¹ Yakundwe, mutasuwila umupasi wuliwonsi. Mumalo mwakwe yezyini imipasi ukuti mulole ndi iyakufuma kuli Leza, amuno ya kasesema ayavule ayawufi yafumile ukwiza umunsi. ² Pali chi mulimanya umupasi wakwe Leza--umupasi wonsi wuno wukazumilizya ukuti Yesu Klistu wiza umumwili uwakufuma kuli Leza, ³ nupya umupasi wonsi wuno wusizumilizya Yesu nsuwakufuma kuli Leza. Wu umupasi waku kakana Yesu, wino muvwile ukuti akwiza, nu kuti nomba alimo mphiti u munsi. ⁴ Mwafuma kuli Leza, ayana, nupya mwawachimvya, amuno wino ali muli mwemwe umukalamba ukuchila wino ali munsi. ⁵ Yafuma munsi, achino vino yakavwanga ivya munsi, ninsi yikawuvwila woliwo. ⁶ Twafuma kuli Leza. Wensi wino wamumanya Leza akawuvwa kuli sweswe. Wene wino a suwakufuma kuli Leza asiwuvwa kuli sweswe pali chii twamanya umupasi wa molimo nu mupasi wa kuponzya. ⁷ Yakundwe, ndini tukundane wenga na muze, pakuti ulukundo lwafuma kuli Leza, nupya wensi wino akakunda wapapwa ukufuma kuli Leza nakupya wamumanya Leza. ⁸ Umuntu wino asikunda atamumanya Leza, pakuti Leza ulukundo. ⁹ Pa mulandu na chii ulukundo lwakwe Leza lwawumbwilwe pali sweswe, ukuti Leza watumile umwanakwe wenga mutupu munsi ukuti twikale pamulanduna weliwe. ¹⁰ Muli chii ulukundo, asukwakuti twamukunzile sweswe, nu kuti watumile umwanakwe ukuya ichakutupususya pa maluyembu yitu. ¹¹ Yakundwe, ndi Leza watukunzile sana, naswekwene tukundane. ¹² Kusi na wenga wino walolapo Leza ndi twakundana, Leza akuya muli sweswe, nu lukundo lwakwe ulwakufikapo muli sweswe. ¹³ Pali chii twamanya ukuti twikalila muli weliwe muli sweswe, amuno watupa umupasi wumwi uwakwe. ¹⁴ Nupya twalola nukusimichila ukuti Tata watumile umwana ukuya umupasi wansi. ¹⁵ Wino akazumilizya ukuti Yesu umwana wakwe Leza, Leza akayikalila muli weliwe na weliwe muli Leza. ¹⁶ Nakupya, twamanya nukusuwila ulukundo luno Leza waya nalo pali sweswe. Leza ulukundo, nupya wino wikalila mulukundo lu akayikalila muli Leza, na Leza akayikalila muli weliwe. ¹⁷ Pa mulandu wakwe chii, ulukundo luu lwapangwa umwakufikapo muli sweswe, umwakuti twize tuye ni chikanga pa wanda wa wupinguzi, amuno ngati muno wayela avino naswe tuli munsi yii. ¹⁸ Mulukundo mutaya inthete. Mumalo mwakwe ulukundo lwa kufikapo lukafumya inthete, amuno inthete zilapochela ichilambu. Kwene wino akatina atapangwa umwa kufikapo mulukundo. ¹⁹ Tukakunda amuno Leza watalike watukunda. ²⁰ Ndi wumwi akati, ''Namukunda Leza'' kwene wapata umuze, uwawufi. Pakuti wino atakunda umuze, wino wamulola, atanga akunde Leza, wino atamulola. ²¹ Nupya, lii isunde lino tulinalyo ukufuma kuli weliwe:Wino wakunda Leza alingine akunde nu muze