¹ Kalpasan iti sumagmamano a tiempo, adda iti nakaro a panagbisin iti daga. Sabali pay dayta iti nakaro a panagbisin a napasamak idi sibibiag pay ni Abraham. Isu a napan ni Isaac idiay abagatan a daya iti siudad ti Gerar tapno makisarita kenni Abimelec, nga ari dagiti Filisteo. ² Ngem nagparang ni Yahweh kenkuana ket kinunana, "Saanka a sumalog idiay Egipto! Agnaedka iti daga nga imbagak kenka! ³ Agtalinaedka iti daytoy a daga, ket tulongankan ken bendisionanka, gapu ta sika ken dagiti kaputotamto ti pangtedak kadagitoy amin a dagdaga, ket pudno a tungpalek ti karik iti amam. ⁴ Paaduekto dagiti kaputotam a kas iti kaadu dagiti bituen iti tangatang. Itedkonto amin dagitoy a dagdada kadagiti kaputotam, ken pagbalinekto dagiti kaputotam a pakabendisionan kadagiti amin a bunggoy dagiti tattao ditoy daga. ⁵ Aramidekto dayta gapu ta nagtulnog kaniak ni Abraham. Nagtulnog isuna iti amin nga imbagak kenkuana nga aramidenna, iti amin nga imbilinko kenkuana nga aramidenna, iti amin nga imbagak ken iti amin a linteg nga intedko kenkuana." ⁶ Isu a nagtalinaed ni Isaac idiay Gerar a kaduana ti asawana ken dagiti putotna. ⁷ Idi dinamag dagiti lallaki idiay Gerar ti kinasiasino ni Rebecca, insungbat ni Isaac a, "Kabsatko isuna." Kasta ti kinunana gapu ta mabuteng isuna a mangibaga nga, "Asawak isuna." Napanunotna, "Napintas unay ni Rebecca, isu a magustuandanto. Papatayendakto tapno laeng maalada isuna." ⁸ Maysa nga aldaw, idi nabayagen nga agigian ni Isaac sadiay, timman-aw ni Abimelec nga ari dagiti Filisteo manipud iti tawa ti palasiona ket naklaat a nakakita a lalailoen ni Isaac ni Rebecca. ⁹ Isu a pinaayaban ni Abimelec ni Isaac ket kinunana kenkuana, "Naamirisko itan a pudno nga asawam isuna! Isu nga apay nga imbagam a, 'Kabsatko isuna'?" Insungbat ni Isaac kenkuana, "Imbagak dayta gapu ta napanunotko a mabalin a papatayennak iti siasinoman ditoy tapno maalada isuna." ¹⁰ Kinuna ni Abimelec, "Saanmo a rumbeng nga inaramid daytoy kadakami! Mabalin a kaiddaen iti maysa kadagiti tattaomi ti asawam, ket pagbasolennakami iti dakkel!" ¹¹ Ket binilin ni Abimelec amin a tattaona, a kunana, "Saanyo a dangran daytoy a lalaki wenno ti asawana! Ti siasinoman a mangaramid iti dayta ket mapapatay!" ¹² Nagmula ni Isaac kadagiti bukbukel iti dayta a tawen, ket nagapit isuna iti adu unay nga apit, gapu ta binendisionan isuna ni Yahweh. ¹³ Nagtultuloy ti pannakagun-od ni Isaac iti adu a sanikuana, inggana a nagbalin isuna a nakabakbaknang. ¹⁴ Naaddaan isuna iti adu a karnero, kalkalding, ken bakbaka, ken adu a tagabu. Gapu iti dayta, inapalan isuna dagiti Filisteo. ¹⁵ Isu nga amin a bubon a kinali dagiti adipen ni Abraham nga amana ket ginaburan dagiti tattao iti daga. ¹⁶ Kalpasanna, kinuna ni Abimelec kenni Isaac, "Nagbalinkan a nabakbaknang ngem kadakami, isu a kayatko a pumanawka ditoy lugarmi." ¹⁷ Isu a manipud sadiay, immakar ni Isaac ken ti pamiliana. Napanda impatakder dagiti toldada idiay tanap ti Gerar ket nagnaedda sadiay. ¹⁸ Adda sumagmamano a bubon iti dayta a disso a nakali idi sibibiag pay ni Abraham nga ama ni Isaac, ngem ginaburan dagitoy dagiti Filisteo idi natayen ni Abraham. Ngem kinali manen ni Isaac ken dagiti adipenna dagidiay a bubon, ket pinanaganan ni Isaac dagiti bubon iti isu met laeng a nagnagan kas impanagan ni Abraham nga amana kadakuada. ¹⁹ Nagkali dagiti adipen ni Isaac iti tanap ket nakasarakda iti ubbog. ²⁰ Ngem nakisinnuppiat dagiti lallaki nga agipaspastor kadagiti ayup idiay tanap ti Gerar kadagiti agay-aywan kadagiti ayup ni Isaac. Kinunada, "Kukuami ti danum iti daytoy a bubon!" Isu a pinanaganan ni Isaac ti bubon iti Esek, nga iti kayatna sawen ket "suppiat," gapu ta nagsisinnuppiatanda no siasino ti akinkukua iti daytoy. ²¹ Kalpasanna, nagkali dagiti adipen ni Isaac iti sabali pay a bubon, ngem nagaapaanda manen no siasino ti akinkukua iti daytoy. Isu a pinanaganan ni Isaac daytoy iti Sitnah, nga iti kayatna sawen ket "nagririan." ²² Immakarda manipud sadiay ket nagkalida iti sabali pay a bubon, ngem iti daytoy a tiempo ket awanen iti nagaapa maipanggep iti akinkukaua iti bubon. Isu a pinanagananna iti Rehobot, nga iti kayatna a sawen ket "unga-ong a lugar," kunana, "Inikkannatayo ni Yahweh iti unga-ong a lugar a pagnaedantayo, maysa a lugar a saan a kayat dagiti dadduma a tattao, ket agbalintayonto a narang-ay unay ditoy." ²³ Manipud sadiay, simmang-at ni Isaac idiay Beerseba. ²⁴ Iti umuna a rabii a kaaddana sadiay, nagparang ni Yahweh kenkuana ket kinunana, "Siak ti Dios a nagrukbaban ni Abraham nga amam. Saanka nga agbuteng iti aniaman. Tulonganka ken bendisionanka, ken gapu iti inkarik kenni Abraham nga adipenko, paaduekto iti kasta unay ti bilang dagiti kaputotam." ²⁵ Isu a nangbangon ni Isaac iti altar sadiay ket nangidatag iti daton kas panagrukbabna kenni Yahweh. Impatakderna dagiti toldada idiay, ket nangrugi a nagkali dagiti adipenna iti bubon. ²⁶ Kabayatan a kalkalienda ti bubon, napan ni Ari Abimelec iti ayan ni Isaac manipud idiay Gerar, a kaduana ni Ahuzzat, a mamalbalakadna, ken ni Ficol, a pangulo ti armadana. ²⁷ Sinaludsod ni Isaac kaduada, "Ginuradak idi ken pinapanawdak. Apay ngarud nga immaykayo kaniak ita?" ²⁸ Simmungbat ti maysa kadakuada, "Nakitami a tultulongannaka ni Yahweh. Isu a kinunami iti maysa ken maysa, "Masapul nga adda iti katulagan iti nagbaetantayo ken ni Isaac.' Mangaramidtayo ngarud iti katulagan ti kapia iti nagbabaetantayo, ²⁹ ket mailanad iti daytoy a saannakaminto a dangran, iti isu met laeng a wagas a saanmi a panangdangran kenka. Trinatodaka a kanayon iti nasayaat, ken pinapanawdaka a sitatalna. Ket ita benbendisionannaka ni Yahweh." ³⁰ Isu a nangisagana ni Isaac iti padaya para kadakuada, ket nangan ken imminumda amin. ³¹ Ket iti kabigatanna, nagsapatada iti tunggal maysa nga aramidenda ti inkarida. Ket sikakapia a pinaawid ida ni Isaac. ³² Iti dayta nga aldaw, napan dagiti adipen ni Isaac kenkuana ket imbagada ti maipanggep iti bubon a nalpasdan a kinali. Kinunada, "Nakasarakkami iti danum idiay bubon!" ³³ Pinanaganan ni Isaac ti bubon iti Shiba, a kas iti maysa a sao iti Hebreo nga iti kayatna a sawen ket "kari." Inggana kadagitoy a tiempo ket napanaganan ti ili idiay iti Beersheba nga iti kayatna a sawen ket "bubon ti katulagan ti kapia." ³⁴ Idi agtawen ni Esau iti uppat a pulo, inasawana ni Judit, a putot ni Beeri, ken ni Basemat, a putot ni Elon. Agpada a nagtaud iti kaputotan ni Het dagitoy a babbai, saanda a nagtaud iti puli ni Isaac. ³⁵ Pinagbalin dagiti dua nga assawa ni Esau ti biag da Isaac ken Rebecca a nariribuk.