¹ Pamulandu wakwe choo nene, Pauli, ne wamuvingololo we Kilisitu Yesu kwakwe mwemwe wa makandi. ² Nakawuzyenye nkuti mwati mwivwa izya wufulo wankumbu zye Leza zino zyapilwe kwe nene kwakwe mwemwe. ³ Nkuwalika ukulingana nukuwumbulika ukumanyikwe kwe nene. Awuchisinka uwuvwame kwakwe vino nawalisile umwakuputula kwe mwemwe. ⁴ ndimwawazya choo, muliwa nukwivwichisya ichimanyisyo chane muchisinka ichivwame kuvye kilisitu. ⁵ Munkwatwa zinji ichisinka choo chitamanyisilwe ku wana wawantu. Kweni kanonzi chati chiwumbulikwa numuzimu kuwa positoli wakwe nawakasesema wano watantisilwe pamulimo woo. ⁶ Uwuchisinka uwuvwame woo awakuti wamakandi awampyani, nawanji wavyawi vyauwili, swinya awakwankana ilayizyo mwe Kilisitu Yesu ukupitila mwilandwe. ⁷ Amuno nizile nawa ne muwonvi wilandwe lyoo ni chawupi cha nkumbu zye Leza ichipwe kwe nene ukupitila ukuwombela kwa maka yakwe. ⁸ Kwakwe nene_chingatenga nemuchepelwe ku wantu wonsi awatele awa kwe Leza_inkumbu yoo yapilwe, ukuwizya kumakandi uwuwotoke wakuvwambilizya uwe Kilisitu, ⁹ ukuti nkalete ku lukozyo kwe wensi ukwelengania_ inkama iyivwame mu mpindi ni mpindi mwe Leza, wino welewuzile ivintu vyonsi ¹⁰ Amelenganio yaa yamanyisilwe ukupitila Ekeleziya apano wakavinda nawansambu mumasyo yamwiyulu wize wamanye uluko nuluko ulwa njelu zye Leza. ¹¹ Cho chawonvilwe ukulingana namelenganio yamuyaya yano wafichilisizye mwe Kilisitu Yesu Imfumu yitu ¹² Amuno mwakwe Kilisitu tulinukuyikungula nuwuwombeli lya kusuwila pamulandu wisuwilo lyitu mwe weliwe. ¹³ Achaleka nkulenga mwemwe muta languluka pamulandu nachino nkutamika pakwe mwemwe, chino awuchindami winu. ¹⁴ Pamulandu wakwe choo nkupetamika amakokola yane kwe Tata, ¹⁵ Kwe wino imbumba yonsi mwiyulu napansi yapansi yikwitwa. ¹⁶ Nkupepa kuno azumilizye mwemwe, ukulingana nuwuwotoke wawuchindami wakwe, pakuwomelezwa namaka ukupitila mumuzimu wakwe, wuno wli mwakwe mwemwe. ¹⁷ Nkupepa kuno Kilisitu ayine ayikale mu mwenzo yinu ukupitila isuwilo, ukuti mumele imisisi nukusimpa mulukundo lwakwe ¹⁸ umwakuti mufwile ukkwivwichisya, apaliponga nawantu watele wakwe Leza wonsi, uwufupi wuliwuli, uwutali, mupela, nuwuzike, ¹⁹ nukumanya ulukundo lwe Kilisitu, luno luchizile uwumanyinsanie,ukuti muyine mwizuzye nuwizule wonsi uwe Leza. ²⁰ Kanonzi kwe wino ayine ukuwomba ukupitilila vyonsi vino tukalenga pamwi ukwelengania,ukulingana namaka yakwe yano yakuwomba mwakwe sweswe, ²¹ Uwuchindami wuwe kwe weliwe mu keleziya namwe Kilisitu Yesu kunkwatwa zyonsi penye napenaye. Amen.