¹ ۱۔ تد حنانی دے پُتر یاہُو تے ربّ دا یہہ کلام بعشا دے خلاف اُتریا۔ ² ۲۔ پئی میں تینوں مٹی توں چُکیا تے اپنی قوم اِسرائیل دا آگُو بنایا پَر تُوں یربُعام دیاں راہواں تے چلیا تے اِسرائیل کولوں پاپ کرا کے اوہناں دے گُناہواں نال مینوں کوڑ چڑھائی۔ ³ ۳۔ سو میں بعشا تے اوہدے ٹبر دا ککھ نہ چھَڈا ں گا تے تیراٹبر نباط دے پُتر یربُعام دے ٹبر وانگ کردیاں گا۔ ⁴ ۴۔ جیہڑا بعشا دا اے، جے اوہ شہر وِچ مویا تے اوہنوں کُتے کھان گے تے جیہڑا میدابے مرے گا اوہنوں ہوا دے پنچھی چَٹ کر جان گے۔ ⁵ ۵۔ کیہ بادشاہ دے راج دے دِناں دے ہور واقعے ، جو کُجھ اوہنے کیتا تے اوہدیاں جِتاں ، اِسرائیل دے بادشاہواں دی تواریخ دی کِتاب وِچّ لکھیاں نیئں ہویاں؟ ⁶ ۶۔ بعشا اپنے پئو دادے نال سو ں گیا تے تِرضہ وِچّ دفن ہویاتے اوہدا پُتر اَیلہ بادشاہ دے طور تے اوہدا جانشین ہویا۔ ⁷ ۷۔ ایہدے علاوہ حنانی دے پُتر یاہُو دے راہیں خُداوند دا کلام بعشا تے اوہدے ٹبر دے خلاف اوس ساری بدی دے سببوں اُتریا جیہڑی اوہنے خُداوند دی نظر وِچّ کیتی سی تے اپنے کماں توں ربّ نوں کوڑ چڑھائی تے یربُعام دے ٹبر وانگ بنیا تے ایس لئی وی کہ اوہنے اوہنوں قتل کر دِتا۔ ⁸ ۸۔ تے یہوداہ دے بادشاہ آسادے چھبیویں ورّے بعشا دا پُتر اَیلہ اِسرائیل دا بادشاہ بنیا تے اوہنے تِرضہ وِچّ دو ورّے راج کیِتا۔ ⁹ ۹۔ تے زَمری نے جیہڑا اوہدے اہلکاراں وِچوں اِکے سی تے جیہڑا اَدھی فوج دا آگُو سی ، اوہدے خِلاف متے پکائی (سازش کی)۔ اوس ویلے اَیلہ تِرضہ وِچّ سی تے ارضہ دے گھر وِچّ جیہڑا تِرضہ دے محل دا وزیر سی، شراب دے نشے وِچّ دُھت سی ۔ ¹⁰ ۱۰۔ زِمری اوتھے آیا تے اوہنوں مار سُٹھیا تے یہوداہ دے بادشاہ آسا دے راج دے ستائیوں ورّے اوہنوں قتل کرکے اوہدی تھاں بادشاہ بن بیٹھا۔ ¹¹ ۱۱۔ جویں ہی اوہنے راج شُروع کیتا تے تخت تے بیٹھا، اوہنے بادشاہ دے سارے ٹبر نوں قتل کر دِتّاتے کسے مُنڈے نوں بھاویں اوہدا ساک یا بیلی ، جیوندا نہ چَھڈیا۔ ¹² ۱۲۔ اِینج زِمری نے رّب دے اوس کلام دے مطابق جیہڑا اوہنے بعشا دے خلاف یاہُو نبی دی راہیں فرمایا سی ، بعشا دے سارے ٹبر نوں مار مُکایا۔ ¹³ ۱۳۔ ایہدی وجہ اوہ سارے گُناہ سَن جیہڑا آپ بعشا تے اوہدے پُتر اَیلہ نے کیتے سَن تے نالے اَسرائیل کولوں کروائے سَن ۔ تے ایس لئی وی پئی اوہناں اپنے جھوٹے دیوتیاں دی پُوجا کرکے خُداوند اِسرائیل دے رَبّ نوں کوڑ چڑھائی۔ ¹⁴ ۱۴۔ کیہ اَیلہ دے راج دے دِناں دے دُجے واقعے تے اوہ سب جیہڑا اوس کیتا ، اوہناں دا ذکر اِسرائیل بادشاہوان دی تواریخ دی کِتاب وِچّ لکھیا نئیں؟ ¹⁵ ۱۵۔ تے یہوداہ دے بادشاہ آسا دے ستائیوں ورّے زِمری نے تِرضہ وِچّ سَت دِن راج کیتا۔ اوس ویلے فوج اِک فِلستی قصبے ، جِبتّون کول بیٹھی ہوئی سی۔ ¹⁶ ۱۶۔ تے جد چھاونی دے اسرائیلیاں نے سُنیا پئی زِمری نے بادشاہ دے خلاف سازش کرکے اوہنوں قتل کر دِتا اےتے اوہناں نے اوسے دیہاڑے چھاونی وِچ لشکر دے سردارعمری نوں اِسرائیل تے بادشاہ بنان دا ڈھن ڈھورا پھروا دِتا۔ ¹⁷ ۱۷۔ فیر عِمری تے اوہدے نال سارے اِسرائیلی جبتّوں توں پِچھاں ہٹ گئے تے اوہناں تِرضہ نوں گھیرا پا لیا۔ ¹⁸ ۱۸۔ جد زِمری نے ویکھیا پئی شہر تے قبصہ ہو گیا اےتے اوہ شاہی محل دی گڑھی وِچّ ٹُر گیا تے محل وِچّ اپنے دوالے اَگ لا لئی تے سڑ مریا۔ ¹⁹ ۱۹۔ اوہناں پاپاں دے سببوں جیہڑے اوہنے کیتےیعنی خُداوند دی نظر وِچّ بدی کرنا تے یربُعام دے راہواں تے چلنا تے اوہدے گناہ دی اوہ ہو راہ لینا جدے نال اوہنے اِسرائیل توں گُناہ کرایا سی۔ ²⁰ ۲۰۔ کیہ زِمری دے راج دے دُجے واقعےتے بغاوت جیہڑی اوہنے کیتی اوہدا ذکر اِسرائیل دے بادشاہواں دی تواریخ دی کِتاب وِچّ نیئں لکھیا ہویا؟ ²¹ ۲۱۔ فیر اِسرائیل دے لوکی دو دھڑیاں وِچّ ونڈے گئے۔ اَدھے لوکاں نے جینت دے پُتر تِبنی نوں بادشاہ بنان دی حمایت کیتی تے اَدھے عُمری مگر ٹُر پئے۔ ²² ۲۲۔ پَر عمری دے حامی جنیت دے پُتر تبنی دے حامیاں توں بوہتے ڈاڈے ثابت ہوئے سو تبنی مر گیا تے عمری بادشاہ بن گیا۔ ²³ ۲۳۔ یہوداہ دے بادشاہ آسا دے راج دے اکتیویں ورّے عُمری اِسرائیل دا بادشاہ بنیا تے اوہنے بارہ ورّے راج کیتا جنہاں چوں اوہ چھے ورّے تَرضہ دا حُکمران وی رہیا۔ ²⁴ ۲۴۔ اوہنے نے سمر توں دو قنطاراں چاندی وِچّ سامریہ دی پہاڑی مُول لے لئی تے اوس پہاڑی تے اِک شہر اُساریا تے اوہدا ناں پہاڑی پہلے مالک ، سمر دی نسبت نال سامریہ رکھا۔ ²⁵ ۲۵۔ پَر عمری نے خُدا دی نظر وِچّ بدی کیتی ۔ اوہنے اوہناں توں جیہڑے اوہدے توں پہلاں ہوئے سَن ، ودھ کے گُناہ کیتا۔ ²⁶ ۲۶۔ کیوں جو اوہنے نباط دے پُتر یربعام دیاں ساریاں راہواں تے اوہدے گُناہواں دی راہ لئی جنہاں نال اوہنے اِسرائیل توں گُناہ کرایا۔ ایس طرح اوہناں نے پانے جُھوٹے دیوتیاں دی پُوجا کرکے خُداوند اِسرائیل دے رَبّ نوں کوڑ چڑھائی۔ ²⁷ ۲۷۔ کیہ عمری دے راج دے دور ہور واقعے، اوہدے کم تے جیہڑیاں شیواں اوہنے لیاں اوہناں دا ذکر اِسرائیل دے بادشاہواں دی تواریخ دی کتاب وِچ نئیں لکھے؟ ²⁸ ۲۸۔ تے عمری اپنے پئو دادے نال سوں گیا تے سامریہ وِچّ دفنایا گیا تے اوہدا پُتر اوہدی تھاں بادشاہ بنیا۔ ²⁹ ۲۹۔ یہوداہ دے بادشاہ آسا دے اَٹھتیسویں ورّے وِچّ عُمری دا پُتر اخی اب، اِسرائیل دا بادشاہ بنیا تے اوہنے سامریہ وِچّ اسرائیل تے بائی ورّے راج کیتا۔ ³⁰ ۳۰۔ تے عُمر ی دے پُتر اخی اب نے رب دی نظر وِچّ بدی کیتی جیہڑی اوہدے توں پہلاں آن والیاں وِچوں سبھ توں چوگھی سی۔ ³¹ ۳۱۔ اوہنے بس نباط دے پُتر یربُعام ورگے گناہ کرن نوں ہی معمولی گل نیئں مجھیا سگھوں اوہنوں صَیدانیاں دے بادشاہ دی دھی ایزبِل نوں وی بیاہ لیا تے بعل دی پُوجا کرن تے اوہدے متھا ٹیکن لگ پیا۔ ³² ۳۲۔ تے اوہنے بعل جیہڑا اوہنے سامریہ وِچّ بنایا سی ، بعل لئی اِک مذبح اُساریا۔ ³³ ۳۳۔ اخی اب نے اِک یسیرت وی بنائی تے اوہنے خُداوند اِسرائیل دے رَبّ نوں کوڑ چڑھان لئی اجیہے گھناونے کم کیتے جیہڑے اِسرائیل دے بادشاہ دے سارے عملاں توں جیہڑے اوہدے توں پہلاں ہوئے سَن ، بوہتے بھیڑے سَن ۔ ³⁴ ۳۴۔ اخی اب دے دِناں وِچّ بیت ایل دے حی ایل نے یریحو نوں فیر اُساریا۔ جدون اوہنے اوہدی نینہ دھری تے اوہدا پلیٹھی دا پُتر ابرام مَر گیا تے جدوں اوہدے بھاٹک لائے تے اوہدا بیٹ کروڑی دا پُتر سجُوب مَر گیا۔ ایہہ رَبّ دے کلام دے مُطابق ہویا جیہڑا اوہنے نون دے پُتر یشوع دی راہیں فرمایا سی۔