¹ Nemo nengano iyenecho, nu kuti Tata wane ali wakwitilila. ² Akafumya ulusamba lonsi kuli nene luno lusiseka ivikomwa, nupya akapalanthila ulusamba lonsi luno lukaseka ivikomwa umwakuti luseke ivikomwa ivivule. ³ Mwaswepa mphiti pamulandu na mazwi yano nawanena. ⁴ Lematilini muli nene, nani muli mwemwe. Ngati vino ulusamba lutanga luseke ivikomwa pali longa kano ndi lulematile ku ngano, achino namwekwene mutanga, kano ndi mwalematila muli nene. ⁵ Nemo ne ngano, mwemo mwensamba. Wino walematila muli nene na nene muli weliwe, akaseka ivikomwa ivivule, pakuti ukwawula nene pasi chino mungachita. ⁶ Ndi wumwi atakulematila muli nene, akasumbwa ngati ulusamba nu kuma, nu kuti yakaziwunganika insamba nu kuzisumbila mu moto , nu kupya. ⁷ Ndi mwalematila muli nene, nu kuti ndi amazwi yane yaya muli mwemwe, lengini chilichonsi chino mukulonda, nu kuti chilichitika kuli mwemwe. ⁸ Tata wane akachindamichilwa muli chii, ndi mukuseka ivikomwa ivivule nu kuti chikalanjizya ukuti mweyalondezi yane. ⁹ Ngati muno Tata wankhundila nene, nanikwene amuno nawakundila. musyalile mulukundo lwane. ¹⁰ Ndi mwasunga amasunde yane, mulisyalila mulukundo lwane, ngati muno nani nasunjile amasunde yakwe Tata nukusyalila mulukundo lwakwe. ¹¹ Navwanga ivinthu vii kuli mwemwe umwakuti insansa zyane ziye muli mwemwe nu mwakuti insansa zinu ziye izyakufikapo. ¹² Lii isunde lyane, ukuti mwakundana ngati muno nani nawakundila. ¹³ Kusi wino ali nulukundo ulukalamba ngati alu-ulwakuti wumwi asumbe uwumi wakwe pamulandu na yawuze. ¹⁴ Mweyanji ndi mukuwomba vino mbasunzile. ¹⁵ Inthaliwapundapo ukuti yawomvi, amuno umuwomvi asimanya chino mwene wakwe akuchita. Nawama ukuti yanji, amuno chilichonsi chino nuvwile ukufuma kuli Tata nachimanyisya kuli mwemwe. ¹⁶ A nsamwemwe mwansazile, kwene nene anemuno nawasazile nu kuwimika umwakuti mwize muye nukuseka ivikomwa, nu kuti ivikomwa vinu vize visyalile. Chii chili vikwene umwakuti chonsi chino mukulenga kuli Tata mwizina lyane, aliwapelanga. ¹⁷ Ivinthu vii nawasunda umwakuti mwakundana. ¹⁸ Ndi insi yawapata, mumanye ukuti yatalichile ukumphata nene lino yitani yiwapate mwemwe. ¹⁹ Muyange mweyamunsi, ngali insi yawakunda ngati ayanthu yamunsi. Kwene pamulandu wakuti nsimweyamunsi na pamulandu wakuti nawasala ukufuma munsi, achino insi yawapata. ²⁰ Yizukini izwi lino nawanenyile ukuti, 'Umuwomvi nsumukalamba ukuchila mwene wakwe.' Ndi yansamwile nene, yaliwasamula na mwemwe kwene,' ndi yasunzile izwi lyane, yalisunga ni linukwene. ²¹ Yaliwomba ivinthu vyonsi vii kuli mwemwe pamulandu wizina lyane, amuno yatamumanya wino wanthuma nene. ²² Ndi nthizanga nukuvwanga kuli woliwo, ngali yasi nuluyembu, kwene nomba yatakuleka ukuyenbuka. ²³ Wino wamphata nene wapata na Tata kwene. ²⁴ Inthawombange imilimo iyakuti pasi nanthi wumwi wino wayiwombapo muli woliwo, ngali yasi nuluyembu, kwene nomba yayilola imilimo nukuti yamphata nene ponga na Tata. ²⁵ Kwene chii chiliko pakulonda ukufichilisya izwi lino lyawalikwa umwisunde lyawo ilyakuti, 'Yamphasile ukwawula nu mulandu.' ²⁶ Ndi uwakusechelesya wiza wiza-wino ndiwatumila ukufuma kuli Tata, wiyo ali, Mupasi wa wumolimo, wino akafuma muli Tata-alichita uwukamboni pali vwakwe nene. ²⁷ Namwekwene mulingine ukuchita uwukamboni, pakuti mwali na nene ukufuma pakutalika.