¹ Lino vino vyachitwa , Yesu wafumile nukuya ukumbali yuze kuli yemba wakwe Galileya , wino akayamwa nupya ukuti Tibeliyasi. ² Iwumba ilikalamba , lyamukonkhanga weliwe muno lyaweni ivimanyisyo vino wawombanga apa Yalwale. ³ Yesu wayile ukumwamba nga kuku wikazile pansi nayalondezi yakwe. ⁴ (Nomba Pasaka, ulusechelo lwa ya Yuda , lwali papipi.) ⁵ Lino Yesu walolechesya nukulola iwumba likwiza kuli weliwe, wavwanzile kuli Filipu, '' Tumakala kwinye umukate ukuti yano yangalya? '' ⁶ ( Kweni Yesu wavwanzile chino ukuti amwezye Filipu, muno weliwe wamanyile chino amawomba .) ⁷ Filipu wamwaswike,'' Amazimbi yayili wakwe dinali yano tungakalila umukate yatange yakwane nanthi umunthu wenga ukuti alye nanthi kanono. '' ⁸ Wenga uwawalondezi, Andileya, umunyina wakweSimoni Peteli, wavwanzile kuli Yesu, ⁹ '' Pali umulumendo pano wino ali nimikate yisano ninswi zili, kweni vino ivyani poyanthu wonsi yano?'' ¹⁰ Yesu wavwanzile,'' Wawuzyini ayanthu yikale pansi.'' Nomba pali isote ilivule sana pawuyo wulya. Ayanthu yikazile pansi, yano yangakwana imyanda yisano mumphendwa. ¹¹ Apano Yesu wasenzile imikate yilya nga lino wasalifya , wawapile yalya yano yikazile. Wawonvile chilichimwi ninswi , ngati muno yalondelanga . ¹² Lino ayanthu yakwana, wavwanzile kuyalondezi yakwe,'' Wunganikini utumonyolwa tonsi tuno tukusyala, ukuti tutasumba natumwi.'' ¹³ Apano yawunganike vyonsi nukuzuzga ivitundu ikumi lyonga navili nutumonyolwa ukufima kumikate yisano ukumyako vilya vino yalile . ¹⁴ Apano , lino ayanthu yalola ichilanjizyo chino wawonvile , yavwanzile, '' Wino umolimo intchimi wino ali pakwiza munsi.'' ¹⁵ Lino Yesu wamanya ukuti yali papipi ukwiza nukuti yamuleme pamaka ukuti aye amwene, wafumile kapya kumwamba pali wenga . ¹⁶ Lino kwaya amanguzi, ayalondezi yakwe yaliye kuli yemba . ¹⁷ Yinjile muwato, yalambanga yemba ukuya ku Kapenamu. Kwaya imfinzi insita yino, nga na Yesu walinji atizile kuli woliwo. ¹⁸ Umuza uwukalamba waputanga , nga yemba watalike ukunyamuka . ¹⁹ Lino yapita amayadi amakumi yayili nayasano nanthi amakumi yatatu, yaweni Yesu akupita pali yemba nga akwiza kupipi, nga yali ninthete. ²⁰ Kweni watili kuli woliwo,'' Anene! Mutatina .'' ²¹ Apano yalondanga ukuti yamupochelele umwiwato, nga papokwene uwato wafisile pamulundu pano yayanga . ²² Kumutondo. iwumba lino lyimilile kumulundu kuli yemba lyaweni ukuti patali uwato ukupawula , nga na Yesu atakwezilemo nayalondezi yakwe , kweni ukti ayalondezi yapisile wonga. ²³ Nanthiwuli pali amawoato yamwi yano yafumanga ku Tibeliyasi ukupipi kuwuyo wuno yalilangako umukate lino Mwene wasalifya. ²⁴ Lino iwumba lyiluka ukuti nanthi a Yesu naya londezi yatali papa, wonga yinjile muwato nukuya ku Kapenamu ukumulonfda Yesu. ²⁵ Lino yamuzana kumbali yeze yakwe yemba , yavwanzile kuli weliwe, Rabbi, mwizile nsitachi kuno?'' ^{26 27} Yesu wawaswike, nuvwanga ukuti, '' Umolimo, umolimo, mukundonda, sichakuti mwaweni ivilanjizyo, kweni umulandu wakuti mwalile umukate nga mwikwite. Mutawombela ichakulya chino chikawononeka , kweni wombini umulandu wachakulya chino chikajimba chino umwana wa munthu aliwapa , muno Leza tata amusozile weliwe.'' ²⁸ Apano yavwanzile kuli weliwe, '' Tuwombe chani , ukuti tuwombe intchito yinu?'' ²⁹ Yesu waswike nukuvwanga kuli woliwo, ''Wunpo umulimo wakwe Mwene : Ukuti musuwile mwakwe wino wamutuma .'' ³⁰ Apano wavwanzile kuli weliwe, ''Nga mulipanga vimanyilochi, ukuti tungalola nukusuwila ? Muliwomba chani? ³¹ Yatata yitu yalyanga mana mu mphanga , ngati muno vyawalikwa, ' Wawapile umjukate ukufuma kupela ukuti tulye.''' ³² Apano yesu wawaswike, '' Umolimo, umolimo, Atali a Mose wino wawapanga umukate ukufuma kwiyulu, kweni atata wane wino akuwapa umukate uwamolimo ukufuma kupela. ³³ Muno umukate wakwe Leza awuno wukafuma kwiyulu nga wukapa uwumi kunsi.'' ³⁴ Apano yavwanzile kuli weliwe, ''Tata , mwatupa umukate insita yonsi.'' ³⁵ Yesu wavwanzile kuli woliwo, '' Nemukate wawumi ; wensi wino akwiza kuli nene ataliya ninzala, nga nawino akusuwila muli nene ataliya nulusala. ³⁶ Kweni nawanenyile umolimo mwandola nene, nga mutakusuwila . ³⁷ Wensi wino tata wampha aliza kuli nene, nga nawino wiza kuli nene nthalimusumba . ³⁸ Muno nika ukufuma kwiyulu, nthiza ukuzawomba ukulonda kwane, kweni ukulonda kwakwe wino wanthuma. ³⁹ Ku ali kulonda kwakw wino wanthuma , ukuti nthasumba wonsi yano amphile nene, kweni ukuwazusya pawanda wawumalilo. ⁴⁰ Muno ku ali kulonda kwakwe tata wane , ukuti wensi wuno walola umwana nukusuwila muli weliwe aliya nuwumi wamuyaya nukuti alimuzusya pawanda wawumalilo.'' ⁴¹ Apano aya Yuda yatalike ukuyilizyanya pa mulandu wa kuti wavwanzile ukuti,'' Ne mukate wuno wiza pansi ukufuma kupela .'' ⁴² Yatili,'' Sa Yesu wino umwana wakwe Yosefe , wino tata wakwe na mama wakwe tumumanyile? Nga nomba akuvwanga wuli , 'Nizile pano pansi ukufuma kupela'?'' ⁴³ Yesu waswike nukuvwanga kuli woliwo, '' Mutakwina pali mwemwe mwenga . ⁴⁴ Pasi nanthi wumwi wino angiza kuli nene nanthi tata wane wino wanthuma nene atamusenzile , nga ndimuzusya pawanda wawumalilo. ⁴⁵ Chawalikwa mu ntchimi, 'Wensi alisambilizwa na Leza .' Wensi wino wuvwa nukusambilila ukufuma kuli tata akayiza kuli nene. ⁴⁶ Sawensi wino wamulola tata, ukufumyako wino akufuma kuli Leza- amuweni tata. ⁴⁷ Umolimo, umolimo, wino akusuwila ali nuwumi wamuyaya. ⁴⁸ Nemukate wawumi. ⁴⁹ Yatata yinu yalyanga manna mumphanga, nga yafwile. ⁵⁰ Wu umukate wuno wukufuma kupela , ukuti umunthu alye wumwi nukuti manye afwe . ⁵¹ Ne mukate wawumi wuni wukayika ukufuma kupela . Nanthi wumwi walya umukate wuno, aliya uwawumi umuyaya. Umukate wuno ndiwapa umwili wane uwawumi wamunsi.'' ⁵² Ayuda yasosile nga yatalike ukukanzinlhana, nukuvwanga ukuti, '' Umunthu wino angatupa wuli umwili ukuti tulye?'' ⁵³ Apano Yesu watili kuli woliwo, '' Umolimo , umolimo, nanthi mutalile umwili wamwana wakwe Leza nukunwa uwazi wakwe, mutaliya nuwumi muli mwenga . ⁵⁴ Wensi wino akulya umwili wane nukunwa uwazi wane ali nuwumi wamuyaya, nga ndimukatusya pawanda wawumalilo. ⁵⁵ Muno umwili wane ichakulya ichenecho, nga nuwazi wane ichakunwa ichenecho. ⁵⁶ Wensi wino akulya umwili wane nukunwa uwazi wane akaya muli nene, nga nani muli weliwe. ⁵⁷ Ngati muno tata wane uwawumi wanthumila , nga namuno nkhwikalila umulandu wakwe tata, wino akundya, aliya nuwumi umulandu wakwe nene. ⁵⁸ Wu ali mukate wuno wiza pansi ukufuma ukwiyulu, samuno yatata yalilanga nukufwa. Wensi wuno akulya umukate wuno aliya nuwumi wamuyaya.'' ⁵⁹ Kweni Yesu wavwanzile ivinthu vino mung'anda yamapepo pano wasambilizganga mukapenamu. ⁶⁰ Apano alondezi ayinji yano yuvwile chino yavwanzile ukuti, '' Chi ichisambilizyo ichichuzye;aweni wino angachizumilizya?'' ⁶¹ Yesu, umulandu wamanyile ukuti ayalondezi yakwe yakwinanga pali chino, wavwanzile kuli woliwo, '' Wuzye chino chikuwasusya mwemwe? ⁶² Apano chingaya wuli nanthi mwamulolanga umwana wa munthu akuya kwiyulu kuli wali lino atani ayize? ⁶³ Umupasi wuno wukapanga uwumi; umwili wusitupindwila nachimwi. Imazwi yano navwanga kuli lili mumupasi, nupya aya wumi. ⁶⁴ Mbali pali yamwi yakwemwemwe yano mutakusuwila.'' Muno Yesu wamanyile ukufuma kunthaliko yano yatange yasuwile nga nawuno wali uwakuti alimulemesya. ⁶⁵ Watili, '' Cili vikwene pamulandu na vii vino navwanzile kuli mwemwe ukuti kusi wino angiza kuli nene nanthi satata wino wamuzumilizya.'' ⁶⁶ Umulandu wakwe chino, alondezi yakwe ayinji yafumile nga yatapisile nupya nawe. ⁶⁷ Apano Yesu wavwanzile kuli yalya ikumi lyonga nayayili,'' Mutafwile namwe mufume penepo , sumolimo?'' ⁶⁸ Simoni Peteli wamwaswike, '' Mwene, nga tulaya kuli weni? Muli namazwi yawumi wamuyaya, ⁶⁹ nga tusuwile nukwiza ukumanya ukuti wemutiswe wakwe Leza.'' ⁷⁰ Yesu watili kuli woliwo ,'' Wuzye nthawasozile , ikumi lyonga nayayili, nga wenga wakwe mwemwe asatana?'' ⁷¹ Nomba wavwanzile vwakwe Yudas umwana wakwe Simon Iscariot.