¹ Achaleka wanji awamiwele ye Leza, vino awana awakundikwe. ² Nga muwapita mulukundo, ndi vino Kilisitu wakunzile sweswe nga ayipa wenganye umulandu nasweswe, ichawupi ichinunchile ni nzuwi kwe Leza. ³ Kweni patafwile pawa nanti kupamuzya mwakwe mwemwe ivya wuzelele pamwi ichamusango wawukandamane pamwi ichawumfu, amuno vyoo aviwipe pa wantu watele awe Leza. ⁴ Mutaleka pawe uwukombele, ivwango yawukaleza, nanti anchozyo zino zitayine_vyonsi vino aviwipe. Nkano fwendi kwawa ukusalifya. ⁵ Amuno mufwile ukusimichila kwakwe choo, kuno nanti awuzelele, pamwi umuntu umumfu_kuno, uwamakolania_ali nuwupyani muwu fumu we Kilisitu nu Leza. ⁶ Mutaleka wumwi awawipe namazwi ayavye; amuno umulandu ni vintu vyoo uwukalale we Leza wukwiza pawana wantayivwila. ⁷ Achaleka, mutaluminkana nawoliwo. ⁸ Amuno mwatezile muwa amfinzi, kweni kanonzi mwe lukozyo mu mfumu. Mwapita vino awana walukozyo ⁹ (amuno ichikomwa chalukozyo chikazanwa nuwuzima wonsi, uwulungamane, nuwuchisinka), ¹⁰ nga muzane chino achakusechelesya ku Mfumu. ¹¹ Mutawa ponga nimilimo ya mfinzi iyintafungula, lelo kweni vilolesyani kwewoliwo. ¹² Amuno achakusozwi nsoni napakulumbula ivintu vino wakuwomba munkama ¹³ Kweni pano ulukozyo lwawalila pakwe chilichonsi, chikalolechela. ¹⁴ Amuno chonsi chino chikulolechela alukozyo. Achaleka chikuti,"ziwuka, wemulale wewe, nga uzyulupuke kuwufwe, nga Kilisitu aliwalila pakwe wewe." ¹⁵ Lolechesya umwakusayilila vino ukwikala_utawa vino umusita mano kweni vino uwa mano. ¹⁶ Wani awazalampuke umulandu amanda ayawipe. ¹⁷ Achaleka, mutawa awakaleza, kweni mumanyichisye chino achakulonda cha Mfumu. ¹⁸ Mutawa awakukolwa ni pala, amuno wukakolelela ku misango yakuyilechelezya. Nkano fwendi, mwizule numuzimu mwimichile, ¹⁹ ukuvwanga kumuwuye mumalumbo namukutunvya ni ndwimbo zyawuzimu, ukwimbila nukwimbili Mfumu nu mwenzo winu wonsi, ²⁰ Mwasalifya penye pakwe chonsi, mwi zina lya Mfumu yitu Yesu Kilisitu kwe Leza eTata, ²¹ pakutontelana mwenga kwe we numuwuye umwakutina Kilisitu. ²² Mwewanachi tontelanji awalume winu vino aku Mfumu. ²³ Amuno umonsi amutwe wa mwanachi ndivino Kilisitu nawe amutwe wa Keleziya, ne Kilisitu mwenecho we katula wakwe. ²⁴ Kweni ndivino Ikeleziya likutontela Kwe Kilisitu , achino swinya awanachi wazipizile watontela awalume wawo mwakwe chilichonsi. ²⁵ Mwewonsi kundanji awachi winu, ndivino Kilisitu wakunzile Ikeleziya nukuyipa wenganye umulandu nayoliyo. ²⁶ Kilisitu wayipile wenga umulandu ni Keleziya ukuti ayine ayipange yiwe ayitele, lyo wayiswefya pakupwizwa naminzi namazwi, ²⁷ ukuti ayine ayilolesye wenga kwe weliwenye vino awuchindami, ukusita iviko namankwinya pamwi ichintu chonsi, kweni ilitele ilisita ikampifya. ²⁸ Munzila iyliyonga awonsi wafwile wakunda awachi wawo wonga vino amiwili yawonye. Weyo wino akukunda umuchi wakwe ati ayikunda umwenechonye. ²⁹ Amuno pasi wino wapata umuwili wakwenye, kweni akawulyesya nukuwusayilila, ndivino Kilisitu akalyesya nukusayilila Ikeleziya, ³⁰ umulandu swe vyawi vya muwili wakwe. ³¹ Pamulandu wakwe choo umonsi alisya eyisi wakwe nu nyina nga aliyipatika kumuchi wakwe, nga wawili waliwa amuwili wonga. " ³² Uwuchisinka uwuvwame woo awukulu_kweni nkuvwanga ivye Kilisitu ni Keleziya. ³³ Chingatewuli, wensi uwe mwemwe swinya ayine akunde umuchi wakwe vino weliwenye, nu mwanachi azipizile achindike umulume wakwe.