1
Toa Yasu tasi som matalan thara mondr dai amaaw ki ek moc tan c`etruna drac` mut`hik bai o tara nasenaw o jhaw dyita zhe d`a garuni sawzai o zhe kot` sawzala zhe to mocan t`hikauna dai o warek mulkuna hatya gal`a.
2
Phato drac` uc`undaikas wat zhal`il`a se tan ek nawkar t`hikadaran tada hatya tan hisa gatika hutil`a.
3
Magam te to nawkar gri l`a`i kia ne dai pishtyak ahutan.
4
Se gheri ek warek nawkar tasi tada ahutaw magam te tasa s`is` beshan zhe bo beizat kada.
5
Phato se ek warek ahutaw. Te to nawkar nashan. Phato se warek bo nawkar bata ahutaw. Te tasi mocaw ade ta al`an zhe ade nawkar o nashan.
6
Zhe ajo ek mi moc thaw hul`a se o tasa khosh putr asta se akheruna to tasi tada shehen` mai hutil`a ki te mai putra hatyo albat lihaz Karin.
7
Magam shate t`ikhadaran tan mocuna amaan ki sheami tasa putr. Andayaw ama nashek. Jaydat o homa hiw.
8
Phato te to gri nashan zhe drac` jawas bihan histil`a.
9
Ajo drac` jawas khaun kia kariw? Se iw zhe te t`hikadar nashai o drac` jaw waregin del`
10
Kia abi shama khodayas kitapaini niweshela ne mai aa e. D`iga dyiaw kurai bat ki dur sawzaikwew ahistan
Shasemi bat awatuna jikas bati ajat hawaw .
11
Ea khodayas gehenaw dai hawaw. Zhe homa hatya o se namuna ?
12
Shesa thara o Yahudi gaderakan to grikas koshesh aran magam mocan pe behon koki te joni aini ki Isaa shama matal tasi mi hatya dai aw. Phato te to histio paron.
13
Phato te adje Pharisi zhe Hairodi moc tasa tada ahutan ki to mondran thara phansaw Karin.
14
Zhe te ita tasi kai amaan Ay bandawaw abi jonik dai ki tu ujak moc zhe kas parwa asta ne karis dai koki tu kas mocas gehenaw ne as baliki ujak mondran thara khodayas tada parikas sabak des dai.
15
Qasaria S`as paisa deheli e ne? Abi dek e ne dek? Se tasi calaki jhoni o amaaw Abi mai ko azmaish kaa dai? Mai hatya ek dinar ona ki a jagem.
16
Te onan. Se tasi pi aphucaw Ia photo zhe nom kas? Te tasa kai amaan Qaisaras.
17
Yasu tasi kai amaaw kia ki Qaisaras to Qaisaras zhe kia ki khodayas to khodayas det. Te Yasu mondr kon~ kai o bo hairan hawan.
18
Phato Saduki kura ki man dai ki Qiyamat ne hiw tasa tada ita tasa pi shehen` suaal aran ki.
19
Ay bandawaw! Homa hatya Musa neweshi aw ki kas bayas pe ja kai abad`oi thi anashaw peo to zhe tasa jas thaw hawaw peo to tasa bayas tasa jas ja kariw ki tan bayas nasal payda kariw.
20
Sat baya aini. Awel`o gadara ja araw zhe abad`oi thi nasta.
21
Juo to ja kaio zhe abad`oi thi anashaw zhe shehen` mi thi troyo asta.
22
Se sat akheri bayas asta shehen` mi abad`oi thi nasta. Sawin pistaw o istrizha asta anashaw.
23
Qiyamat uno ea tasi mocaw kas ja hiu? Koki se tasi satin ja thi ais.
24
Yasu tasi kai amaaw Abi galat ne aa e ki ne ta khodayas kitab aini mondr jona dai neo Khodayas takat jhona dai?
25
Koki mocbi pe naston mocaw zinda thi uston peo to tara ja karik ne hiu baliki te d`i aini pharsihtan raw hin.
26
Magam nas`ton zinda thi ustikas barauna ani Musa kitap una ne mai aa e ki khodya tasa kai mai ais ki A Ibrahamas khoday zhe izhak e khoday zhe Izhak e khoday?
27
Se naston Khoday ne baliki zindan khoday. Abi dhoyo bo abatha aa.
28
Zhe Phikiaw mocaw ek moc te behes karikwew sangai o ajonaw ki se tasi kai prust jawab araw. Se s`oi aw zhe tasa pi aphucaw ki saw hokuman mocaw awelo kurai?
29
Yasu jawab praw ki awelo shia ki Ay Isarail ko~ kara. Khoday homa khoday ek mi aw.
30
Zhe tu tan khodayas som tan pura hardias zhe tan jhanas zhe tan saw akalas zhe tan saw takatas pi ziad muhabat kara.
31
Juo e shia ki abi tan gambreshuan som tan raw muhabat kara. Shisi pi ghona kurai hokum asta ne.
32
Phiki tasa kai amaaw Ay Bandawaw bop rust! Tu sai amai ki se ek mi aw zhe tasa sargairo kura ne an.
33
Zhe tasa som pura hardias thara zhe saw akala zhe saw takatas thara muhabat kara zhe tan gambreshuan som asta muhabat karik saw zhandar phawazikan pe bo zaruri.
34
Yasu jagaw e ki se tharar aini mondr praw to se amaaw tu khodayas bac`aias pe desha ne as zhe phato kura tasa pi suaal karikas himat ne aran.
35
Phato Yasu handuna sabak dekwew shehen amaaw ki Phiki ko shehen` man dai ki Masih Daud e putr?
36
Daud tan onjast`a rukhas gehenaw dai amaaw ki
Mul`awa mai Mul`awas kai amaaw ki
Mai drac`ui gehenaw nesi. Shatara zhe ki a tai dushman tai khur no~una ne karim.
37
Daud tan tasa kai Khoday gho~i maaw dai. Phato se khen~ thi tasa putr hawaw? Zhe moc bo khoshan thi to ko~ kariman aini.
38
Phato Isa ate c`ic`aikwew amaaw ki Phikian pi kheyal kara kura ki driga driga shukha sambi bazarai kasik zhe tan izaat karawaik khojin dai.
39
zhe sualgarikainai pai hutal`a khursi nisik khoshaan dai.
40
Zhe te we soruan duran thara kabza Karin dai zhe mocan pashaikas bati bo bo wat zhe sual Karin dai. Tasa mi bo khaca saza hiu.
41
Phato se handuna paisa histuni bakasas tada nesi jagaiman ais ki moc handas bakasai khen~ kai paisa jhen dai zhe bo Dawlat man moc bo kia jheman aini.
42
Shehen` mi ek garib wesoru istrizha du paisa ahistaw.
43
Se tan shagetan tan tada khundiayo tasi kai amaaw a mimi kai ujak mondr dem dai ki kura handas baksai paisa jhen dai tasi sawin mocaw shea wesoru garib istrizha sawin pi ziad praw.
44
Koki saw tan dawlatan mocaw pron magam shia istrizho kia ki isa ashini saw praw.