1
Shatara wat un abo mocbi sarini zhe tasi som kia zhuikas bati ne ashini to se tan shaget khundiayo tasi kai amaw.
2
Mai shemi mocbi jagaio wal` del dai koki emi tre bas s`ati mai som mi an zhe isi som zhuikas bati kia ne shian.
3
A pe aimi anora durai ahutis peo emi agraio phondai thau hin zhe ade isi mocaw desha awatau an,
4
Tasa shaget tasa jawab pron ki aya beyaban una kawel`a kura shohon` au onin ki emi tac`erin?
5
Se tasi pe aphucaw mimi som kimon au shian?
Te aman Sat.
6
Phato se mocan hokum prau ki c`om una nesaw zhe se te sat au agriau zhe shukur kaio ac`inaw zhe tan shagetan diman parau ki asi ruaw tha zhe te moc`an ruaw athan.
7
Zhe tasi som adek c`utak masi aini. Se tasi thara barkat daio amaw emi asta asi udreman tha.
8
Phato te zhuio tac`erini zhe thau hul`a sat sawew upran.
9
Zhe moc c`aw hazaras s`oi aini. Phato se te ahutau.
10
Zhe se ek dam tan shagetan som kishti una nesi Dalmunuta jaiga una parau.
11
Phato Pharisi nehi tasa som behes karikas pron zhe tasa azmaish karikas bati tasa pi kia D`I aini nishan gatikas pron.
12
Se tan arwah aini phus grio amaw onja zamana aini moc mo nisani khojin dai? A mimi kai sahi mam dai ki shesa andena zamana aini mocan kia nishan ne den.
13
Zhe se te histi gheri kishti una nesaw zhe al`el`aw paraw.
14
Te au grik prasmi aini zhe kishti una tasi som ek aini ziad au ne ashini.
15
Zhe se tasi kai shehen` hokim prau ki Khabardar Pharisian mayak zhe Hairodes e mayakas pi desha hal`i.
16
Te egoegin som mondr dikas pron zhe maikas pron ki homa som au ne shian.
17
Magam Yasu shehen` jhoni o tasi kai amaw abi ko shehen` mondr det dai ki homa som su ne shian? Kia shonja zhe ne jona dai e zhe ne c`icia? Kia mimi hardi dangthi shiaw e?
18
Ec` shian zhe abi jagao ne dai e? Ko~ shian zhe ko~ o ne kara dai e? zhe kia mimi yad ne e?
19
Shatara wat una A te ponj au ponj hazaran hatya ac`inis to abi kimon sawew tasi thawa hul`a pal`uman upral`i? Te tasa kai aman das` zhe dua.
20
Zhe shatara wat una sat au c`aw hazaran hatya ac`inimi e to abi kimon sawew pal`uman upral`i?
Te tasa kai aman sat.
21
Se tasi kai amaw kia abi shonja zhe ne ajonil`i e?
22
Phato te Bait e Saida una on zhe moc ek s`ea tasa tada al`on zhe tasa ishkal`i aran ki ama c`uti.
23
Se tasa s`eas baza aini gri to gromaw bian aniaw zhe tasa ech una thok khasayo tan baza tasa thara athaw zhe tasa pi aphucaw tu kia pashis dai e?
24
Se buc`umak jagaio amaw a moc` pashum dai koki te kasikwew shehen` jonen dai khen ki mut.
25
Phato se geri tasa ec` una tan baza athau zhe se sahi kai jagaw zhe prust hawaw zhe saw ishnayari safa safa kai jagek abhaw.
26
Phato se to tasa dura hatya ahutau zhe amaw ki aya grom una gheri kai asta pak mo thai.
27
Phato Isaa zhe tasa shagetan Qasaria Philpas gromuna paron zhe phond una se tan shagetan pe shehen` aphuc`aw ki shemi moc mai kai kia man dai?
28
Te jawab pron ki Yuhana baptisma diau zhe ade o Alia Zheade o paygumbaran mocaw kura.
29
Se tasi pi aphucaw Magam abi mai kai kia ma dai? Patras jawab una tasa kai amaw tu Masih.
30
Phato se tasi kai amaw ki mai barauna kas kai mo ma.
31
Phato se tasi sabak dikas prau ki zaruri shia ki Adamas putr bo azab uprel` zhe akhabir zhe sardar Kahin zhe Phiki to nashen zhe tre bas pistaw o se ustuw.
32
Zhe se shama mondr safa safa kai prau. Patras to gezi awata neo tasa kai maikas prau.
33
Magam se pis gheri tan shagetan jagaio Patras e kai amaw Ay shaithan mai ruaw desha ha koki tu khodayas mondran ne mocan mondran kheyal karis dai.
34
Phato se te mocbi zhe tan shagetan khundiayo tasi kai amaw Kura pe mai pistaw ik khoja dai o tan pe inkar kara zhe tan silip upra zhe mai pistaw aw.
35
koki kura pe tan zhan bac` arau peo se to dumbel` Zhe kura e mai zhe mai injil (kitabas ) khater tan zhan dumbel` se o to bac` kariw.
36
Zhe moc pe saw dunia agriau pe zhe tan jhanas o nuksan arau peo to taso kia faida?
37
Moc tan zhanas badela una kia del`?
38
koki kura pe shesa shum krom karau mulkuna mai zhe mai mondran pi l`ac joniu Adamas putr asta pe tan dadas ruaw tan pak pharishtan som aw po to se tasi pi l`ac joniw.