¹ Pimmanaw ni Abraham idiay Mamre ket nagturong idiay abagatan a laud iti disierto ti Negeb. Sadiay, nagnaed isuna iti nagbaetan ti Kades ken Sur. Nagnaed isuna a kas gangganaet iti ili ti Gerar. ² Kabayatan ti kaaddana sadiay, imbagana kadagiti tattao a kabsatna ni Sarah a saan ket nga asawa. Ket nangibaon ni Ari Abimelec ti Gerar kadagiti sumagmamano a soldadona a mangala kenni Sara, ket inyegda isuna kenkuana tapno agbalin nga asawana. ³ Ngem nagparang ti Dios kenni Abimelec iti maysa a tagtagainep kabayatan ti rabii ket kinunana kenkuana, "Dumngegka kaniak! Matayka gapu ta ti babai nga innalam ket asawa ti maysa a lalaki." ⁴ Ngem saan pay a nakikaidda ni Abimelec kenkuana, isu a kinunana, "Apo, agsipud ta siak ken dagiti tattao iti pagiliak ket awan basolna, papatayennakami kadi? ⁵ Imbaga ni Abraham kaniak, 'Isuna ket kabsatko a babai,' ket kinunana met kaniak nga 'Isuna ket kabsatko a lalaki.' Saanko nga inggagara ti mangaramid iti aniaman a biddut; kasta met nga awan iti inaramidko a biddut." ⁶ Kinuna ti Dios kenkuana, "Wen, ammok a saanmo a kayat ti agaramid iti aniaman a biddut. Isu't gapuna nga inliklikka iti panagbasolmo kaniak. Saanko nga intulok a sagidem isuna. ⁷ Ngarud, isublim daytoy nga asawa iti lalaki nga asawana gapu ta isuna ket maysa a profeta. Ikararagannakanto tapno iti kasta ket agbiagka. Ngem no saanmo nga isubli ti asawana kenkuana, awan duadua a mataykanto ken kasta met a matay amin dagiti kameng iti pagtaengam." ⁸ Nasapa iti kabigatanna, pinaayaban ni Abimelec dagiti amin nga opisialna ket imbagana kadakuada ti tunggal banag a napasamak. Idi nangngegda dayta, napalalo ti buteng dagiti tattaona nga amangan no dusaen ida ti Dios. ⁹ Pinaayaban ngarud ni Abimelec ni Abraham ket kinunana kenkuana, "Saan a rumbeng nga inaramidmo dayta kadakami? Adda kadi naaramidko a biddut kenka? Siak kadi ti nangipagapu nu apay a kayatmo a makaaramidak iti dakkel a basol ken kasta met dagiti tattaok? Inaramidmo kaniak dagiti banag a saan a rumbeng nga aramidem! ¹⁰ Apay nga inaramidmo daytoy?" ¹¹ Insungbat ni Abraham, "Imbagak a kabsatko isuna gapu ta impagarupko a, 'Dagiti tattao iti daytoy a lugar ket sigurado nga awan panagraemda iti Dios. Sigurado nga aramidenda ti aniaman a biddut a banag a kayatda. Isu a papatayendak tapno maalada ti asawak.' ¹² Maysa pay, pudno a maibilang a kabsatko ni Sarah gapu ta putot isuna ti amak, nu pay saan isuna nga anak ti inak. Ta anakna isuna ti sabali a babai, ket inasawak isuna." ¹³ Saan a nagbayag, idi imbaga ti Dios kaniak a pumanawak iti pagtaengan ti amak, kinunak kenkuana, "Daytoy ti wagas a pangipakitaam iti kinapudnom kaniak: Iti sadinoman a papananta, ti ibagam maipapan kaniak ket kastoy, "Daytoy ket kabsatko a lalaki.'"" ¹⁴ Isu a nangiyeg ni Abimelec iti sumagmamano a karnero ken baka ket intedna kenni Abraham. Inikkanna pay isuna iti sumagmamano a lallaki ken babbai a tagabu. Kalpasanna, insublina ti asawa ni Abraham a ni Sarah. ¹⁵ Ket kinuna ni Abimelec kenkuana, "Kitaem! Adda iti sangoanam ti dagak. Agnaedka iti sadinoman a lugar a kayatmo!" ¹⁶ Ket kinunana kenni Sara, "Kitaem! Mangtedak iti sangaribu a pidaso ti pirak iti kabsatmo. Daytoy ti mangpatalged nga awanto ti mangibutaktak manen iti daytoy a banag ken awanto ti mangibaga nga adda naaramidmo a biddut." ¹⁷ Kalpasanna ket nagkararag ni Abraham iti Dios, ket pinaimbag ti Dios ti asawa ni Abimelec ken dagiti babbai a tagabuna tapno iti kasta ket maaddaanda iti annak. ¹⁸ Daytoy ket gapu ta pinagbalin ni Yahweh a saan a makaanak ti siasinoman kadagiti babbai iti pagtaengan ni Abimelec, gapu iti panangala ni Abimelec iti asawa ni Abraham a ni Sarah.