¹ Iti dayta a rabii, dimteng dagiti dua nga anghel idiay Sodoma. Agtugtugaw ni Lot iti ruangan ti siudad. Idi nakitana ida, timmakder isuna tapno kablaawanna ida ken nagpakleb iti daga. ² Kinunana kadakuada, "Appo, pangngaasiyo ta umyankayo iti balayko ita a rabii. Mabalinyo a buggoan dagiti sakayo ket ituloyyo a masapa inton bigat ti panagdaliasatyo." Ngem kinunada, "Saan, uray maturogkami lattan iti plasa ti siudad." ³ Ngem kasta unay ti panangallukoy ni Lot kadakuada a maturogda iti balayna. Isu a napanda iti balayna, ket insaganaanna ida iti kanenda. Nangiluto isuna iti tinapay nga awan lebadurana ket kinnanda daytoy. ⁴ Idi nalpasda a nangan, sakbay a mapanda agidda, pinalawlawan dagiti lallaki iti siudad ti Sodoma, manipud kadagiti agtutubo aginngga kadagiti lallakay, ti balay. ⁵ Pinukkawanda ni Lot, kinunada, "Sadino ti ayan dagiti lallaki nga immay iti balaymo ita a rabii? Irruarmo ida tapno kaiddaenmi ida." ⁶ Rimmuar ni Lot iti balay ket inserrana ti ridaw iti malikudanna tapno saanda a makastrek. ⁷ Kinunana kadakuada, "Gagayyemko, saankayo koma nga agaramid iti dakes a banag! ⁸ Dumngegkayo kaniak, adda dua nga annakko a babai a saan pay a pulos a nakikaidda iti siasinoman a lalaki. Irruarko ida ita, ket mabalinyo nga aramiden kadakuada ti aniaman a makaay-ayo kadakayo. Ngem saankayo koma nga agaramid iti aniaman kadagitoy a lallaki, gapu ta sangailida iti balayko, isu a masapul a salaknibak ida!" ⁹ Ngem insungbatda, "Aglisika iti dalanmi! Maysaka a ganggannaet; Isu nga awan ti karbengam a mangibaga kadakami no ania ti umno! Dakdakes ti aramidenmi kenka ngem ti aramidenmi kadakuada!" Kalpasanna, induronda ni Lot ket pinadasda a rakraken ti ridaw. ¹⁰ Ngem in-inayad a linukatan dagiti dua nga anghel ti ridaw ket ingguyodda ni Lot iti uneg ti balay. Ket inserrada a dagus ti ridaw. ¹¹ Ket amin dagiti lallaki nga adda iti ruar ti balay, agtutubo ken lallakay ket pinagbulsekda ida tapno saanda a masarakan ti ridaw. ¹² Ket kinuna dagiti dua nga anghel kenni Lot, "Siasino pay ti kaduam ditoy? No adda putotmo a lallaki wenno manugangmo a lallaki wenno annakmo a babai wenno siasinoman nga adda pakainaiganna kenka, ipanawmo ida iti siudad, ¹³ gapu ta dadaelenmin daytoy a lugar. Nangngeg ni Yahweh dagiti adu a nakaal-alinggaget a banag nga imbaga dagiti dadduma a tattao maipanggep iti daytoy a siudad, isu nga imbaonnakami a mangdadael iti daytoy." ¹⁴ Isu a napan kinasarita ni Lot dagiti lallaki a nagkari a mangasawa kadagiti annakna. Kinunana kadakuada, "Darasenyo! Pumanawkayon iti daytoy a siudad, gapu ta dadaelenen ni Yahweh daytoy." Ngem impagarup dagiti manugangenna nga agang-angaw isuna. ¹⁵ Idi dandanin aglawag iti kabigatanna, pinilit dagiti dua nga anghel ni Lot, a kinunada, "Bumangonkayo a dagus! Ayabam ti asawam ken dagiti dua nga annakyo nga adda ditoy ket pumanawkayon! Ta no saan, mairamankayo a mapukaw inton dadaelenmi ti siudad!" ¹⁶ Idi nagkedked ni Lot, ginammatan dagiti anghel ti imana ken ti ima ti asawana ken dagiti ima dagiti dua nga annakna a babbai. Sitatalged nga inturongda ida iti ruar ti siudad. Inaramid dagiti anghel dayta gapu ta agtigtignay a siaasi ni Yahweh kadakuada. ¹⁷ Idi addadan iti ruar ti siudad, kinuna ti maysa nga anghel, "No kayatyo pay ti agbiag, darasenyo ti umadayo! Saankayo a tumaltaliaw! Ken saankayo nga agsardeng iti sadinoman idiay tanap! Agkamangkayo kadagiti turturod! Ta no saan, mataykayo!" ¹⁸ Ngem kinuna ni Lot iti maysa kadakuada, "Saan apo, saanyo nga ipaaramid kaniak dayta! ¹⁹ Pangngaasiyo ta dengngendak. Naay-ayokayo kaniak ken naimbagkayo unay kaniak ket kinaasianyo ti biagko. Ngem saanak a makataray iti bantay. No aramidek dayta, matayak iti daytoy a didigra. ²⁰ Dumngegkayo kaniak. Adda maysa nga ili iti asideg. Bay-andak nga agkamang sadiay. Bassit laeng daytoy nga ili ket no saanyo a dadaelen daytoy maisalakan ti biagmi no mapankami idiay." ²¹ Kinuna ti maysa nga anghel kenni Lot, "Palubosanka a mangaramid iti kiniddawmo. Ket saanko a dadaelen ti ili nga ibagbagam. ²² Ngem darasenyo koma! Tumaraykayo sadiay, gapu ta saanko a madadael ti aniaman a banag agingga a makadanunkayo sadiay." Iti saan a nagbayag, pinanaganan daytoy dagiti tattao nga ili iti Soar a ti kayatna a sawen ket 'bassit' gapu ta kinuna ni Lot a bassit daytoy. ²³ Idi agsingsingisingen ti init, nakadanunen da Lot ken ti pamiliana iti ili a maaw-awagan itan iti Soar. ²⁴ Ket kasla tudo a pinagtinnag ni Yahweh ti apuy ken gumilgil-ayab nga asupre idiay Sodoma ken Gomorra manipud iti tangatang. ²⁵ Iti kasta a wagas, dinadaelna dagidiay a siudad ken amin dagiti tattao nga agnanaed kadagidiay a siudad. Dinadaelna met amin a banag iti tanap agraman amin dagiti mulmula. ²⁶ Ngem nagsardeng ket timmalliaw ti asawa ni Lot tapno kitaenna no ania ti mapaspasamak, isu a natay isuna ket iti saan a nagbayag nagbalin ti bagina nga adigi iti asin. ²⁷ Iti dayta nga agsapa, napan ni Abraham iti lugar a nagtakderanna idi iti sangoanan ni Yahweh. ²⁸ Tinannawaganna ti Sodoma ken Gomorra ket nakigtot isuna a nakakita iti asuk nga agpangpangato, nga agtaud iti entero a tanap a kasla asuk nga agtaud iti dakkel nga urno. ²⁹ Isu nga idi dinadael ni Yahweh dagidiay a siudad iti tanap, saanna a nalipatan a tinulongan ni Abraham ket inispalna ni Lot manipud iti didigra a napasamak iti siudad a nagnaedan ni Lot. ³⁰ Mabuteng ni Lot nga aggian idiay Soar isu a pimmanaw isuna sadiay ket immakar iti bantay a kaduana dagiti dua a putotna a babbai ket nagnaedda iti maysa a rukib. ³¹ Maysa nga aldaw, kinuna ti inauna nga anak iti inaudi nga anak, "Lakayen ti amata ket awan siasinoman a lalaki iti daytoy a disso a mangkaidda kadata a kas iti ar-aramiden dagiti tattao iti amin a lubong. ³² Painumen ta ti amata iti arak agingga a mabartek. Ket mabalinta ti makikaidda kenkuana a saanna nga ammo. Iti kasta a wagas, mapagsikognata ket aganakta nga agbalinto a kaputotan ti amata. ³³ Isu nga iti dayta a rabii, binartekda ti amada. Ket napan nakikaidda iti amana ti inauna nga anak, ngem nakaro unay ti bartek ni Lot ket saanna nga ammo idi nakikaidda ti putotna kenkuana ken uray idi bimmangon daytoy. ³⁴ Iti simmaruno nga aldaw, kinuna ti inauna nga anak iti inaudi nga anak, "Dumngegka kaniak. Idi rabii, nakikaiddaak iti amata. Inton rabii bartekenta manen isuna! Iti daytoy a gundaway mabalinmo ti makikaidda kenkuana. No makikaidda isuna kenka mabalin nga agsikogka ket iti kasta a wagas maaddaanka met iti anak." ³⁵ Isu nga iti dayta a rabii, binartekda manen ti amada ket kalpasanna, napan nakikaidda kenni Lot ti inaudi nga anakna. Ngem nakaro unay manen ti bartekna ket saanna nga ammo idi nakikaidda ti inaudi a putotna kenkuana ken uray idi bimmangon daytoy. ³⁶ Isu a ni Lot ti gapuanan ti panagsikog dagiti dua nga annakna. ³⁷ Ket iti saan a nagbayag impasngay ti inauna ti maysa a lalaki a pinanagananna iti Moab. Isuna ti nagbalin a kapuonan dagiti bunggoy ti tattao a Moabita. ³⁸ Ket impasngay met ti inaudi nga anak ti maysa a lalaki a pinanagananna iti Ben Ammi. Isuna ti nagbalin a kapuonan dagiti bunggoy ti tattao a maaw-awagan ita iti Ammonita.