¹ Lino kwasyala amanda yasano na wonga ukuti ukusechela kwakwe pasaka kuchitike, Yesu wizile umu muzi wakwe Betaniya, kuno kwali Lazaro, wino Yesu wa muzusizye uku wufwe. ² Kuno yamupekanizizye ichakulya icha kumanguzi, apano Malita awino wayikanga, kweni Lazaro wali wumwi uwa yantu yano yalyanga ponga na Yesu apitewulo. ³ Apano Maliya wasenzile iwotolo lya mafuta ayakununchila nkani kwene ayamutengo yakwe nalidi umwenecho, apakazya ingazo zyakwe Yesu, nukuputa ingazyo ninyele izya ku mutwe wakwe. Ing'anda yazuzile nukununchila ukusuma ukwa mafuta. ⁴ Yudasi Isikaliyoti, wumwi pa yalondezi yakwe, wino wali uwakuti amamulemesya, watili, ⁵ ''Ichani chino amafuta yaa yatakaziwanga pa mutengo wa madinali 300 (imyanda yitatu) nukupelwa ku yapina?'' ⁶ Nomba wavwanzile vii, a nsumulandu wakuti wawasakamalilanga ayapina, kwene a pamulandu wakuti wali umupupu. awino wali ni chola ichakusungamo imphiya nukuti wiyanga vino vyasungwanga mwenemo. ⁷ Yesu watili, ''Muzumilizyini ukuti asunge chino ali nacho icha pawanda wakuzikwa kwane. ⁸ Insita zyonsi muliyanga nayapina ponga. Kwene mutaliya ponga na nene insita zyonsi.'' ⁹ Nomba iwumba ilikalamba ilya wa yuda lyamanyile ukuti Yesu wali kulya, yizile, kwene yatakonsile Yesu mutupu, kwene yatunjile nukwizalola Lazalo, wino Yesu wamuzyusizye ukufuma kuwufwe. ¹⁰ Yasimapepo yakalamba yavwanzyine ponga ukuti yakome na Lazalo kwene; ¹¹ pakuti a pamulandu na weliwe ukuti ayayuda a yavule yaye nukusuwila muli Yesu. ¹² Ku mutondo wakwe iwumba ilikalamba lizile ku lusechelo. Lino yuvwa ukuti Yesu akwiza ku Yelusalemu, ¹³ yasenzile insamba zya miti ya mukoma nukuya pakukomenkhana nawe nu kupunda, ''Wosana! Uwalongo a wino akayizila mwizina lyakwe Mwene, i Mfumu ya Izilayeli.'' ¹⁴ Yesu wazanyile imphunda iyinono nu kukwela; ngati muno chawalichilwe, ¹⁵ Utati uwatina, we mwana umwanachi wa mu Ziyoni; lola, i Mfumu yako yikwiza, yikazile pa mwana wa mphunda.'' ¹⁶ Ayalondezi yakwe yatilukanga uwupiliwulo wa vinthu vii pakutalika; kwene lino Yesu wati wachindamikwa, yakumbwike ukuti ivinthu vii vyawalikwa ukuyana na weliwe nukuti yamuchitile ivinthu vii. ¹⁷ Nomba iwumba lyasimichile ukuti yalinji nawe pano wamupundanga Lazalo mwilalo nu kumuzyusya ukufuma ku wufwe. ¹⁸ Nupya chii nacho achino chalenjesizye ukuti iwumba liye pakukomenkhana nawe, pamulandu wakuti yuvwile ukuti awomvile ichimanyilo chii. ¹⁹ Alino a Yafalisi pali wonga yatili, ''Lolini, ungasowa ichakuchita; lolini, insi yeyamukonkha weliwe.'' ²⁰ Nomba aya Giliki yamwi pali yalya yano yakwelanga pakuya pakupepa ku lusechelo. ²¹ Yaa yayile kuli filipu, wino wali uwa ku Betisayida mu Galileya, nu kumulenga ukuti, ''Wikolo, tukulonda ukumulola Yesu.'' ²² Filipu wafumile nukuyamunena Andulu; Andulu wayile na Filipu, nukuti yamunenyile Yesu. ²³ Yesu wawaswike nukuti, ''Insita yafika iya Mwana wa Munthu iyakuti achindamikwe. ²⁴ Ichumi, ichumi, inkhuvwanga kuli mwemwe, mphaka ulupumba lwa ngano luponele mukasi mwansi yapansi nukufwa, lukasyala pali longa; kwene ndi lukufwa, luliseka ivikomwa ivivule. ²⁵ Wino wawukunda uwumi wakwe aliwusumba; kwene wino wawupata uwumi wakwe munsi yii aliwusunga muwumi wa muyaya. ²⁶ Ndi wumwi akambombela nene, lekini ankhonkhe; na konsi kuno indi, akuno kuliya nu muwomvi wane kwene. ²⁷ Nomba umupasi wane wachulika nukuti nimavwanga chani? 'Tata, mphususya pi ola lii'? Kwene pamulandu na chii natanjile i ola likwene. ²⁸ Tata, chindikini izina linu .'' Apano izwi lizile ukufuma kwiyulu nukuti, ''Nalichindika nukuti indalichindika nakupya.'' ²⁹ Apano iwumba lino limilile palyakwe nukuvwa amazwi yalya yatili chawuluma. Yawuze yatili, ''Umungelo wamuvwanzya.'' ³⁰ Yesu waswike nukuti, ''Izwi lii litizile nene, kwene ilyakwinu. ³¹ Nomba insita ya wupinguzi wansi yii: Nomba ya kateka yansi yii yamasumbwa kunzi. ³² Ndi nanyamwilwa mupela ukufuma munsi yapansi, indikwemela aliwensi kuli nene.'' ³³ Wavwanzile vii pakumanyisya imfwa yino alifwila. ³⁴ Iwumba lya mwaswikwe, ''Tuvwa ukufuma mwilamulo ukuti Kilisitu alikala umuyayaya. Nga ungavwanga wuli ukuti, 'U Mwana wa Munthu alingine ukuti anyamulilwe mupela'? Wuzye aweni u Mwana wa Munthu wii'' ³⁵ Alino Yesu wavwanzile kuli woliwo ati, ''Ukuwala kuchili kumaya namwe pa kasita kanono. Mwapita pano muchili muli nu kuwala, ukuti imfinzi yitawachilila. Wino akapita mumfinzi asimanya kuno akuya. ³⁶ Pano muli nu kuwala, suwilini mu kuwala umwakuti muye mwe yana ya kuwala.'' Yesu wavwanzile ivinthu vii nukusyembukapo nukufisama ukufuma kuli woliwo. ³⁷ Nanthi wuli Yesu wawomvile ivimanyilo ivivule kuli pa manso yawo, yatasuwile muli weliwe ³⁸ umwakuti izwi lyakwe Yesaya kasesema lize lifichilisiwe, muli vino watili: ''Mwene, aweni wino wasuwile uwutumwi witu, nupya a kuli weni kuno ikasa lyakwe Mwene lili wumbulwa?'' ³⁹ Pamulandu na cii yatange yasuwile, pakuti Yesaya wavwanzile nupya ukuti, ⁴⁰ Wawayazile amanso yawo, nupya wafisile imyenzo yawo; ukuti limwi yangize yalole na manso yawo nu kuvwichisya ni myenzo yawo, nukuchenja, nukuti ndiwapozya.'' ⁴¹ Yesaya wavwanzile ivinthu vii pamulandu wakuti waweni uwuchindame wakwe Yesu nukuvwanga vyakwe weliwe. ⁴² Kwene ukupawula pali vivyo, yakateka ayavule yasuwile muli Yesu; kwene pamulandu na ya Falisi, yatasimichizizye ukuti yasuwila muli Yesu umwakuti yatawalesya kung'anda ya mapepo. ⁴³ Yakunzile ukutumvya kuno kukafuma ku yanthu ukuchila ukutumvya kuno kukafuma kuli Leza. ⁴⁴ Yesu wakolomwike nukuti, ''Wino wasuwila muli nene, lino atasuwila muli nene nenga kwene lino wasuwila na muli wino wanthuma, ⁴⁵ nukuti wino walola nene lino walola wino wanthuma nene. ⁴⁶ Niza ngati uluswepo munsi, umwakuti wino wasuwila muli nene atasyala mumfinzi. ⁴⁷ Ndi wumwi akawuvwa amazwi yane kwene asiwasunga, nthakumupingula; pakuti inthiza pakupingula insi, kwene ukupususya insi. ⁴⁸ Wino akunkhana nene na wino asikupochelela amazwi yane, ali na kapingula wenga. Izwi lino navwanga lilimupingula pa wanda wawumalilo. ⁴⁹ Pakuti inthavwanzile vyakwe nene, kwene a Tata wino wanthuma, wino wampha isunde ilyakuyana na vino ningataka nu kuvwanga. ⁵⁰ Namanya ukuti isunde lyakwe uwumi wa muyaya, nomba achino inkhuti-ukuyana na muno Tata wavwanjile kuli nene, amuno nkhuvwanjila.''