¹ Mwewana, tontelanji awakwasi winu mu Mfumu, muno choo achizima. ² ''Chindika eso nenyoko'' (lino alisundo lyilayano lyakutalichila), '' ³ ukuti viwe ichete namwemwe nukuti mwikalisye munsi yapansi.'' ⁴ Mwewakwasi, mutafyenga awana winu kuwukalale. nkano fwendi, muwalele nukuwasambilizya ninkomelezyo zya Mfumu. ⁵ Mwewazya, tontelanji watatakulu winu numuchinzi wenecho nukuzakaza, muwusuwalikwe wa myenzo yinu. ⁶ Wanji mwewakutontela kwe woliwo ndivino mwandi muwe mwewakutontela Kilisitu. Wanji awakutontela asapatunye pano watatakulu winu wakulola, alyakuti muwasechelesye. Nkano fwendi, wanji awakutontela vino awazya we Kilisitu, wano wakuwomba ukulonda kwe Leza ukufuma mumyenzo yinu. ⁷ Pyunjilanji nu mwenzo winu wonsi, ngati apano ukupyunjila imfumu awantu pole, ⁸ umulandu tumanyile kuno pamulimo wonsi uwuzima wuno umuntu akuwomba, alipochela ichilambu ukufuma ku Mfumu, ndi amuzya pamwi amusapulwe. ⁹ Watatakulu, yikalanji nawazya winu munzila iyiliyonga. Mutati mwawatinia. Mumanye kuno weyo wino wetatakulu wawo nuwinu alimwiyulu, nga kusi nanti akutemwela naweliwe. ¹⁰ Uwumalilo, wani awawome mu Mfumu namuwuwome wamaka yakwe. ¹¹ Zwalani vyanzo vyonsi ivye Leza, ukuti muwe mwe wakwimilila muwulyalya wakwe chiwa. ¹² Amuno ukulwisya kuti asakwamuwili nuwazi, kweni tukulwisania nawakapanzya, nawansambu, nawamaka wamfinzi wakanonzi, nimizimu iyiwipe yamasyo yamwiyulu. ¹³ Achaleka zwalani ivyanzo vyonsi ivye Leza, ukuti muwe mwewakwimilila mumpindi yoo imbipe, ala pano mwawomba ichilichonsi, yimililani nukusimpa. ¹⁴ Ale simpisyanji, numupango wachisinka uwe awakuzutila mumitembeleko yinu, lyo mwati muzwala ichakuchinga chawulungamane, ¹⁵ nga namatamba yinu yano yakwiza ukusengania kwi landwe lya mutende. ¹⁶ Penye mwasenda isuwilo lya nkelwa, kwe lino muliwa muyine ukuzimya imivwi yamulilo iya muwipe weyo. ¹⁷ Sendani ichisote chipususyo nulupanga lwamizimu, luno amazwi ye Leza. ¹⁸ Nipepo lyonsi nukulenga, pepanji impindi zyonsi mumuzimu. pakupelelechezya, muwaminso penye nukutwalilila pano mukupepela awantu watele wonsi awe Leza. ¹⁹ Mwampepela nanene, ukuti ilandwe lipwe kwe nene pano nku fumpula umulomo wane. Pepanji ukuti manyikwe kuwusinge wachisinka wawuvwame kuvyi landwe. ²⁰ Akwilandwe kuno nene nentambikwa wino akusungwa muvingololo, ukuti nawizya muwusinge, vino injine pakuvwanga. ²¹ E Tikikasi, umwanitu umukundwe numuwonvi umusuwilwa mu Mfumu, ali wanena chonsinye, ukuti mumanye muno nkuwombela. ²² Namutuma kwe mwemwe pakwe chonyecho, ukuti mufwile mumanye vino tuli, swinya nukuti awomye imyenzo yinu. ²³ Umutende wuwe kuwanitu, mbali nulukundo lwisuwilo ukufuma kwe Leza eTata ni Mfumu Yesu Kilisitu. ²⁴ Inkumbu ziwe kwe wonsi wano wakunda Imfumu yitu Yesu Kilisitu nulukundo uluntawekwa.