1
۱۔ یسوع ایہ باتاں کہہ رے آسمان ݙخا آپری آنکھیں اُوکھݨ اَن کہیو۔ اے ٻاپ او گھڑی آ پُگی ری آپرے ݙیکرے رو جلال ظاہر کر تاکہ ݙیکرو وی تھارو جلال ظاہر کرے۔
2
۲۔کیانکہ تھیں اُوئے نا ہر منکھ تے اختیار ݙنو ہے تاکہ اُوئاں خاراں نا ہمیشہ ری زندگی ݙیوئے۔ جکو تے اُوئے نا ݙنی ہے۔
3
۳۔ اَن ہمیشہ ری زندگی ایہ ہے کہ او تئیں ہکھلے خچے ایشور نا اَن تھارے میلیوڑے یسوع مسیح نا اُݪکھے۔
4
۴۔مھیں دھرتی تے تھارو جلال ظاہر کریو ہا۔ مھیں اُو کام کریو جکو تھیں مناں کرݨ رے خارو ݙنو ہَتو۔
5
۵۔اَن ہمے اے ٻاپ تو مھناں آپرے نی اُوئے جلال خاں جلالی بݨا ݙے جکو مھیں دنیا بݨݨ خاں پہل تے بھیݪو راکھتو ہَتو۔
6
۶۔ مھیں تھارے ناں نا اُوئاں منکھاں تے ظاہر کریو ہا۔ جکو تئیں مھناں دنیا میں خاں ݙنا ہے۔ او تھارا ہَتا اَن تئیں اُوئاں نا مھنے ݙنا۔ اَن اُوئاں تھارے کلام تے عمل کیو ہے۔
7
۷۔ہمے اُوئاں نا ٹھا لاگی ری کہ جکو کچھ تئیں مھناں ݙنو ہے او خارو کچھ تے خاں جی ہے۔
8
۸۔کیانکہ جکو باتاں تئیں مھناں ݙنے ہے۔ او مھیں اُوئاں نا ݙے ݙنے۔ اَن اُوئاں من لیے رے۔ اَن اُوئاں خچ نا اُݪکھیو رو۔ کہ ہوں تئیں خاں نکݪیو ہا اَن ایمان لے آیا ہے کہ تئیں جی مھناں میلیو ہے۔
9
۹۔ ہوں اُوئے رے خارو منت کرئی۔ ہوں دنیا رے خارو منت کونی کرتو۔ بلکہ ہوں اُوئاں رے خارو منت کرئیں۔ جکو تئیں مھناں ݙنا ہے۔ کیانکہ اُو تھار جی ہے۔
10
۱۰۔اَن جکو کچھ مھارو ہے اُو خارو تھارو جی ہے۔ اَن جکو تھارو ہے اُو مھارو ہے۔ اَن ایئاں خاں مھارو جلال ظاہر ہویو ہے۔
11
۱۱۔ہوں آگے تے دنیا تے کونی ہو واں۔ پݨ ایہ دنیا میں ہے۔ اَن ہوں تئے کڈھے آئیں وو۔ اے پاک ٻاپ آپرے اُوئے ناں رے بدلے جکو تھیں مھناں ݙنو ہے۔ ائیاں ری خنبھاݪ کر تاکہ اُو آپاں آݪی کار ہیک ہوئے۔
12
۱۲۔ جتری تک ہوں ائیاں میں رہیو میں تھارے اُوئے ناں رے خارو جکو تئے مھناں ݙنو ہے۔ اُوئاں ری خنبھاݪ کر مھیں ائیاں ری خنبھاݪ کی۔ اَن اُوئے نا جکو ہلاک ہووݨ آݪو ہے اُوئے ݙیکرے خاں ٹاݪ ٻجو کوئی ہلاک کونی ہویو۔ تاکہ لِکھیوڑو پورو تھیئے۔
13
۱۳۔اَن ہمے ہوں تھیں کڈھے آئی وو۔ اَن ہوں ایہ باتاں دنیا میں رہ تے کہئی وو۔ تاکہ مھاری خوشی اُوئاں میں پوری ہو جاوئے۔
14
۱۴۔مھیں تھارو کلام اُوئاں نا ݙنو ہا اَن دنیا آݪاں ایئے خاں دشمنی راکھی ایئے خارو جاں ہوں دنیا رو کونی اُو وی دنیا را کونی۔
15
۱۵۔ ہوں تھنے ایے منت کونی کرتو کہ تُوں اُوئاں نا دنیا خاں اُکھݨ را۔ پݨ ایہ کہ تُوں اُوئاں با بُرئی خاں بچا۔
16
۱۶۔جاں ہوں دنیا رو کونی او وی دنیا را کونی۔
17
۱۷۔خچائی رے خارو اُوئاں نا پاک کر تھاں رو کلام خچائی جی ہے۔
18
۱۸۔ جاں تھیں مھناں دنیا میں میلیو۔ ایئاں جی مھیں وی اُوئاں نا دنیا میں میلیاں ہا۔
19
۱۹۔اَن اُوئاں ری خاطر ہوں آپرے آپ نا پاک کرئیں۔ تاکہ اُو وی خچائی ری وجہ خاں پاک کیا جاوئے۔
20
۲۰۔ہوں چھڑو اُوئاں رے خارو جی کونی بلکہ اُوئاں رے خارو وی منت کرئیں جکو اُوئے رے کلام ری وجہ خاں مھیں تے ایمان لے آخے۔
21
۲۱۔تاکہ او خارا ہیک ہووئے۔ جاں اے ٻاپ تو مھیں میں ہے اَن ہوں تے میں ہا۔ اُو وی آپاں میں ہیک ہووئے تاکہ دنیا ایمان لے آوئے کہ تھیں مھنے میلیو ہے۔
22
۲۲۔اَن اُو جلال جکو تھیں مھناں ݙنو ہے مھیں ایئاں نا ݙنو ہا۔ تاکہ او ہیک ہووئے جاں آپاں ہیک ہا۔
23
۲۳۔ہوں ائیاں میں اَن تو مھیں میں تاکہ ایہ ہکڑائی میں پورا تھی جاوئے۔ اَن دنیا جاݨ لے کہ تئیں مھناں میلیو ہے۔ اَن جاں تئیں مھناں پیار کریو ہے۔ اِئیاں جی اُوئاں نا وی پیار کریو ہے۔
24
۲۴۔ اے ٻاپ ہوں چاہئیں کہ او وی جکاں نا تئیں مھناں ݙنا ہے۔ جیتھ ہوں ہا مھیں بھیݪا ہوئیں۔ تاکہ مھارے اُوئے جلال نا جووئے جکو تئیں مھناں ݙنو ہے۔ اس رے خارو کہ تئیں دنیا رے شروع خاں جی مھیں خاں پیار کریو ہے۔
25
۲۵۔ اے خچا ٻاپ دنیا تنے کونی اݪکھیو پݨ ہوں تنے اݪکھیو ہا۔ اَن اُوئاں وی اݪکھیو ہے کہ تئیں مھناں میلیو ہے۔
26
۲۶۔اَن مھیں تھارو ناں ایئاں تے ظاہر کریو ہا۔اَن ظاہر کرتو ریئخ تاکہ اُو پریم جکے خاں تئے مھیں خاں پریم کریو ہے۔ ائیاں میں ہووئے اَن ہوں ائیاں میں ہو وا۔