¹ Pachisila pali vino kwali ulusechelo lwa wa Yuda, nukuti Yesu wayile ku Yelusalemu. ² Nomba mu Yelusalemu pambali pa mphongolo ya Ng'onzi mwali ichifula chino mumuvwango wachi Alemiki wukayamwa Betisayida, nukuti walinji ni nsaka zisano. ³ Impendu inkulu ya wantu yano yali, ayalwale, yanthonko, ayalemale yalalanga mwenemo. Ukulindilila amanzi ukuti yavunduke. ⁴ Pano ayangeli yakwe Leza yayile pansi nukuvundula amanzi pansita yimwi nukuti wensi wino winjila pano yakuvundula wapolanga kundwala iliyonsi yino walwanga. ⁵ Kwalinji umuntu umwi wino walinji umulwale pa myaka amakumi yatatu yisanu na yitatu(38). ⁶ Lino Yesu wamulola alazile palya lino wamanya kuno wikala palya insita iyitali, watili kuli weliwe, ''Ukulonda ukupola?'' ⁷ Umulwale waswike, ''Mwene, nthakweti umuntu nanti wumwi wino anganjika muchifula nanti amanzi yavunduka. Ndinati ize, muze akukolela.'' ⁸ Yesu watili kuli wene, ''Katuka, senda ichitanda chako, nukupita.'' ⁹ Papokwene umuntu wapozile, nukuti wasenzile ichitanda chakwe nukupita. Nomba uwanda ulya wali uwanda wa pamulungu. ¹⁰ Apano ayayuda yatili kumuntu wino wapozile, ''Apamulungu nukuti usikuzumilizika pakunyamula ichitanda chako.'' ¹¹ Waswike, ''Wino wamphozya nene awino wati, 'nyamula ichitanda chako nukupita.''' ¹² Yamukolowozizye, '' Umuntuchi wino wakunena, ukuti nyamula ichitanda nukupita?'' ¹³ Napano wuli wino yamupozizye atamumanyile wino wamupozize pamulandu wakuti Yesu walukuti afumilepo umwambula ukumanyikwa, muno pali iwumba pa masyo palya. ¹⁴ Pachisila, Yesu wamuzanyile mu tempeli watilikuli weni, '' Lola, wapola! Utize uwonone nupya, ukuti chitize chikuponele nupya ichiyipe ukuchila pali chii.'' ¹⁵ Umuntu wilya wayile avwanga ku wayuda ukuti a Yesu wino amupozizye. ¹⁶ Pamulandu wavintu vii ayayuda yamuyimvizye Yesu, pamulandu wakuti wachisile ivintu vii pa wanda wa pa mulungu. ¹⁷ Yesu wawaswike, '' Tata wane ichili akuwomba, nupya nani, nupya kwene, inkuwomba.'' ¹⁸ Pamulandu wakwe chii, aya yuda yalondanga sana ukuti atononyile sile uwanda wapamulungu kwene nukuti akati Leza a Tata wakwe, ukuyikolanya na Leza. ¹⁹ Yesu wawaswike, '' Ichumi, ichumi, umwana atanga achite chimwi wenga, ukufumya chino akalola tata akuchita,vino yisi akuchita, avino numwana akuchita. ²⁰ Pakuti Tata wamukunda u mwana akamulanjizya chonsi chino wawomba, nukuti alamulanjizya ivintu ivikulu ukuchila vii ukuti mwize muzunguke. ²¹ Ukuyana namuno tata akawazyusya ayafye nukuwapa uwumi numwana nawe akapa uwumi, kuli wino akulonda. ²² Muno Tata asipingula nanthi wumwi, kwene wapa uwupinguzi wonsi ku mwana. ²³ Ukuti umuntu wensi amuchindike umwana ukuyana namuno yakamuchindichila Tata.Wino aschindika umwana lino asichindika na Tata wino wamutumile. ²⁴ Ichumi, ichumi, wino akawuvwa izwi lyane nukusuwila wino wantumile ali nu wumi uwapenapo(uwakunthasila) atalononeka, kwene wachilinganya kumfwa ukuya ku wumi. ²⁵ Ichumi, ichumi, nkuwanena insita yikwiza, nukuti ayikwene, pano ayafwe yaluvwa izwi ilya mwana wakwe Leza, nukuti yano yaluvwa yalaya nu wumi. ²⁶ Ukuyana nukuti Tata waya nuwumi umumwenencho. Nomba wapa nuku mwana ukuti aye nuwumi muli weliwe, ²⁷ nupya Tata wamupa umwana amaka ukuti aye akapingula muno umwana wamuntu. ²⁸ Mutati mwachizunguka, amuno insita yikwiza pano wensi wino ali mumalalo aluvwa izwi yakwe ²⁹ yalifuma: yano yachitanga ivizima yalizyuchila ku wumi, yano yachitanga iviyipe yalizyuchila kukupingulwa. ³⁰ Nthanga inchite nantichimwi nenga. Ngati vino nuvwa, Nkapingula, nu kupingula kwane ukulungamane pamulandu wakuti nsipingula ukuyana nukukunda kwane kwene mu kukunda kwakwe wino wantumile. ³¹ Nanti ningasimichizya nemwenecho, uwusimisi wane wutanga wuye uwa wumolimo. ³² Alipo wino angasimichizya vyakwe nene, nukuti namanya ukuti uwusimisi wuno yakapa uwakuyana na nene uwa molimo. ³³ Mwantumile kuli Yohani, wasimichizizye uwumolimo. ³⁴ Kwene uwusimisi wusi uwakufuma ku muntu. Nkuvwanga ivintu vii ukuti mupusuke. ³⁵ Yohani wali ulukozyo luno lwakanga nu kuwala, nukuti mwakumbwanga kuno mungasechela mukuswepa kwakwe pali kasita munono. ³⁶ Amuno uwusimisi wuno nkuti uwapapela ukuchila wakwe Yohani, pa milimo yino Tata wampile ukuti imalizye, imilimo iyikulu yino nkawomba, simichizyini ivyakuyana na nene kuno Tata wantumile. ³⁷ Tata wino wantumile wasimichizizye vyakwe nene. Mutuvwapo amazwi yakwe nanti ukulola muno akalolechela insita yonsi. ³⁸ Mutaliya nizwi limwi lino lilisyala muli mwemwe, amuno musikusuwila muli wino wamutumile. ³⁹ Mukalonda amazwi pamulandu wakuti mukayelenganya ukuti mu mazwi muli uwumi uwa kunthasila, nupya amazwi ayaliyamwi yakusimichizya ukuyana na nene, ⁴⁰ nupya musikulonda ukwiza kuli nene ukuti muye nu wumi. ⁴¹ Nthakupochelela uwuchindame ukufuma ku yantu, ⁴² Kwene namanya ukuti mutaya ulukundo lwakwe Leza muli mwemwe. ⁴³ Nizile mwizina lyakwe Tata, kwene musimphochelela. Nanti muze angiza mwizina lyakwe nu lwakwe, mungamupochelela. ⁴⁴ Mungasuwila wuli, mweyano mukazumilizya uwuchindame kuli wenga na muze kwene musikulonda uwuchindame wuno wukufuma kuli Leza mutupu? ⁴⁵ Mutati mwayelenganya ukuti anemuno ndiwasusya pamanso yakwe Tata. Kwene wino alawasusya a Mozesi, wino muli weliwe mwasuwila. ⁴⁶ Nanti mwamusuwile Mozesi, ngali nani mwansuwila, pamulandu wakuti wawalike ivyakwane. ⁴⁷ Nanti mutakusuwila vino wawalike, mumasuwila wuli amazwi yane?''