ئی سی۔ آسا نے اوہ مُورتی پن دِتی تے اوہنے قِدرون دی وادی وِچّ ساڑ دِتّا۔ ¹⁴ ۱۴۔ بھاویں اوہنے اُچے تھاں نیئں سَن ڈھائے تاویں آسا دا دِل کُل حیاتی رَبّ نال جُڑیا رہیا۔ ¹⁵ ۱۵۔ تے اوہ اوس چاندے تے سونے نوں تے اوہناں شیواں نوں جیہڑیاں اوہنے تے اوہدے پئو نے چڑھاہیاں سَن ، خُدا دے گھر وِچّ لے آیا۔ ¹⁶ ۱۶۔ آسا تے اِسرائیل دا بادشاہ بعشا دونیویں اپنی بادشاہی وِچّ جنگ کردے رہے۔ ¹⁷ ۱۷۔ تے اِسرائیل دے بادشاہ بعشا نے یہوداہ تے چڑھائی کیتی تے را مہ نوں گھیرے وِچ لے لیا تاں جو کوئی نہ تے دیس چھڈسکے یاں یہوداہ وِچّ وڑھ سکے۔ ¹⁸ ۱۸۔ تد آسا نے اوہ سونا تے چاندی جیہڑا خُدا دے گھر وِچّ تے اوہدے اپنے محل وِچّ باقی رہ گیا سی ، لیا تے اپنے بندیاں نوں دے حوالے کیِتا تے اوہناں نوں ارام دے بادشاہ بِن ہَددَ دے کول جیہڑا حزیون دے پُتر طابرِمّون دا پُتر سی تے دمشق وِچّ راج کردا سی ، گھلیا۔ ¹⁹ ۱۹۔ تے آکھوا گھلیا پئی تیرے میرے وِچّ طے ہو جاوے جویں ساڈے پئواں وِچّ سی۔ تے ویکھ میں تینوں چاندی تے سونے دے ہدیے گھل رہیا ہاں۔ سوہُن تُوں اِسرائیل بادشاہ بعشا نال معاہدہ مُکا دے تاں جو اوں میریاں حداں وِچّوں ٹُر جائے۔ ²⁰ ۲۰۔ بِن ہَددَ نے آسا بادشاہ دی گل من لئی تے اپنے لشکر دے سرداراں نوں اِسرائیلی قصبیاں تے چڑھائی کرن لئی گھلیا۔ اوہنے نفتالی دے علاوہ عّیون، دان، ابیل بیت معکہ تے کُل کنّرت نوں فتح کر لیا۔ ²¹ ۲۱۔ جد بعشا نے سنیا تے اوہنے رامہ اُسارن دا کم بند کر دِتا تے تِرضہ توں پِچھاں ہٹ گیا۔ ²² ۲۲۔ فیر آسا بادشاہ نے کُل یہوداہ نوں حُکم جاری کیتا جَس توں کسے نوں چُھوٹ نیئں سی ۔ اوہ اوہناں پتھراں تے لکڑی نوں جیہڑی بادشاہ اوتھے وَرَت رہیا سی ، رامہ توں چُک کے لے گئے تے اوہدے نال آسا بادشاہ نے بنیمین دی جُوہ وِچّ جِبع تے مِصفاہ اُسارے۔ ²³ ۲۳۔ کیہ آسا بادشاہ دے راج دے دِناں باقی واقعے، اوہدے وڈے کم ، سب کُجھ جو اوہنے کیِتا تے اوہ شہر جیہڑے اوہنے اُسارے، اوہ یہوداہ دے بادشاہوں دی تواریخ دی کِتاب وِچّ نئیں لکھے ہوئے؟ پَر وڈھیپے وِچّ اوہنوں پیر دا روگ لے کے بہہ گیا۔ ²⁴ ۲۴۔ تے آسا اپنے پئو دادے نال سوں گیا تے اوہ اوہناں نال اپنے پئو داود دے شہر وِچّ دفن ہویا۔ تے اوہدا پُتر یُہوسفط بادشاہ دے طور تےاوہدا جان نشین ہویا۔ ²⁵ ۲۵۔ تے یہوداہ دے بادشاہ ، آسا دے راج دے دُجے ورّے وِچّ یربُعام دا پُتر ندب ، اِسرائیل دا بادشاہ بنیا تے اوہنے اِسرائیل تے دو ورّے راج کِیتا۔ ²⁶ ۲۶۔ اوہنے خُدا دی نظر وِچ بھَیڑ کیِتا تے اپنے پئو دی راہ چُن کے اوہدے اوس گناہ دا پاپی ہویا جِدے نال اوہنے اِسرائیل توں گناہ کروایا سی۔ ²⁷ ۲۷۔ تے اِشکار دے ٹبر دے بعشا بِن اخیاہ نے اوہدے خلاف مَتے پکائی تے اوہنوں فِلستیاں دے قصبے جبتّون وِچّ اوس ویلے قتل کر دِتا جدوں ندب تے کُل اِسرائیلیاں جبتّون نوں گھیریا ہویا سی۔ ²⁸ ۲۸۔ بعشا نے ند ب نوں یہوداہ دے بادشاہ آسادے راج دے تَجے ورّے وِچ قتل کیتا تے اوہدے تھاں بادشاہ بن بیٹھا۔ ²⁹ ۲۹۔ بادشاہی اپنے ہتھ کردیاں ہی اوہنے یربُعام دے کُل ٹبر مار مُکایا تے جویں رَبّ نے اپنے بندے اخیاہ سَیلونی دے راہیں فرمایا سی اوہنے یربُعام دے ٹبر دا ککھ نہ چھڈیا سگھوں ساریاں نوں مار مُکایا۔ ³⁰ ۳۰۔ ایہدی وجہ یربُعام دے اوہ پاپ سَن جیہڑے یربعام نے آپ کیتے تے نالےاِسرائیل کولوں کروائے۔ اینج اوہنے خُداوند اِسرائیل دے ربّ نوں کوڑ چڑھائی سی۔ ³¹ ۳۱۔ کیہ ندب دا باقی حال تے جو کُجھ اوہنے کیِتا اوہ اِسرائیل دے بادشاہواں دی تواریخ دی کِتاب وِچّ لکھیا نیئں ہویا؟ ³² ۳۲۔ تے آسا تے اِسرائیل دے بادشاہ بعشا دے وِچّ اوہناں دے راج دے دِناں وِچّ سدا جنگ چِھڑی رہی۔ ³³ ۳۳۔ یہوداہ دے بادشاہ آسادے تِجے ورّے وِچّ اخیاہ دا پُتر بعشا ، تِرضہ وِچّ کُل اِسرائیل دا بادشاہ بن گیا تے اوہنے چَوی ورّے راج کیتا۔ ³⁴ ۳۴۔ تے اوہنے ربّ دی نظر وِچّ بدی کیتی کیوں جو اوہ یربُعام دی راہ تے چلیا تے اوہدے گناہ دی راہ لئی جِدے توں اوہنے اِسرائیل کولوں گُناہ کرایا۔