¹ Hindi nagawang pigilan ni Jose ang kanyang nararamdaman. Ayaw niyang umiyak sa harap ng kanyang mga lingkod, malakas niyang sinabi sa kanila, "Lumabas kayong lahat!" Matapos nilang lumabas, walang taga-Ehipto ang nandoon na kasama ni Jose nang sinabi niya sa kanyang mga lalaking kapatid kung sino siya. ² Umiyak siya ng napakalakas na pati ang mga tao sa labas ay nakarinig nito. ³ Sinabi ni Jose sa kanyang mga lalaking kapatid, "Ako si Jose! Buhay pa ba ang ating ama?" Ngunit ang kanyang mga lalaking kapatid ay hindi magawang sumagot, sapagkat sila ay natakot ng dahil sa kanyang sinabi. ⁴ Pagkatapos sinabi ni Jose sa kanyang mga lalaking kapatid, "Lumapit kayo sa akin!" Nang sila ay lumapit sa kanya, sinabi niya, "Ako ang inyong lalaking kapatid na si Jose! Ako ang inyong ipinagbili sa mga mangangalakal na siyang nagdala sa akin dito sa Ehipto! ⁵ Ngunit ngayon, huwag kayong magdalamhati at huwag magalit sa inyong mga sarili dahil ipinagbili ninyo ako bilang isang alipin. Ang Diyos ang siyang nagpadala sa akin dito, na nauna sa inyo upang hindi kayo mamatay sa tagtuyot. ⁶ Dalawang taon ng may tagtuyot sa lupaing ito at magpapatuloy ito ng lima pang mga taon. Sa mga panahong ito, walang mag-aararo ng lupain, at walang mga tanim na aanihin. ⁷ Nauna akong pinadala ng Diyos dito kaysa sa inyo upang hindi kayo magutom at upang tiyakin na makakaligtas ang inyong mga lahi. ⁸ Kaya nga, hindi kayo ang nagpadala sa akin dito; ang Diyos ang siyang nagpadala sa akin dito! Siya ang nagdulot sa akin na maging parang isang ama ng Paraon. Ako ang tagapamahala sa lahat ng mga nasa kanyang palasyo at ang gobernador ng lahat ng mga nasa Ehipto! ⁹ Ngayon, bumalik kayo agad sa aking ama at sabihin sa kaniya, 'Ito ang sinabi ng inyong anak na si Jose: "Ang Diyos ang nagdulot sa akin na maging gobernador sa buong lupain ng Ehipto. Magmadali kayong pumunta sa akin! ¹⁰ Maaari kayong manirahan sa rehiyon ng Gosen. Ikaw, ang iyong mga anak at mga apo, ang iyong mga tupa, mga kambing at mga baka, at ang lahat ng iyong mga pagmamay-ari ay malalapit sa akin. ¹¹ Titiyakin kong mayroon kayong pagkain, yamang magkakaroon ng lima pang mga dagdag na taon ng tagtuyot. Kung hindi kayo pupunta dito, ikaw at ang iyong pamilya at ang lahat ng iyong mga lingkod ay magugutom."' ¹² Kung kayo at si Benjamin, ay titingnan ako sa malapitan, makikita ninyong lahat na ako nga ito, si Jose, ang nakikipag-usap sa inyo. ¹³ Humayo kayo at sabihin sa aking ama ang tungkol sa kung gaanong karangalan ang mayroon ako dito sa Ehipto. At sabihin sa kanya ang tungkol sa lahat ng inyong mga nasaksihan. Magmadali kayong dalahin ang aking ama dito!" ¹⁴ Pagkatapos niyakap niya sa leeg ang kanyang lalaking kapatid na si Benjamin at umiyak. At niyakap siya ni Benjamin at umiyak. ¹⁵ Pagkatapos hinagkan niya sa pisngi ang kanyang mga nakakatandang lalaking kapatid at umiyak. Pagkatapos noon, nagsimula ng makipag-usap sa kanya ang kanyang mga lalaking kapatid. ¹⁶ May isang taong pumunta sa palasyo at sinabi ang balita na dumating ang mga lalaking kapatid ni Jose. ¹⁷ Ikinalugod ito ng Paraon at ng lahat ng kanyang mga opisyal. Sinabi ng Paraon kay Jose, "Sabihin mo ito sa iyong mga lalaking kapatid: Lagyan ninyo ng mga butil ang inyong mga hayop at bumalik sa lupain ng Canaan. ¹⁸ Pagkatapos dalhin ninyo ang inyong ama at ang inyong mga pamilya pabalik rito. Ibibigay ko ang pinakamagandang lupain sa Ehipto at makakakain kayo ng pinakamasasarap na pagkain sa lupain. ¹⁹ Sabihin mo rin ito sa iyong mga lalaking kapatid: 'Kumuha ng mga karitela mula sa Ehipto para magbuhat sa inyong mga anak at ng inyong mga asawa, at kunin sila at ang inyong ama at magmadali kayong bumalik dito. ²⁰ Huwag na ninyong alalahanin ang pagdadala ng inyong mga ari-arian, sapagkat ang kasaganahan ng Ehipto ay mapapasainyo. Nang dahil diyan, hindi na ninyo kinailangan pang dalhin ang mga bagay na mula sa Canaan.'" ²¹ Ginawa ng mga anak na lalaki ni Jacob ang iniutos ng Paraon. Binigyan sila ni Jose ng mga karitela at makakain sa daan, ayon sa utos ng Paraon. ²² Binigyan niya ng bagong damit ang bawat isa sa kanila, ngunit kay Benjamin, nagbigay siya ng tatlong daang piraso ng pilak at limang bihisan ng mga bagong damit! ²³ Ito ang kanyang ipinadala sa kanyang ama: Sampung lalaking mga asno, na may mga pinakamagandang mga bagay na mula sa Ehipto, at sampung mga babaing asno na may mga butil, tinapay, at iba pang makakain para sa paglalakbay ng kanyang ama patungong Ehipto. ²⁴ Pagkatapos pinaalis niya ang kanyang mga lalaking kapatid at sinabihan silang, "Huwag kayong mag-aaway sa daan!" ²⁵ Kaya ang mga magkakapatid na lalaki ay umalis ng Ehipto at pumunta sa kanilang amang si Jacob sa lupaing Canaan. ²⁶ Isa sa kanila ang nagsabi sa kanya, "Buhay pa si Jose! Sa katunayan nga, siya ang gobernador ng buong Ehipto!" Labis na namangha si Jacob; hindi siya makapaniwala na totoo ito. ²⁷ Ngunit sinabi nila ang lahat ng mga sinabi ni Jose sa kanila, at nakita ni Jacob ang mga karitela na ipinadala na magdadala sa kanya at sa kanyang pamilya at mga pag-aari patungong Ehipto. Huminahon si Jacob. ²⁸ Sinabi niya, "Ang iyong mga sinabi ay sapat na upang ako ay hikayatin! Ang aking lalaking anak na si Jose ay buhay pa, pupunta ako at makikipagkita sa kanya bago ako mamatay!"