¹ Nasayaat ni Yahweh kenni Sarah, a kas imbagana nga aramidenna. Inaramidna para kenni Sarah ti ingkarina nga aramidenna ² ta nagsikog isuna ket naganak iti lalaki a para kenni Abraham idi lakay unayen isuna, iti tiempo nga inkari ti Dios a panakapasamakna. ³ Pinanaganan ni Abraham iti "Isaac" ti impasngay ni Sarah. ⁴ Kinugitna met ni Isaac a putotna idi walo nga aldawna, kas imbilin kenkuana ti Dios nga aramidenna. ⁵ Agtawen ni Abraham iti sangagasut idi naiyanak ti anakna a ni Isaac. ⁶ Kinuna ni Sarah, "Nu pay nalidayak idi gapu ta awananak iti annak, inikkannakon ita ti Dios iti makagapu nga agkatawaak a siraragsak, ken aminto a makangeg iti inaramid ti Dios para kaniak ket makipagkatawanto kaniak." ⁷ Kinunana pay, "Awan ti siasinoman a nangibaga kenni Abraham nga addanto aldaw nga agpasusuoak iti ubing, ngem naganakak iti ubing a lalaki idi lakay unayen ni Abraham." ⁸ Dimmakkel ti ubing. Dimteng ti aldaw ti pannakapusotna. Iti dayta nga aldaw, nangisagana ni Abraham iti dakkel a padaya tapno agrambak. ⁹ Maysa nga aldaw, nadlaw ni Sarah a pagang-angawan ti anak ni Hagar a ni Ismael ni Isaac. ¹⁰ Isu a kinunana kenni Abraham, "Papanawem dayta a tagabu a babai a naggapu idiay Egipto ken ti anakna a lalaki! Diak kayat nga alaen ti anak dayta a tagabu a babai ti tawiden ni Isaac nga anakko." ¹¹ Nariribukan unay ni Abraham maipapan iti dayta a banag, gapu ta maseknan met isuna maipapan iti anakna a ni Ismael. ¹² Ngem kinuna ti Dios kenni Abraham, "Saanka a madanagan iti maipapan iti putotmo a ni Ismael, ken iti tagabum a ni Hagar. Denggem ti amin nga ibaga kenka ni Sarah nga aramidem, ket aramidem daytoy, gapu ta ni Isaac ti pagtaudan dagiti kaputotam nga inkarik kenka nga itedko. ¹³ Ngem pagbalinekto met ti anak a lalaki ti tagabum a ni Hagar nga agbalin a kapuonan dagiti naindaklan a bunggoy dagiti tattao, gapu ta putotmo met isuna." ¹⁴ Isu a nasapa a bimmangon ni Abraham iti kabigatanna. Nangisagana iti sumagmano a taraon, nangikabil ti danum iti maysa a pagkargaan, ket intedna kenni Hagar. Ingkabilna ti pagkargaan iti abagana, ket impaubbana kenkuana ni Ismael ket imbaonna ida idiay let-ang ti Berseeba. ¹⁵ Kalpasan a naibus da Hagar ken ti anakna ti danum nga adda iti pagkargaan, ingkabilna ti ubing iti sirok ti maysa kadagiti narukbos a kayo idiay. ¹⁶ Kalpasanna, napan nagtugaw iti asideg, kas iti kaadayu iti naibiat a pana. Panpanunotenna, "Saanko a maibturan a kitaen ti anakko a matay!" Bayat iti panagtugtugawna sadiay, nangrugi isuna a nagsangit iti napigsa. ¹⁷ Saan a nagbayag, nangngeg ti Dios ti timek ni Ismael, isu nga imbaonna ti maysa kadagiti anghelna manipud langit a mapan kenni Hagar. Kinunana, "Hagar, ania ti mapaspasamak kenka? Saanka nga agbuteng, gapu ta nangngeg ti Dios ti ubing nga agasangsangit idiay. ¹⁸ Mapanka ket patakderem ti ubing ken tulongam isuna nga agbalin a natured, gapu ta pagbalinekto a dakkel a bunggoy ti tattao dagiti kaputotanna." ¹⁹ Kalpasanna, impakita ti Dios kenkuana ti maysa a bubon. Napan ngarud ni Hagar iti ayan ti bubon ket pinunnona ti pagkargaan iti danum, ket pinainumna ti ubing a lalaki. ²⁰ Tinulongan ti Dios ti ubing a lalaki kabayatan iti panagdakkelna idiay let-ang, ket nagbalin isuna a nalaing a pumapana. ²¹ Nagnaed isuna idiay let-ang ti Paran. Nangala ni Hagar iti asawaenna manipud iti Egipto. ²² Iti dayta a tiempo, ni Ari Abimelac ken ni Ficol a mangidadaulo iti Armadana ket kinunada kenni Abraham, "Nalawag a ti Dios ket tultulungannaka iti isuamin nga ar-aramidem. ²³ Isu nga ita, sipapasnekka nga agkari kaniak ditoy, iti imatang ti Dios, a saannakto nga allilawen ken kasta met dagiti annakko, wenno dagiti kaputotak. Agtignayka a sipupudno kaniak ken kadagiti amin a tattao iti daytoy a pagilian nga isu iti pagnanaedam ita. Agtinayka a sipupudno kaniak, a kas met iti inaramidko kenka." ²⁴ Isu a nagsapata ni Abaraham nga aramidenna ti inkarina. ²⁵ Nagreklamo met ni Abraham kenni Abimelec maipanggep iti maysa kadagiti bubon ni Abraham nga inagaw dagiti adipen ni Abimelec. ²⁶ Ngem kinuna ni Abimelec, "Saanko nga ammo no siasino iti nangaramid iti dayta. Saanmo nga imbaga kaniak iti napalabas, ken saanko pay a nangnangegan ti maipapan iti daytoy agingga ita nga aldaw." ²⁷ Isu a nangala ni Abraham iti sumagmamano a karnero ken baka ket intedna kenni Abimelec, ket nagkinnarida nga agtalinaed ti kapia iti nagbaetanda a dua. ²⁸ Napan ni Abraham iti arbanna ket nangpili iti pito a kaba-ian a kordero manipud iti daytoy. ²⁹ Sinaludsod ni Abimelec kenni Abraham, "Apay nga innalam dagitoy a pito a kordero a kaba-ian manipud iti arbanmo?" ³⁰ Simmungbat ni Abraham, "Awatem koma dagitoy a kaba-ian a kordero manipud kaniak. Iti kastoy a wagas, ti sagutko kenka ket isu iti mangpaneknek iti amin a daytoy a bubon ket kukuak gapu ta kinalik daytoy." ³¹ Inawat ngarud ni Abimelec dagiti kordero. Kalpasanna, pinanaganan ni Abraham dayta a disso iti Beerseba, a ti kayatna a sawen ket 'Bubon iti karinkari,' gapu ta nagsapatada a dua kenni Abimelec sadiay nga agtalinaed ti kapia iti nagbaentanda a dua. ³² Kalpasan a naaramidda ti katulagan idiay Beerseba, pimmanaw ni Abimelec ken ti pangulo ti armadana a ni Ficol, ket nagsublida iti daga dagiti Filisteo ³³ Nagmula ni Abraham iti kayo a tamarisko sadiay, ket sadiay, dinaydayawna ni Yahweh nga agnanayon a Dios. ³⁴ Nagnaed ni Abraham a kas gangannaet iti daga dagiti Filisteo iti atiddog a panawen.