¹ Itatta, lakay unayen ni Abraham. Binendisionan ni Yahweh iti adu a wagas ni Abraham. ² Maysa nga aldaw, kinuna ni Abraham iti panguloen dagiti adipen iti sangkabalayanna, ti lalaki a mangimatmaton iti amin a kukua ni Abraham, "Ikabilmo ta imam iti nagbaetan dagiti luppok ket ikarim nga aramidem ti ibagak kenka. ³ Ammom a ni Yahweh a Dios a nangparsua kadagiti langit ken ti daga, ket agdengdengngeg, ikarim a saankanto a mangala iti asawaen ti putotko, a ni Isaac, manipud kadagiti annak dagiti taga-Canaan a pakipagnanaedak ita. ⁴ Ngem ketdi, mapanka iti pagiliak ken kadagiti kabagiak. Mangala iti agbalin nga asawa ti anakko manipud kadakuada." ⁵ Nagsaludsod ti adipen kenni Abraham a kunana, "No makasarakak iti babai kadagiti kabagiam, ania ti rumbeng nga aramidek no saan isuna a sipapalubos a sumurot kaniak iti panagsublik iti daytoy a daga? Rumbeng kadi nga isurotko ti putotmo nga agsubli iti pagilian a nagapuam, tapno makasapul iti agbalin nga asawana ken agnaed sadiay?" ⁶ Simmungbat ni Abraham a kunana, "Saan! Siguradoem a saanmo nga ipan sadiay ti putotko! ⁷ Ni Yahweh a nangparsua kadagiti langlangit, impannak ditoy. Inruarnak manipud iti sangkabalayan ni amak ken manipud iti daga a pagnanaedan dagiti kabagiak. Nagsao kaniak ken sipupudno a nagkari kaniak. Kinunana, 'Itedkonto daytoy a daga ti Canaan kadagiti kaputotam.' Ibaonnanto ti anghelna nga umun-una kenka sadiay ken ikkannaka iti kabaelan a mangala iti agbalin nga asawa ti putotko ket isurotmo isuna nga agnaed ditoy. ⁸ Ngem no saan a sumurot kenka iti panagsublim ti masarakam a babai, nawayaka a mangiwaksi iti karim. Ti laeng banag a saanmo nga ar-aramiden ket ti ikuyogmo sadiay ti putotko." ⁹ Inkabil ngarud ti adipen ti imana iti nagbaetan dagiti luppo ni Abraham ket sipupudno a nagkari maipanggep iti daytoy a banag. ¹⁰ Kalpasanna, nangala ti adipen iti sangapulo a kamelio ti apona ket pinabaklayanna dagitoy iti amin a kita ti banbanag nga inted ti apona kenkuana nga itugotna. Ket pimmanaw isuna tapno mapan idiay Aram Naharaim, nga adda iti daya ti Mesopotamia. Simmangpet isuna idiay siudad ni Nahor. ¹¹ Rumabiin idi sumangpet ti adipen sadiay, ket nairana a daytoy ti oras a panagsakdo dagiti babbai sadiay manipud iti bubon. Pinaginanana dagiti kamelio iti abay ti bubon nga adda iti ruar ti siudad. ¹² Nagkararag ti adipen, "Yahweh, Dios a pagdaydayawan ti apok a ni Abraham, pagballigiennak koma iti daytoy nga aldaw! Ipakitam koma ti kinaimbagmo iti apok, a ni Abraham! ¹³ Denggennak kadi. Agtaktakderak ita iti asideg ti bubon, ket dagiti annak a babbai dagiti tattao iti siudad ket umayda agsakdo. ¹⁴ Dawatek ngarud kenka daytoy: Ibagakto iti maysa kadagiti babbai, 'Pangngaasim ta ibabam dayta karambam tapno makiinumak.' No kunaenna, 'Uminumka, ket sumadoakto met para kadagiti kameliom,' Ammokto nga isuna ti babai a pinilim nga agbalin nga asawa ti adipenmo a ni Isaac, ken ammokto met a tinungplamo ti karim iti apok." ¹⁵ Sakbay a nalpas isuna a nagkararag, simmangpet sadiay ti maysa a balasang nga agnagan iti Rebecca, awit-awitna ti maysa a karamba iti abagana. Putot isuna ni Betuel, nga anak a lalaki ni Milca nga asawa ti ub-ubing a kabsat a lalaki ni Abraham a ni Nahor. ¹⁶ Nakaliblibnos isuna ken birhen. Awan pay ti lalaki a nakikaidda kenkuana. Simmalog isuna iti igid ti bubon, pinunnona iti danum ti karambana, ket kalapasanna, simmang-at a nagsubli. ¹⁷ Nagdardaras a nagtaray ti adipen ni Abraham tapno sabtenna isuna, ket kinunana, "Pangngaasim ta ikkannak iti danum manipud dita karambam." ¹⁸ Simmungbat isuna, "Uminumka, apo!" Imbabana ti karambana manipud iti abagana kadagiti imana ket pinainumna ti adipen. ¹⁹ Kalpasan a pinainumna ti adipen, kinunana, "Agsakdoak met iti danum para kadagiti kameliom, agingga a mapnekda." ²⁰ Dagus nga inbukbokna ti danum ti karambana iti paginuman dagiti ayup. Ket nagtaray a nagsubli iti bubon, ket nagtultuloy a nangala iti danum para kadagiti amin a kamelio. ²¹ Binuybuya laeng ti adipen isuna, nga awan ti uray ania nga imbagana. Kayatna nga ammoen no pinagballigi ni Yahweh ti panagdaliasatna wenno saan. ²² Kamauddiananna, kalpasan nga imminum dagiti kamelio, nangiruar ti adipen iti balitok nga aritos ti agong nga agdagsen iti innem a gramo, ken dua a pulseras a balitok para kadagiti imana, agdagsen ti tunggal maysa iti agarup 110 a gramo, intedna dagitoy kenni Rebecca, ket imbagana nga isuotna dagitoy. ²³ Kalpasanna, kinunana, "Ibagam kaniak no siasino ti akin anak kenka. Ken adda kadi siled iti balay ti amam a mabalin a pagdagusanmi kadagiti kakaduak a lallaki ita a rabii?" ²⁴ Simmungbat isuna, "Betuel ti nagan ni tatangko. Isuna ket anak da Nahor ken Milca. ²⁵ Wen, adda siled a mabalin a pagturoganyo amin ita a rabii, ken addaankami met iti nawadwad a garami ken bukbukel a kanen dagiti kamelio," ²⁶ Nagruknoy ti adipen ket dinaydayawna ni Yahweh. ²⁷ Kinunana, "Pagyamanak ni Yahweh, a Dios a pagdaydayawan ti apok a ni Abraham. Intultuloyna nga impakita ti kinaimbagna ken kinapudnona iti apok. Indalannak ni Yahweh iti daytoy a panagdaliasat a diretso iti balay dagiti kabagian ti apok!" ²⁸ Nagtaray ti balasang ket imbagana kadagiti amin nga adda iti sangkabalayan ni inangna ti maipanggep iti napasamak. ²⁹ Addaan ni Rebecca iti kabsat a lalaki nga agnagan iti Laban. Nagdardaras ni Laban a napan iti ayan ti adipen, nga adda iti ruar iti abay ti bubon. ³⁰ Nasdaaw isuna a makakita iti aritos ti agong ken kadagiti pulseras iti ima ti kabsatna ken nangngegna ti imbaga ni Rebecca maipanggep iti imbaga ti lalaki kenkuana. Isu a rimmuar isuna ket nakitana ti lalaki a nakatakder iti asideg dagiti kamelio, iti abay ti bubon. ³¹ Kinunana iti lalaki, "Sika a binendisionan ni Yahweh, umayka! Apay nga agtaktakderka ditoy? Nangisaganaak iti siled a para kenka idiay balay, ken disso a paggianan dagiti kamelio. ³² Napan ngarud ti adipen iti balay, ket imbaba dagiti adipen ni Laban ti awit dagiti kamelio. Nangiyegda iti garami ken bukbukel para kadagiti kamelio, ken danum a pangbuggo ti adipen ken dagiti lallaki a kaduana kadagiti sakada. ³³ Nangisaganada iti taraon iti sagoananna tapno mangan isuna, ngem kinunana, "Saanak a mangan aginggana a maibagak kadakayo ti kasapulan nga ibagak." Isu a kinuna ni Laban, "Ibagam kadakami!" ³⁴ Kinuna ngarud ti adipen, "Adipennak ni Abraham. ³⁵ Binendisionan ni Yahweh iti aglaplapusanan ti apok isu a nagbalin isuna a nakabakbaknang. Inikkan isuna ni Yahweh iti adu a karnero ken baka, ken adu a balitok ken pirak, adipen a lallaki ken babbai, adu a kamelio ken as-asno. ³⁶ Ti asawa ti amongko a ni Sarah ket nagpasngay iti maysa a lalaki idi baket unayen isuna, ket inted amin ti apok ti sanikuana iti putotna. ³⁷ Pinagsapatanak ti apok a kinunana, 'Saanka a mangala iti agbalin nga asawa ti putotko manipud kadagiti annak dagiti taga-Canaan, nga isu ti daga a pagnanaedanmi. ³⁸ Ngem ketdi, agsublika iti pamilia ni amak, iti bukodko a puli, ket mangalaka manipud kadakuada iti agbalin nga asawa ti putotko.' ³⁹ Kalpasanna, sinaludsodko iti apok, 'Ania ti aramidek no ti babai nga itedda kaniak ket saan a sumurot kaniak iti panagsublik?' ⁴⁰ Simmungbat a kinunana, 'Ni Yahweh a kankanayon a nagtultulnogak, ibaonnanto ti anghelna a mangkadua kenka, ket pagballigiennanto ti panagdaliasatmo. Ikkannakanto iti kabaelan a mangala ti asawa para iti putotko manipud iti pulik, manipud iti pamilia ni tatangko. ⁴¹ Ngem no agkedked ti pulik a mangpalubos kenkuana a sumurot kenka iti panagsublim, mawayawayaankanto manipud iti pannakailunod gapu iti saanmo a pannakatungpal iti karim kaniak.' ⁴² Idi simmangpetak idiay bubon iti daytoy nga aldaw, nagkararagaka kinunak, 'Yahweh, Dios a pagdaydayawan ti apok a ni Abraham, no pagballigiennak iti daytoy a panagdaliasat, pangngaasim ta aramidem daytoy para kaniak: ⁴³ Agtaktakderak iti abay ti maysa a bubon, a pagsaksakdoan dagiti babbalasang. Dawatek kenka a no ibagak iti balasang, "Pangngaasim ta ikkannak iti bassit a danum nga inumek manipud dita karambam," ⁴⁴ ket no kunaenna kaniak, "Wen, uminomka, ken sumadoak met iti danum para kadagiti kameliom," ket dayta ngarud ti babai a pinilim para iti putot ti apok!' ⁴⁵ Sakbay a nalpasak a nagkararag, dimteng ni Rebecca nga awit-awitna ti karamba iti abagana. Bimmaba isuna idiay bubon tapno mangala iti danum. Kinunak kenkuana, 'Pangngaasim ta painumennak!' ⁴⁶ Dagus nga imbabana ti karambana ket kinunana, 'Uminumka! Ket sumakdoakto met para kadagiti kameliom,' Isu nga imminumak, ket napanna met insakdoan dagiti kamelio. ⁴⁷ Ket sinaludsodko kenkuana, 'Siasino ti akin anak kenka?' Kinunana, 'Putotnak ni Betuel nga anak da Nahor ken Milca,' Imbagak nga ikabilna ti aritos iti agongna ken isuotna dagiti pulseras kadagiti imana. ⁴⁸ Ket nagruknoyak ken nagdayawak kenni Yahweh, ken pinagyamanak ni Yahweh a Dios, a pagdaydayawan ti apok a ni Abraham, a nangiturong kaniak iti ummo a dalan tapno masarakak ti apoko ti kabsat a lalaki ti apok tapno agbalin nga asawa ti putot ti apok. ⁴⁹ Itatta, no ipakitayo ti kinaimbagyo iti apok kas paset iti pamiliana, ibagayo kaniak nga aramidenyo ti dawdawatek. No saanyo nga aramiden dayta, ibagayo met koma kaniak, tapno ammok ti aramidek." ⁵⁰ Simmungbat da Laban ken Betuel, "Nalawag a naggapu daytoy kenni Yahweh. Isu a saanmi a maibaga a dua no daytoy ti umno a banag wenno saan nga umno a banag nga aramiden. ⁵¹ Adda iti sangoanam ni Rebecca. Alaem isuna ket mapankayo, ket agbalin koma isuna nga asawa ti putot ti apom, kas imbaga ni Yahweh." ⁵² Idi nangngegan ti adipen ni Abraham dagitoy a sasao, nagpakleb isuna iti daga kas panagdayawna kenni Yahweh. ⁵³ Kalpasanna ket nangiruar ti adipen iti pirak ken balitok nga alahas ken kadagiti pagan-anay, ket intedna dagitoy kenni Rebecca. Ken inikkanna pay kadagiti sagut ti kabsat ni Rebecca a ni Laban kasta met iti inana. ⁵⁴ Kalpasanna, nangan ken imminumda. Nakiturog met dagiti lallaki a kadua ti adipen ni Abraham sadiay iti dayta a rabii. Iti kabigatanna, kinuna ti adipen, "Palubosandak ita nga agsubli iti apok." ⁵⁵ Ngem simmungbat ti kabsat ni Rebecca a lalaki ken ti inana, "Palubosam ti balasang nga agtalinaed kadakami iti agarup sangapulo nga aldaw. Kalpasan dayta, uray ikuyogmon isuna a mapan." ⁵⁶ Ngem simmungbat isuna kadakuada, "Pinagballigi ni Yahweh ti panagdaliasatko, isu a saandak koma a taktaken. Palubosandak koma a mangikuyog kenkuana iti panagsublik iti apok itattan!" ⁵⁷ Kinunada, "Ayabantayo ngarud ti balasang ket dawatentayo kenkuana nga ibagana no ania ti kayatna a mapasamak." ⁵⁸ Isu a pinaayabanda ni Rebecca ket sinaludsodda kenkuana, "Sumurotka kadin iti daytoy a lalaki itattan?" Simmungbat isuna, "Wen, sumurotak." ⁵⁹ Pinalubosanda ngarud ni Rebecca, a kaduana dagiti adipen a babbai a nangtartarabay kenkuana iti entero a panagbiagna, a sumurot iti adipen ni Abraham ken kadagiti lallaki a kaduana nga immay. ⁶⁰ Ket kiniddawda iti Dios a bendisionanna ni Rebecca ket kinunada kenkuana, "Kabsatmi, idawdawatmi a paadduen koma ni Yahweh iti riniwriw ti kaputotamto, ken ipalubosna koma a parmekenda a naan-anay dagiti amin a manggura kadakuada." ⁶¹ Ket nagsagana ni Rebecca ken dagiti babbalasang nga adipenna. Simmakayda kadagiti kamelioda ket simmurotda iti adipen ni Abraham. Inkuyogna ngarud ni Rebecca ket pimmanawda. ⁶² Agnanaed idi ni Isaac idiay Negev. Naggapu isuna idiay Beer-lahai-roi. ⁶³ Maysa a rabii rimmuar isuna iti taltalon tapno agpanunot kabayatan iti panpannagnana. Timmangad isuna ket nasdaaw idi makakita iti sumagmamano a kamelio a sumungsungad. ⁶⁴ Timmangad met ni Rebecca ket nakitana ni Isaac. Bimmaba isuna iti kamelio ⁶⁵ ket sinaludsodna iti adipen, "Siasino dayta a lalaki nga umas-asideg?" Simmungbat ti adipen, "Dayta ni Isaac nga apok." Isu nga innalana ti dalungdongna ket inabbunganna ti rupana, kas panangipakitana iti kinaemmana iti sangoanan ni Isaac. ⁶⁶ Imbaga ti adipen kenni Isaac iti amin a napasamak. ⁶⁷ Ket impan ni Isaac ni Rebecca iti uneg ti tolda a kukua idi ti inana, a ni Sarah, ket nagbalin nga asawana. Ay-ayatenna isuna. Iti kastoy a wagas, naliwliwa ni Isaac maipanggep iti pannakatay ti inana.