1
Te Yaroshelumas s`oi Zaitunas dhe~tauna Bait-e-Phigay zhe Bait-e-Aniahas tada on e to se tan shagetan mocaw du ahuatw.
2
Zhe tasi kai amaaw ki ruaw gromuna para zhe tara ati mi ek grodok gu`ak tara boni hiu kawa ki kura moc shonja zhe ne nesi aan. To bic`hari aya hatya al`aw.
3
Kura pe mimi kai amaan peo ki shehen` ko kara dai? To maa ki ia Yasu e ajat hiw dai. Se ek dam to aya hutiw.
4
Phato te paron to durai bianaw dai phondikuna mi bhoni ashis te to bic`airman aini.
5
Magam kura moc ki tara c`isti aini tal`el`a mocaw ade tasi kai amaan kia kara dai abi gordok gu`ak bic`ara dai?
6
Te kai ki Yasu mai ais shehen` mi tasi kai amaan zhe phato te lasan.
7
Phato te gordok gu`ak Yasu e tada alon zhe tan peran tasa thar apron zhe se tasa thara nesaw.
8
Phato bo moc tan peran tasa hatya phonduna bisgan. Ade moc o mutaw shong c`ini bisgan.
9
Kura ki tasa ruaw ruaw zhe pistaw pistaw iman aini tol tol kai maiman aini. Hoshana. Bumburak shatasa hatya kura ki khodayas nomas thara in dai.
10
Bumburak homa dada Dauta bac`aias hatya ikas bati behestayni hutilas siphat hiw aria.
11
To se Yaroshelum una ati handuna aw zhe nastari saw ishnayari jagayo tasi dash zhe duin som Bait-e-Aniah hatya paraw koki c`ak dai ashes.
12
Juo aduo te Bait-e-Aniah aini neheon e to tasa anora araw.
13
Zhe se dehsa aini thi kawit muta kawa ki po~ ashini jagaio paraw ki albat atra kia hin magam tasa s`oi azhalaw e to po~an sargairo kia ne sapraw koki Kawit pac`ikas tem ne thi ashes.
14
Se tasa kai amaaw gherio kura tai pi kia mewa ne zhuw zhe tasa shagetan sangaini.
15
Phato te Yaroshelum una on zha Yasu handuna ati tara kura ki ishnayari br~ikiman zhe griman aini bian dras`nai aran zhe paysa badel garawawan te takht pel`atay ahistaw zhe kohow bri~kawan tada pai tasi hanyak ahistaw.
16
Zhe se handaini kurai asta gearum ne harawan praw.
17
Phato se tan sabakaw tasi kai amaw kia shehen` ne niweshi shiaw e ki Mai dur saw mulkan sualgarawan hiu? Magam abi o ama ahiruan jaiga sawzai aa.
18
Zhe sardar Kahin zhe zhe Phiki moc shehen` sangaio to nashaikas bati moka khojikas pron koki tasa pi behiman aini shehen`as bati ki saw mocbi tasa c`ic`al`a mondran pi hairan aini.
19
Zhe har c`at c`akdekwew o se Shahar hatya pariman ais.
20
Phato ragesti o te tara dai pariman aini e to kawit mut` isnosuna s`ati s`us`ta kai apashan.
21
Patras e se mondr yadi aw zhe tasa kai amaw Ay ustaz! Jagai shama kawit mut kas thara ki tu l`anat kai ai susi shiaw.
22
Yasu jawab una tasi kai amaw Khodayas thara Bhawar thai.
23
A mimi kai ujak mondr dem dai ki kura pe shesa dhen~tas kai amaw pe haw ki upuc`i zhe samundar una pal`as gho~i mai o tan hardiuna shak ne araw haw shehen` mi hiw.
24
Shatalako a mimi kai mam dai ki kia ki abi sual una gata dai yakin tha ki mimi milaw hawaw zhe se mimi milaw hiw.
25
Kai pe abi c`isti sual kariman ail`i pe haw mimi kai pe kura kia mai aini e pe tasi hatya muah kara ki mimi dada kura ki d`i una aw mimi gunah mua kariw.
26
Abi pe tasa hatya mua ne aril`i haw to mimi dada kura ki d`i una aw mimi guna asta mua ne kariw.
27
Te phato Yaroshelum hatya on zhe se handuna kaiman ais e Sardar Kahin zhe Phiki moc zhe akhabiran tasa tada on.
28
Zhe tasa kai amaan tu shemi krom kas ikhtiaras thara karis dai? Shama ikhtiar kura tai dai aw?
29
Yasu tasi kai amaaw A mimi pi ek mondr phuc`um dai abi pe jawab mai kai prali pe haw to a mimi kai mam ki shemi krom kas ikhtiaras thara karim dai.
30
Yuhana baptisma dek D`ias gehenaw dai ashes e yao mocan gehenaw dai? Mai kai jawab det.
31
Te tan mocuna mashkul thi amaan abi pe d`ias gehenaw dai gho~i pe amaimi pe haw to asa maw ki dhoyo abi asa yakin ko ne arili ?
32
Yao amaimi peo ki mocan gehenaw dai to moc jagai beheman aini koki saw mocan yakin ashes ki se Yuhana paygumber ais.
33
Phato te jawab una Yasu e kai amaan Abi ne jonik dai. Yasu tasi kai amaaw a asta mimi kai ne mam dai ki shemi krom kas ikhtiaras thara karim dai.