¹ ۱۔ اوس ویلے یربُعام دا پُتر ابیاہ بیمار ہوگیا۔ ² ۲۔ تے یربعام نے اپنی بیوی نوں آکھیا پئی جا کے اپنا بھیس وٹا لے تاں جو کوئی نہ پچھانے پئی تُوں یربُعام دی بیوی ایں تے فیر سیلا ٹُر جا کیوں جو اخیاہ نبی جنہے مینوں دَسیا سی پئی میں ایس قوم دا بادشاہ بنا ںگا، اوتھے وے۔ ³ ۳۔ تے دَس روٹیاں تے کُجھ ٹِکیاں تے اِک مرتبان شہر دا اپنے نال لے کے اوہدے کول جا۔ اوہ تینوں دَسے گا پئی مُنڈے دا کی حال ہووے گا۔ ⁴ ۴۔ یربُعام دی بیوی نے اینج ہی کیتا جِویں اوہنے آکھیا سی تے سَیلا وِچّ اخیاہ دے گھر جا اَپڑی ۔ تے اخیاہ ویکھ نیئں سی سکداکیوں جو وڈھّیپے دے سببوں اوہدیاں اِکھاں ٹُر گیا سی۔ ⁵ ۵۔ پَر خُداوند نے اَخیاہ نوں پہلے ہی دَس دِتا سی پئی یربُعام دی بیوی اپنے بیمار پُتر بارے پُوچھن لئی تیرے کول آ رہی اے، تُوں ایہنوں ایہہ آکھیں! جد اوہ آئی گی تے اوہ جھوٹی مانی اپنے آپ نوں کوئی دُجی زنانی دسے گی۔ ⁶ ۶۔ سو جد اخیاہ نے بُوہے تے اوہدے پیراں دا کھڑاک سُنیا تے اوہنے آکھیا پئی یربُعام دیئے بیوی اےاندر لنگ آ۔ تُوں بھیس کیوں وِٹّایا ہویا اے؟ کیوں جے میں پیڑی خبر نال تیری ہی کول گھلیا گیا واں۔ ⁷ ۷۔ جا تے یربُبعام نوں دَس پئی خُداوند اسرائیل دا رَبّ اینج فرماندا اےپئی میں تینوں عام لوکاںوِچوں لے کے سرفرازی بخشی تے اپنی قوم اِسرائیل تے بادشاہ لایا۔ ⁸ ۸۔ میں داود دے ٹبر توں بادشاہی کھوئی تے تینوں دِتی ۔ پَر تُوں میرے بندے داود وانگ نہ نکلیا جنہے میرے حُکم مَنےتے اپنے سارے دِل نال میرے پِچھے چلیا یعنی بس اوہ ہی کیتا جیہڑا میری نظر وِچّ ٹھیک سی۔ ⁹ ۹۔ پَر توُں اوہناں ساریاں نالوں جیہڑے تیرے توں پہلاں ہوئے ودھ کے بدی کیتی تے اپنے لئی اوپرے دیوتا یعنی ڈھالے ہوے بُت بنا لَئے۔ تُوں مینوں کَوڑ چڑھائی اے تے مینوں اُکا بُھلا دِتا۔ ¹⁰ ۱۰۔ ایس سببوں میں یربُعام دے ٹبر تے مُصیبت لے آن والا ہاں تے میں اِسرائیل دے باقی لوکاں نوں یربُعام دے ٹبر توں وکھ کر دیاں گا، بھاویں اوہ گولا ہوئے تے بھاویں آزاد۔ تے میں یربُعام دے گھر دا صفایا کر دیاں گا تے اوہنوں گوہے وانگ ساڑ کے سوا کر دیاں گا۔ ¹¹ ۱۱۔ تے یربُعام نال جُڑے ہوئے لوک جیہڑے شہر وِچ مرن گے اوہناں نوں کُتے کھا ن گے تے جیہڑے میدانے مَرن گے اوہناں نوں ہوا دے پنجھی چَٹ کر جان گے۔ خُداوند نے فرمایا اے! ¹² ۱۲۔ تیرے لئی بس اینا ہی اےپئی تُوں گھر واپس ٹُر جا۔ تے جدوں تُوں شہروِچّ پیر پاویں گی تو اوہ مُنڈا مَر جاوے گا۔ ¹³ ۱۳۔ تے کُل اَسرائیل اوہنوں روئے گا تے اوہنوں دفنائے گا تے یربُعام دی اولاد وِچّوں بس اوہ ہو دفن ہووے گا کیوں جو یربُعام دے گھر وِچّ اکلا اوہ ہو ہی اے جس وِچّ اِسرائیل دے رَبّ نے کوئی چنگی گل ویکھی ۔ ¹⁴ ۱۴۔ تے آپ ربّ ہی اِسرائیل لئی بادشاہ برپا کرے گا جیہڑا یربعام دے ٹبر دا صفایا کر دیوے گا۔ اوہ دیہاڑا تے اوہ ویلا آاَپڑیا اے۔ ¹⁵ ۱۵۔ خُدا اِسرائیل نوں اینج مارے گا جویں پانی چہ کانا ہلایا جاندا اے۔ تے اوہ اِسرائیل نوں اوس سوہنے دیس وِچوّں جیہڑا اوہنے اوہناں دے پئو دادے نوں دِتا سی ، جڑوں پُٹ دے گا تے اوہناں نوں فرات دے دریا دے پار تِتر بِتر کر دیوے گا کیوں جو اوہناں اپنے لئی یسیرتاں بنا کے خُدا نوں کوڑ چڑھائی اے۔ ¹⁶ ۱۶۔ تے اوہ اِسرائیل نوں یربُعام دے اوہناں گُناہاں دے سببوں چھڈ دیوے گا جیہڑے اوہنے آپ کِیتے تے نالے اِسرائیل کولوں کروائے۔ ¹⁷ ۱۷۔ فیر یربُعام دی بیوی اُٹھ کے روانہ ہوئی تے ترضہ وِچّ آئی تے جویں ہی اوہنے گھر دی بھُرم وِچ پیر پایا ، اوہ مُنڈا مَر گیا۔ ¹⁸ ۱۸۔ تے جویں خُداوند نے اپنے بندے اخیاہ نبی دی راہیں فرمایا سی ، اوہناں نے اوہنوں دفنایا تے کُل اسرائیل اوہنے رویا۔ ¹⁹ ۱۹۔ تے یربُعام دے راج دے دور دے دُجے واقعے ، اوہدیاں جنگاں تے اوہنے کیویں راج کیتا، اِسرائیل دے بادشاہاں دی تاریخ دی کتاب وِچّ لکھے ہوئے نیں۔ ²⁰ ۲۰۔ اوہنے بائی ورّے راج کیتا تے فیر اوہ اپنے پئو دادے نال سَوں گیا تے اوہدا پُتر ندب بادشاہ دے طور تے اوہدی گدی تے بیٹھا۔ ²¹ ۲۱۔ تے سلیمان دا پُتر یہوداہ وِچّ بادشاہ سی ۔ جدوں اوہ بادشاہ بنیا تے اوہ اکتالی وریاں دا سی تے اوہنے یروشلیم وِچّ یعنی اوس شہر وِچّ جنہوں خُدا نے اِسرائیل دے کُل قبیلیاں وِچوں چُنیا تاں جو اوتھے اپنا ناں رکھے، ستراں ورّے راج کیتا۔ اوہدی ماں دا نعمہ سی جیہڑی اِک عمُّونی رَنّ سی ۔ ²² ۲۲۔ تے یہوداہ نے خُدا دی نظر وِچّ بدی کیتی تے اوہناں گناہواں دے سببوں جیہڑے اوہناں دے پئو دادے دے گناہواں توں وی ڈاڈھے سَن ، اوہناں خُدا دے غُصے نوں پڑکایا۔ ²³ ۲۳۔ اوہناں اپنے لئی ہر اُچی پہاڑی تے ہر ہرے بھرے رُکھ دے تھلے ، اُچے تھاں ، پاک پتھر تے یسیرتاں قائم کیتیاں۔ ²⁴ ۲۴۔ تے اوس دیس وِچ لُوطی وی سَن جیہڑے زیارتاں نال جُرے ہوئے سَن تے اوہناں قوماں دے ڈاڈے نفرت جوگے کماں وِچّ رُجھے سَن۔ ایہہ اوہ قوماں سَن جنہاں نوں خُدا نے اَسرائیلیاں اَگوں کڈھ دِتا سی ۔ ²⁵ ۲۵۔ تے رحُبعام بادشاہ دے پنجویں ورّے وِچ مِصر دے بادشاہ سیِسق نے یروشلیم تے حملہ کیِتا۔ ²⁶ ۲۶۔ تے اوہ ربّ دے گھر دے تے شاہی محل دے سارے تجوریاں لُٹ کے لَے گیا جنہاں وچّ سلیمان دیاں بنایاں ہویاں سونے دیاں ڈھالاں وی سَن ۔ ²⁷ ۲۷۔ سو رحُبعام بادشاہ نے اوہناں دی تھاں پِتل دیاں ڈھالاں بنوایاں تے اوہناں نوں راکھے دستے دے سپاہیاں دے سرداراں دے سپرد کیتیاں جیہڑے شاہی محل دے بُوہے تے پَہرا دیندے سَن ۔ ²⁸ ۲۸۔ تے جدوں کدی بادشاہ خُدا دے گھر جاندا تے اوہ راکھے سپاہی اوہناں ڈھالاں نوں چُک کے ٹُردے سَن تے بعد وِچ اوہناں نوں اسلح خانے وِچّ دھر دیندے سَن۔ ²⁹ ۲۹۔ کی رحُبعام دے دور دے راج دے دُجے واقعے تے سارے کم جیہڑے اوس کیتے اوہ یہوداہ دی بادشاہواں دی تواریخ دی کتاب وِچّ لکھے نیئں ہوئے؟ ³⁰ ۳۰۔ تے رحُبعام تے یربُعام وِچّ لگاتار جنگ چھڑی رہی۔ ³¹ ۳۱۔ تے رحُبعام اپنے پئو دادے دے نال سوگیا تے داود دے شہر وِچّ اوہناں دے نال دفن ہویا۔ اوہدی ماں دا ناں نعمہ سی تے اوہ اِک عمُّونی رَنّ سی تے اوہدا پُتر ابیاہ بادشاہ دے طور تے اوہدی گدی تے بیٹھا۔