¹ Sumagmamano a tiempo ti napalabas kalpasan a natay ni Sarah, nangasawa ni Abraham iti sabali a babai, Ketura ti naganna. ² Saan a nagbayag, naganak daytoy iti innem a lallaki: ni Zimran, ni Jocsan, ni Medan, ni Midian, ni Isbac ken ni Sua. ³ Naaddaan ni Jocsan iti dua a putot a lallaki, da Seba ken Dedan. Dagiti kaputotan ni Dedan ket dagiti bunggoy dagiti Assurim, dagiti Letusim, ken dagiti Leummim. ⁴ Dagiti putot ni Midian ket da Efa, Efer, Hanoc, Abida ken Eldaa. Amin dagitoy ket kaputotan ni Ketura. ⁵ Imbaga ni Abraham a kalpasan a matay isuna, tawiden amin ni Isaac ti sanikuana. ⁶ Ngem kabayatan a sibibiag pay laeng ni Abraham, nangted isuna iti sagsagut kadagiti putotna a lallaki kadagiti nagbalin met nga assawana ket imbaonna ida tapno agnaed iti daga nga adda iti daya, tapno iyadayona ida manipud iti putotna a ni Isaac. ⁷ Nagbiag ni Abraham aginggana a nagtawen iti 175. ⁸ Natay isuna a lakay unayen ket naitipon kadagiti kapuonanna nga immuna a natay. ⁹ Intanem isuna da Isaac ken Ismael a putotna iti rukib nga adda idiay Macpela, iti asideg ti Mamre, iti talon a ginatang ni Abraham kenni Efron nga anak ni Zohar, a kaputotan ni Het. ¹⁰ Idiay ti nangitaneman da Isaac ken Ismael iti bagina, iti nangitaneman idi ni Abraham iti bagi ni Sarah nga asawana. ¹¹ Kalpasan a natay ni Abraham, binendisionan ti Dios ni Isaac. Intultuloy ni Isaac a nagnaed iti asideg ti Beer-lahai-roi. ¹² Dagitoy dagiti kaputotan a nagtaud kenni Ismael a putot ni Abraham, nga inyanak ti babai a tagabu ni Sarah, a ni Hagar a taga-Egipto. ¹³ Dagitoy dagiti nagnaganda, segun iti panagsasarunoda a naiyanak: ni Nebayot ti inauna nga putot ni Ismael. Simmaruno kenkuana a naiyanak da Kedar, Adbeel, Mibsam, ¹⁴ Misma, Duma, Masa, ¹⁵ Hadar, Tema, Jetur, Nafis ken Kedema. ¹⁶ Nagbalin a mangidadaulo dagiti sangapulo ket dua a putot ni Ismael kadagiti tribu nga addaan kadagidiay a nagnagan. Addaan iti tunggal maysa kadakuada iti bukodda a disso a pagnaedan ken pagkampoan. ¹⁷ Nagbiag ni Ismael aginggana a nagtawen iti 137. Kalpasanna, natay isuna ket naitipon kadagiti kapuonanna nga immuna a natay. ¹⁸ Nagnaed dagiti kaputotanna iti disso a nagbaetan ti Sur ken Havila, nga asideg iti ketegan ti Egipto no agdaliasat ti maysa a tao nga agturong idiay Assur. Ngem awan kapia iti nagbabaetanda bayat iti panagbiagda. ¹⁹ Kastoy ti napasamak maipapan kenni Isaac a putot ni Abraham. Ni Abraham ti ama ni Isaac. ²⁰ Idi agtawen ni Isaac iti uppat a pulo, inasawana ni Rebecca, a putot ni Betuel. Ni Betuel ket maysa kadagiti kaputotan ni Aram manipud iti Padan-aram. Ni Rebecca ket kabsat a babai ni Laban, a naibilang kadagiti Arameo. ²¹ Iti atiddog a tiempo kalpasan a nagasawada, saan pay laeng a naganak ni Rebecca. Isu a nagkararag ni Isaac kenni Yahweh maipapan iti asawana, ket sinungbatan ni Yahweh ti kararagna. Nagsikog ni Rebecca nga asawana. ²² Dua a maladaga ti sikogna, ket kanayonda nga agkinkinnidag. Isu a kinunana, "Apay a mapaspasamak kaniak daytoy?" Isu a sinaludsodna kenni Yahweh ti maipanggep iti daytoy. ²³ Kinuna ni Yahweh kenkuana, "Dua a nasion ti mapataudto manipud kadagiti singin a sikogmo. Ket agsinanto dagidiay a nasion, ket nabilbilegto ti maysa ngem iti maysa. Ket pagserbianto ti inauna iti ub-ubing." ²⁴ Idi naganak ni Rebecca, pudno! Singin a lallaki ti naiyanak! ²⁵ Ti umuna a naiyanak ket nalabaga, ken barbunan ti sibubukel a bagina, a kas iti pagan-anay a naaramid manipud iti dutdot. Isu a pinanagananda isuna iti Esau. ²⁶ Kalpasanna ket naiyanak ti kabsatna, nga ig-iggamanna ti mukod ni Esau. Isu a pinanagananda isuna iti Jacob. Agtawen ni Isaac iti innem a pulo idi naiyanak dagiti singin. ²⁷ Idi dimmakkel dagiti ubbing, nagbalin ni Esau a nalaing a mangnganup kadagiti atap nga ayup. Busbusbosenna ti adu a tiempona iti tay-ak. Idinto a naulimek a tao ni Jacob ket agtaltalinaed laeng iti asideg ti kampo. ²⁸ Ad-adda a kaykayat ni Isaac ni Esau, gapu ta pagaayatna ti raman ti karne dagiti ayup a maan-anupan ni Esau. Ngem ad-adda met a kaykayat ni Rebecca ni Jacob. ²⁹ Maysa nga aldaw, kabayatan nga aglutluto ni Jacob iti bukel, nagawid ni Esau manipud iti bakir ket nalaus ti bisinna. ³⁰ Kinunana kenni Jacob, "Ikkannak kadagita sumagmamano nga ilutlutom a nalabaga a bukel tapno kanek ita met laeng, gapu ta mabisinak unayen!" (Dayta ti makagapu a ti maysa pay a nagan ni Esau ket Edom.) ³¹ Kinuna ni Jacob, "Ikkanka iti kanem no ilakom kaniak ti karbengam a kas inauna nga anak a mangtawid iti kaaduan kadagiti kinabaknang ti amata." ³² Simmungbat ni Esau a kunana, "Matmatayakon iti nakaro a bisin. No matayak ita, saannakto a matulongan ti karbengak." ³³ Kinuna ni Jacob, "Isapatam kaniak nga itedmo kaniak ti karbengam a kas inauna nga anak!" Kasta ngarud ti inaramid ni Esau. Inlakona kenni Jacob ti karbenganna a kas inauna nga anak. ³⁴ Kalpasanna, inikkan ni Jacob ni Esau iti tinapay ken inabraw a bukel. Nangan ni Esau ken imminum, ket kalpasanna timmakder ken pimmanaw. Babaen iti panangaramidna iti dayta, impakita ni Esau a saan isuna nga interesado iti karbenganna a kas inauna nga anak.