¹ Ang taggutom sa Canaan ay lumala. ² Sa wakas, nang matapos kainin ni Jacob at ng kanyang pamilya ang lahat ng butil na binili nila mula sa Ehipto, sinabi ni Jacob sa kanila, "Bumalik kayo sa Ehipto at bumili ng ilan pang butil para sa atin!" ³ Ngunit sinabi ni Juda sa kanya, "Ang taong nagbenta sa atin ng butil ay mahigpit kaming binantaan, 'Hindi ko kayo hahayaan na makita ninyo ako muli kung babalik kayo at hindi kasama ang inyong nakababatang kapatid.' ⁴ Kaya kung ipapadala mo ang aming nakababatang kapatid sa amin, kami ay bababa sa Ehipto at bibili ng ilang butil para sa inyo. ⁵ Ngunit kung hindi ninyo siya ipapadala, hindi kami bababa doon, dahil sinabi ng taong iyon sa amin, ' hindi ko na kayo papayagan na makita ninyo pa ako ulit kung hindi ninyo kasama ang inyong nakababatang kapatid." ⁶ Nagtanong si Jacob, "Bakit idinulot ninyo sa akin na magkaroon ng ganitong kaguluhan sa pagsasabi sa taong iyon na mayroon pa kayong nakababatang kapatid?" ⁷ Sumagot ang isa sa kanila, "Ang taong iyon ay nagtanong tungkol sa atin at tungkol sa ating pamilya. Sinabi niya," Buhay pa ba ang iyong ama? Mayroon pa ba kayong ibang kapatid? Kailangan namin sagutin ang kanyang mga tanong. Hindi namin alam na sasabihin niyang, 'Sa susunod na bumalik kayo dito, isama ninyo ang inyong kapatid!"' ⁸ Pagkatapos sinabi ni Juda sa kanyang ama na si Jacob, "Ipadala ninyo ang batang lalaki sa akin at agad kaming aalis, upang tayo at ikaw, at ating mga anak ay makakuha ng butil at hindi mamamatay mula sa gutom. ⁹ Ako mismo ay nangangako na siya ay babalik. Maasahan mo ako na gagawin ko ang aking mga ipinangako. Kung hindi ko siya maibabalik sa iyo na ligtas, maaari mong sabihin habangbuhay na ako ang dapat sisihin. ¹⁰ Kung hindi tayo nagsayang ng maraming oras, sa ngayon nakapunta na kami doon at nakabalik na ng dalawang beses!" ¹¹ Pagkatapos sinabi ng kanilang amang si Jacob sa kanila, "Kung wala ng ibang paraan, gawin niyo ito: Ilagay ninyo sa inyong mga sako ang ilang mga magagandang tanim na tumutubo sa lupaing ito, at dalhin ninyo ito sa tao bilang isang regalo. Kumuha kayo ng ilang balsamo at pulot-pukyutan at mga pabango at mirra, at ilang mga pili at mga almendra. ¹² Doblehin ninyo ang perang dala ninyo dati, dahil kailangan ninyong ibalik ang pilak na inilagay sa itaas ng inyong mga sako. Marahil ito ay pagkakamali lang at sa inyong sako nailagay. ¹³ Kunin mo na ang iyong nakababatang kapatid na lalaki at bumalik ka sa taong iyon. ¹⁴ Ipapanalangin ko na ang Makapangyarihang Diyos ay magdulot sa taong iyon na maawa sa inyo, upang pabayaan ang iba mong kapatid, pati na rin si Benjamin, na makabalik dito kasama ninyo. Ngunit para sa akin, kung kukunin ang aking mga anak na lalaki mula sa akin, kung gayon wala na akong mga anak na lalaki!" ¹⁵ Kaya ang mga lalaki ay kinuha ang mga regalo na sinabi ni Jacob na dapat nilang kunin, at dalawang beses na dami ng pera na presyo ng butil. Kinuha din nila si Benjamin. Bumaba sila kaagad sa Ehipto, at tumayo sila sa harapan ni Jose. ¹⁶ Nang makita ni Jose si Benjamin na kasama nila, sinabi niya sa taong namamahala sa kanyang bahay," Dalhin mo ang mga taong ito sa aking bahay. Magkatay ka ng hayop at maghanda ng pagkain, dahil gusto kung kasama nila akong kumain sa tanghali." Sinabihan niya ang kanyang lingkod sa kung anong ayos ng pagkakaupo nila. ¹⁷ Ginawa ng taong ito ang utos ni Jose; dinala niya sila sa bahay ni Jose. ¹⁸ Ngunit sila ay natakot dahil dinala sila sa bahay ni Jose. At sila ay nag isip," Dinala niya tayo dito dahil sa pilak na inilagay sa ating mga sako noong unang pagpunta natin dito. Habang kami ay kumakain, aatakihin kami ng kanyang alipin at huhulihin at gagawin kaming kanyang mga alipin, at kukunin din nila ang aming mga asno." ¹⁹ Nagpunta sila kasama ang taong namamahala sa bahay ni Jose. Nang makarating sila sa pasukan ng bahay, ²⁰ isa sa kanila ang nagsabi sa kanya, "Pakiusap, ginoo, makinig po kayo sa akin. Bumaba kami dito noong nakaraan at bumili ng ilang butil. ²¹ Ngunit sa lugar kung saan kami huminto ng gabing pauwi na kami ng tahanan, binuksan namin ang aming mga sako. Kami ay nabigla na makita ito sa ibabaw ng aming mga sako ang eksaktong halaga ng pilak na aming ibinayad para sa mga butil! Kaya dinala namin ito pabalik kasama namin. ²² Nagdala rin kami ng marami pang pilak upang bumili ng maraming butil. Hindi namin alam kung sino ang naglagay ng pilak sa aming mga sako. ²³ Sumagot ang lalaki, "Huminahon ka! Huwag kayong mag-alala tungkol diyan, Natanggap ko ang pilak na iyong dinala. Ang iyong Diyos, ang Diyos na sinasamba ng iyong ama, siguro ang naglagay sa iyong mga sako." At pagkatapos dinala niya si Simeon sa kanila mula sa bilangguan. ²⁴ Pagkatapos dinala niya sila sa bahay ni Jose. Binigyan sila ng tubig upang hugasan ang kanilang mga paa at binigyan din sila ng pagkain para sa kanilang mga asno. ²⁵ Sinabi niya sa kanila na sila ay kakain kasama ni Jose sa tanghali. Kaya hinanda ng lalaki ang kanilang mga regalo upang ibigay kay Jose kapag dumating siya. ²⁶ Nang nakarating na si Jose sa bahay, iniharap nila sa kanya ang mga regalong dinala nila sa bahay. Pagkatapos sila ay yumukod sa lupa sa harapan niya. ²⁷ Sila ay tinanong niya kung sila ba ay mabuti, at pagkatapos tinanong niya, "Kamusta na ang kalusugan ng inyong matandang ama, ang taong sinabi ninyo sa akin? Buhay pa ba siya?" ²⁸ Isa sa kanila ang sumagot, "Opo, ang iyong lingkod, ang aming ama, ay buhay pa, at siya ay mabuti." Pagkatapos sila ay ulit na yumukod sa harap niya. ²⁹ Pagkatapos nakita niya ang kanyang nakababatang kapatid na si Benjamin, ibang anak na lalaki ng kanyang sariling ina. Tinanong niya sila, "Ito ba ang inyong nakababatang kapatid, ang taong sinabi ninyo sa akin? Pagkatapos nilang sinabi na "Opo," sinabi niya kay Benjamin, "Batang lalaki, ipinapanalangin ko na ang Diyos ay kumilos ng may kabutihan sa iyo." ³⁰ Mabilis na umalis si Jose sa silid. Napagtanto niya na malapit na siyang umiyak dahil napuno ang kanyang damdamin ng tungkol sa kanyang nakababatang kapatid. Siya ay pumunta sa pribado niyang silid at doon umiyak. ³¹ Pagkatapos, matapos niyang hugasan ang mga luha sa kanyang mukha, lumabas siya, at habang pinipigilan niya ang kanyang damdamin, sinabi niya sa mga lingkod," Ihain ninyo ang pagkain!" ³² Ngayon, ang mga tao ng Ehipto ay iniisip na kahiya-hiya para sa kanila na kumain kasama ang mga Hebreo, kaya ang mga lingkod ang naghain ng pagkain kay Jose na siya lang, at naghain para sa ibang tao ng Ehipto na kumain kasama niya na sila lang, at naghain sila sa mga nakatatandang kapatid ni Jose at ang nakababatang kapatid na sila lang. ³³ Nagulat ang kanyang mga kapatid na lalaki na makita na ang kanilang mga upuan ay nakaayos ayon sa kanilang mga edad, mula sa nakababata hanggang sa nakatatanda! ³⁴ Nang inihain ang mga bahagi ng pagkain sa kanila mula sa mesa ni Jose, ang bahagi ni Benjamin ay limang beses na mas marami kaysa sa bahagi ng iba! Kaya sila ay kumain at uminom ng alak kasama si Jose hanggang sa sila ay nagkasiyahan.