¹ Achaleka nene, vino awa muvingololo wa Mfumu, nkuwachinchizya ukupita muwutele walwito wuno mwitwa. ² Nene nkuwachinchizya ukwikala muwuntu uwukulu nukuyichefya nukuzizimichizya, pakuyiwika ponga we numuwuye mulukundo. ³ Wombani umwakufikapo pakusunga uwuponga wamuzimu muwunyepe wonga uwa mutende. ⁴ Pali umuwili wonga numuzimu wonga, ndivino namwenye swinya mwisilwe mwisuwilo lyonga ilya lwito. ⁵ Nga pali Imfumu yonga, isuwilo lyonga, uwusavyi wonga, ⁶ ne Leza wenga ne Tata wewonsi, wino awavyonsi namwakwe vyonsi namwe vyonsi. ⁷ Inkumbu zipilwe chila wensi ukulingana ni chipimo chawila we Kilisitu. ⁸ Chilivino iwaliko likuti: ''Walile wakwela mupelapela, watunguluzile awanyepwe muwunyepwe, nga apa ivyawila ku wantu.'' ⁹ Chikusula chani'' wakwezile,'' ukufumya ukuti wakwezile swinya muvipya ivitichi ivyansi? ¹⁰ Weyo wino wisile amuntu uwuliwenga wino wakwezile swinya papela pamayulu yonsi, ukuti afichilisye ivintu vyonsi. ^{13 11} Kilisitu wapile wamwi ukuwa awapositoli, wamwi awakasesema, wamwi awakawizya, nga nawamwi awachemi nawasambilizya. ¹² Wapile ivifulo ukusengania awantu wakwe Leza watele pamulimo wakupyunjila, pakuzenga umuwili we Kilisitu . Akutwalilila ukuzenga umuwili wakwe ukufichila swensi twafika uwuponga wisuwilo nuwumanyinsanie wamwana we Leza, nukuti tuwe swe wawome nga nukufika pachipimo cha wizule we Kilisitu. ¹⁴ Kilisitu akutuzenga sweswe kuti tutakawe swinya awana wano wakusumbwa namawimbi, ukunyamulwa numuza wuliwonsi wachisambilizyo na wantu awalyalya muwuchenjele wawupupu wawo. ¹⁵ Nkano, ukuvwanga ichisinka mulukundo, twandi tukule munzila iyiliyonsi kwakwe weyo wino amutwe, wino we, Kilisitu. ¹⁶ Kilisitu akuzenga umuwili wonsi, wukuluminchizania nukulemana ponga nichawi chonsi ichakwavwilizya, nga apondi ichawi chonsi chikuwombela ponga, achino chikulenjesya umuwili ukukula ukuti chiyizenge chonga mulukundo. ¹⁷ Achaleka, nkuvwanga nukuchenyentezya pakwe choo mu Mfumu, ukuti mutafwile mwakwikalaswi vino amakandi yikalanga, mumelenganio yawo ayawukaleza. ¹⁸ Wati wafitilwa mukwivwichisya kwawo, wasi nuwumi wakufuma kwe Leza umulandu nuwumafoloto wuno wuli mwewoliwo, umulandu wawuwome wa myenzo yawo. ¹⁹ Wasi ninsoni wati wayilemeka wonga ku vikumbuchilwa, nga wakutwalilila ukuwomba umusango wachikandamane chonsi. ²⁰ Kweni asamuno mwasambilizile kuvye Kilisitu. ²¹ Nkwelengania ukuti mwivwile ivya kweweliwe, nukuti mwasambilizile mwakwe weliwe, vino ichine chili mwe Yesu. ²² Mwasambilizile ukufumya vino amiwele yawumi winu wakali, ukufumya umuntu wakali. Umuntu wakali awino amuwekwa pamulandu wavikumbuchilwa vyawulyalya. ^{23 24} Mwasambilizile ukuyiyaniaswi mumuzimu wa melenganio yinu, nga nukuzwala umuntu umupya wino welewulwa muchikozyo che Leza_ muwulungamane wawuchisinka nuwutele. ²⁵ Achaleka, mufufute uwufi, swinya muleke wensi uwe mwemwe avwanga ichisinka numupalamani wakwe, pamulandu swevyawi we numuwuye. ²⁶ Ufulwe nga utawembuka. Utaleka ilanzi lyichilile nuwukalale wako. ²⁷ Utapa echiwa ulongo. ²⁸ Wino wiwawanga atafwile ayiwe swinya. Afwile awawomba, awomba imilimo iyakulondwa namakasa nyakwe, akulikuti azipizile awa nichakwankana nawawo wano awapotwe. ²⁹ Mutaleka inkombele zifume mumulomo winu. Wonvyani vyenye amazwi yano ayakwavwa ukuzenga wanji, ukulingana nivyakulonda vyawo, Ukuti amazwi yinu yawe ayakwavwa kwe wawo wano wakwivwa. ³⁰ Mutalwilintisya umuzimu we Leza, amuno akwakwe weilwe kuno mwawikwa ichimanyikwilo pawanda wa wipususyo. ³¹ Fumyani uwulumilwa wonsi, uwulamba, uwukalale, ukupanzinkana, ni ntusi, apaliponga nachonsi chino achiwipe. ³² mwawa nichikuku kwe we numuwuye, nu mwenzo uwutonte, ukutetelana, ndivino Kilisitu watetezile mwemwe.