¹ Nomba lino ulusechelo lwakwe pasika lutani lufike. Yesu wamanyile ukuti insita yakwe yafika iyakufumila munsi yii nukuya kuli Tata. Wawakunzile ayanthu yakwe yano yalinji umunsi yapansi, wawakunzile umwakufikapo. ² Nomba chiwa wali ukuti wachiyisile mphiti mumwenzo wakwe Yuda Isikaliyoti mwana Simoni, pakumulemesya Yesu. ³ Wamanyile ukuti Tata wapa chilichonsi mumakasa yakwe nukuti wafumile kuli Leza nukuti wawelelanga nupya ukuya kuli Leza. ⁴ Wakatwike pachakulya nukwimilila wazuzile umwinjila wakwe. Alino wasenzile umwenda wakupuputila nukuwunyepa mumutenzi wakwe. ⁵ Apano witile amanzi mwidishi nukutalika ukufula amatamba ya yalondezi nu kuwapuputa nu mwenda wakupuputila wuno wawuyisile mumutenzi wakwe. ⁶ Wizile kuli Simoni Petulo, Petulo wavwanzile watili, ''Mwene, wuzye umamfula amatamba yane?'' ⁷ Yesu waswike nu kumunena ukuti, ''Chino nkhuwomba chii mutamachuvwichisya nomba, kwene mulichimanya pankholelo.'' ⁸ Petulo wavwanzile kuli weliwe watili, ''Mutamafulapo amatamba yane,'' Yesu wamwaswike ukuti, ''Ndi inthakufula, lino usi nichakwankhana na nene.'' ⁹ Simoni Petulo wavwanzile kuli weliwe watili, ''Mwene, utamfula amatamba yatupu, kwene namakasa yane nu mutwe.'' ¹⁰ Yesu wamunenyile watili, ''Wino afulazile mphiti atalingine ukufulala nupya, kano ukufula amatamba yakwe, kwene umuswepe mphiti; mweyaswepe, kwene a nsamwensi.'' ¹¹ (Pakuti Yesu wamumanyile wino alimulemesya; achino wavwanzile ukuti, ''a nsamwensi mweyano mweyaswepe.'') ¹² Nomba lino Yesu wawafula amatamba yawo nukusenda umwinjila wakwe nukwikala nakupya pansi, wawanenyile watili, ''Wuzye muchimanyile chino nachita kuli mwemwe? ¹³ Mukamphunda nene ukuti 'musambilizi' nukuti 'Mwene,' nukuti mukavwanga ichisinkha, amuno ali vino indi. ¹⁴ Ndi nene, nemuno ne Mwene nupya ne Musambilizi, nafula amatamba yinu, namwekwene mulingine ukufulana amatamba. ¹⁵ Pakuti nawapa isambilizyo umwakuti namwekwene mulingine ukuwomba ngati muno nawombela kuli mwemwe. ¹⁶ Ichumi, ichumi, chino inkhuvwanga kuli mwemwe, umuwomvi a nsumukalamba ukuchila mwene wakwe; ni nthumi insiyikalamba kuli wino akuyituma. ¹⁷ Ndi mwavimanya ivinthu vii, mweyalongo ndi mukavichita. ¹⁸ Inthakuvwanga vwakwe mwemwe mwensi; nawamanya yano nawasola-kwene chili vii umwakuti amawaliko yize yafichilisiwe: 'Wino akulya ichakulya chane wakatusizye ichitende chakwe ukulwana na nene.' ¹⁹ Nkhuwanena vii nomba pano vitani vichitike umwakuti ndi viza vyachitika, mwize musuwile ukuti NEMO A NENE. ²⁰ Ichumi, ichumi, inkhuvwanga chino inkhuvwanga kuli mwemwe, wino akapochelela wino namutuma akapochelela nene, na wino akapochelela nene akapochelela wino wanthuma nene.'' ²¹ Lino Yesu wavwanga vii, wachulike mumupasi. Wasimichizizye nukuvwanga ukuti, ''Ichumi, ichumi, chino inkhuvwanga kuli ukuti wenga muli mwemwe alindemesya.'' ²² Ayalondezi yalolechesyine wensi nu muze, ukuzunguka wino wamuvwanganga. ²⁵ Wenga wa yalondezi yakwe, wino Yesu wamukunzile, wikazile pa tebulo papipi na Yesu. ²⁴ Simoni Petulo wamutokotezizye umulondezi wii nu kuti, ''Kolowozya wino akutaka.'' ²³ Alino wasenjelile kupipi na Yesu nu kumukolowozya ukuti, ''Mwene, wuzye aweni?'' ²⁶ Apano Yesu waswike, ''Ali wino nimatela itozi lya mukate nu kumupela.'' Nomba lino watela umukate, wamupile Yuda mwana Simoni Isikaliyoti. ²⁷ Apano lino walya, Chiwa wamwinjile, Yesu wamunenyile watili, ''Chino ukuwomba, chiwombe zuwa.'' ²⁸ Nomba pali yalya yano yikazile pansi pitebulo patali wino wamanyile chino Yesu wavwanjile vii kuli weliwe. ²⁹ Yamwi yelenginye ukuti, pakuti Yudasi ali ni chola cha mphiya, Yesu wamunenyile ukuti, ''Kakale vino vikulondeka ukuti tuye navyo pa lusechelo,'' pamwi ukuti akawapeleko vimwi ayapina. ³⁰ Yudasi walile wapochelela umukate, wafumilepo insita yiyokwene. Walinji uwusiku. ³¹ Yudasi watili wapita, Yesu wavwanzile ukuti, Nomba u Mwana wa Munthu wachindamikwa, na Leza wachindamikwa muli weliwe. ³² Leza alimuchindamika muli weliwe, nu kuti amamuchindamika likwene lii. ³³ Yana yanono, indi namwe pa kasita kanono. Mulindonda, nu kuti ngati muno navwanjile ku ya Yuda, 'Kuno nkhuya, mutange mwize.'Nomba navwanga na kuli mwemwe kwene. ³⁴ Inkhuwapela isunde ilipya, ukuti mwakundana wenga nu muze; ngati muno nawakundila, avino namwekwene mwakundana wenga nu muze. ³⁵ Muli chii aliwensi alimanya ukuti mwe yalondezi yane, ndi muli nu lukundo lwakwe wenga nu muze.'' ³⁶ Simoni Petulo wavwanzile kuli weliwe watili, ''Mwene, mukuya kwi?'' Yesu waswike, ''Kuno nkhuya, mutange munkhonkhe nomba, kwene mulinkhonkha ichisila.'' ³⁷ Petulo wamukolowozizye watili, ''Mwene, ichani chino inthanga inkhonkhe nomba? nimalolela ukusumba uwumi wane pa mulandu na mwemewe.'' ³⁸ Yesu waswike, Wuzye umasumba uwumi wako pa mulandu na nene? Ichumi, ichumi, chino nkhuvwanga kuli wewe, mukolwe atalilila pano utani unkhane katatu.''