1
۱۔ یسوع ایہ باتاں کہہ تے آپرے چیلاں بھیݪو قدرون رے نالے رے پار گیو۔جتھ ہیک باغ ہَتو۔ جکے میں اُو آپرے چیݪاں سمیت داخل ہویو۔
2
۲۔اَن اُوئے رو جھلاوݨ آݪو وی ایہ جگہ جاݨتو ہَتو۔ کیانکہ یسوع اکثر آپرے چیلاں بھیݪو اتھ جاتو ہَتو۔
3
۳۔آن یہوداہ خیپائیاں رے پݪٹن اَن سردار کاہناں اَن فریسیاں نا لے تے چراغاں اَن ہتھیاراں خودھا اُتھ آیا۔
4
۴۔ یسوع او خارے باتاں جکو اُوئے خاں تھیݨ آݪے ہَتے پہلی خا جی جاݨتو ہَتو۔ آگھو تھی تے اُوئاں نا پوچھیو تھاں کے نا لابھئی وا؟
5
۵۔اُوئاں اُوئے نا بݪتی ݙنی یسوع ناصری نا۔ یسوع اُوئاں نا کہیو ہوں جی ہا۔ اَن اُوئے نا جھلاوݨ آݪو یہوداہ وی اُوئاں بھیݪو ابھو ہَتو۔
6
۶۔ اَن جاں جی اُوئے اُوئاں نا کہیو کہ ہوں جی ہا تو او پاچھا تھے تے دھرتی تے کھر گیا۔
7
۷۔پچھے اُوئے اُوئاں خاں بھݪے پوچھیو کہ تھاں کے نا لابھئی وا؟ او ٻولیا یسوع ناصری نا۔
8
۸۔ یسوع اُوئاں نا بݪتی ݙنی مھیں تھاناں کہیو ہا کہ ہوں جی ہا آن جے تھاں مھنے لابھئی وا تو ایئاں نا جاوݨ ݙے۔
9
۹۔(ایہ ایئے رے خارو ہویو تاکہ او کلام پورو تھیئے جکو اُوئے کہیو ہَتو کہ ۔”جکو تھئے مھناں ݙنا ہَتا اُوئاں میں خاں میں ہیک وی کونی گمایو“)۔
10
۱۰۔پچھے شمعون پطرس تلوار رے تے سردار کاہن رے نوکر تے چلائی۔ اَن اُوئے رو خاجڑی کان باڈھ ݙنو۔ اُوئے نوکر رو ناں ملخُس ہَتو۔
11
۱۱۔پݨ یسوع پطرس نا کہیو تلوار نا میان میں راکھ۔ کی ہوں اُو پیالو نی پیاں جکو مھارے ٻاپ مھنے ݙنو ہے؟
12
۱۲۔ پچھے خیپائیاں اَن اُوئاں رے خوبداراں اَن یہودیاں بچڑ تے یسوع نا جھالیو اَن اُوئے نا ٻاندھیو۔
13
۱۳۔اَن پہل اُوئے نا حنا کڈھے لے گیا۔ کیانکہ او اُوئے برخ رے سردار کاہن کائفا رو خُخرو ہَتو۔
14
۱۴۔ایہ او جی کائفا ہَتو جکے یہودیاں نا خلاح ݙنی ہَتی کہ قوم رے بدلے میں ہیک منکھ رو مَرݨ بھلو ہے۔
15
۱۵۔ پݨ شمون پطرس اَن ہیک ٻجو چیلو وی یسوع رے لارے بوہا۔ اَن اُوئے چیلاں اَن سردار کاہن ہیکو ٻجے نا اُݪکھتا ہَتا۔ اَن اُو یسوع بھݪا سردار کاہن رے آنگݨ تک گیا۔
16
۱۶۔پݨ پطرس ٻاہر دَر تے جی ابھو رہیو اَن ٻجوڑو چیلو جکو سردار کاہن نا اݪکھتو ٻاہر آ اَن ٻانہی نا کہے تے پطرس نا مہنے لے گیو۔
17
۱۷۔پچھے اُوئے ٻانہی پطرس نا جو اَن کہیو کی تُوں ایئے منکھ رے چیلاں میں خاں کونی؟ اُوئے کہیو ہوں کونی۔
18
۱۸۔نوکر اَن خیپائی خی رے کرے ٹانڈاں رو ٻاخݙے ٻاݪے ابھا تپتا ہَتا۔ اَن پطرس اُوئاں بھیݪو ابھو تپتو ہَتو۔
19
۱۹۔ پچھے سردار کاہن یسوع خاں اُوئے رے چیلاں اَن اُوئے ری تعلیم رے بارے میں پوچھیو۔
20
۲۰۔یسوع اُوئاں نا بݪتی ݙنی علان کر اَن دنیا خاں باتاں کریئے میں خداں بھگتی گھراں اَن ہیکل میں پرچار کریو جیتھ خارا یہودی بھیݪا تھئے۔آن لُک میں کئیں کونی کہیو۔
21
۲۱۔تُو مھیں خاں کیاں پوچھئیں۔ اُوئاں خاں پوچھ جکاں میں خاں خُݨیو ہے۔ کہ میں اُوئاں نا کی کہیو؟ جو اُوئاں نا ٹھا ہے کہ مھیں کی کی کہیو ۔
22
۲۲۔جݙے اُوئے ایہ باتاں کہیں تو ایئے تے اُوئاں میں خاں ہیک جکو نیڑو ابھو ہَتو۔ یسوع نا چماٹ مار اَن کہیو تُو سردار کاہن نا ایئاں بݪتی ݙئیں۔
23
۲۳۔یسوع اُوئے نا بݪتی میں کہیو کہ جے مھیں غلط کہیو ہا تو اُوئے غلطی تے گواہی ݙے۔ پݨ جے ٹھیک ہے تو تُوں مھناں کیا مارئیں۔
24
۲۴۔اَن حنا اُوئے نا ٻادھوڑو کائفا سردار کاہن نی میلیو۔
25
۲۵۔ اَن شمعون پطرس ابھوڑو تپتو ہَتو۔ اَن اُوئے خاں پوچھیو گیو کہ کی تُوں اُوئے رے چیلاں میں خاں کونی اُوئے انکار کیا اَن کہیو کہ ہوں کونی۔
26
۲۶۔پچھے سردار کاہن رے نوکراں میں خاں ہیک جکو اُوئے منکھ رو گنے آݪو ہَتو۔ جکے رو کان پطرس اُݙا ݙنو ہَتو۔ کہیو کی مھیں تھنے اُوئے رے بھیݪو باغ میں کونی جویو؟
27
۲۷۔پچھے پطرس بھݪے انکار کریو اَن اُوئے جی گھڑی کُکڑ ٻاگ ݙنی۔
28
۲۸۔ پچھے یسوع نا کائفا کڈھے قلعے میں لے گیا۔ اَن خاکݪے ری بݪہ ہَتی۔ اَن اُو آپ قلعے میں نی گیا۔ تاکہ ناپاک نی جاوئے بلکہ فصح کھا خگئے۔
29
۲۹۔ایئے رے خارو پیلاطس اُوئاں کڈھے ٻاہر نکݪ آیو۔ اَن کہیو کہ تھاں ایئے منکھ ری کی گلہ کرئیں۔
30
۳۰۔اُوئاں ٻݪتی ݙنی کہ جے ایہ بدکار نی ہونت تو مھاں ایئے نا تھیں کڈھے کونی لے آونت۔
31
۳۱۔ پیلاطس اُوئاں نا کہیو تھاں ایئے نا لے جاؤ۔ اَن آپری ریت رے مطابق ایئے تے الزام لگاؤ۔ یہودیاں اُوئے نا کہیو مھاناں ایہ ٹھیک کونی کہ مھاں ایئے نا موت ری سزا ݙا۔
32
۳۲۔(ایہ ایئے رے خارو تاکہ یسوع ری اُو بات پوری ہوئیں جکے میں اُوئے اشارو کیو ہَتو کہ ہوں کئی موت خاں مَریخ)۔
33
۳۳۔پچھے پیلاطس بݪے قلعے میں گیو اَن یسوع نا ہیلو کر اَن اُوئے نا کہیو کی تو یہودیاں رو بادشاہ ہے؟
34
۳۴۔یسوع اُوئے نا بݪتی ݙنی کہ تُوں آپ جی ایہ بات کہئیں وو۔ جاں ٻجا مھارے حق میں تناں کہئی ہے؟
35
۳۵۔پیلاطس بݪتی ݙنی کہ کی ہوں یہودی ہا؟ تھاری جی قوم اَن سردار کاہناں تنئے مھارے حوالے کیو ہے۔ تیئں کی کریو ہے؟
36
۳۶۔ یسوع بݪتی ݙنی مھاری بادشاہی ایئے دنیا ری کونی۔ جے مھاری بادشاہی ایئے دنیا ری ہونت تو مھارا چیلا بڑھنت تاکہ ہوں یہودیاں رے حوالے نی کریو جاواں۔ پݨ مھاری بادشاہی ایتھ ری کونی۔
37
۳۷۔پچھے پیلاطس اُوئے نا کہیو کی تو بادشاہ ہے؟ یسوع بݪتی ݙنی تُوں آپ جی کہیں۔ کہ ہوں بادشاہ ہا۔ ہوں ایئے رے خارو پیدا ہویو اَن ایئے رے خارو دنیا میں آیو ہا کہ حق ری گواہی ݙا۔ جکو وی حق تے ہے مھاری آواز خُݨئی۔
38
۳۸۔ پیلاطس اُوئے نا کہیو کہ حق کی ہے؟ ایہ کہہ اَن اُو بݪے یہودیاں کڈھے ٻاہر گیو اَن اُوئاں نا کہیو۔ ہوں ایئے میں کوئی قخور کونی جوتو۔
39
۳۹۔پݨ تھاری ریت ہے کہ فصح رے ݙن ہوں تھارو ہیک منکھ چھوڑ ݙئی۔ تو تھاں کی چاہوئیں کہ تھارے خارو یہودیاں رے بادشاہ نا چھوڑ ݙاں؟
40
۴۰۔اُوئاں خارا رَڑ کر اَن کہیو اُوئے نا نی بلکہ برابا نا چھوڑ اَن برابا ہیک ڈاکو ہَتو۔