¹ Sa kataposan, akong mga igsoon, paglipay diha sa Ginoo. Alang kanako ang pagsulat pag-usab niining samang mga butang diha kaninyo dili makahasol, kining mga butanga makapanalipod kaninyo. ² Pagbantay sa mga iro. Pagbantay sa daotang mga magbubuhat. Bantayi ang mamumutol. ³ Kay kita ang mga tinuli-- kita ang nagadayeg pinaagi sa Espiritu sa Dios, mapasigarbuhon diha kang Cristo Jesus, ug walay pagsalig sa unod. ⁴ Bisan pa, ako sa akong kaugalingon adunay pagsalig sa unod. Kung si bisan kinsa ang naghunahuna nga siya adunay pagsalig sa unod, ako gayod mas labaw pa. ⁵ Ako gituli sa ikawalo ka adlaw, sa kaliwatan sa Israel, sa tribo ni Benjamin, usa ka Hebreohanon sa Hebreohanong kagikan; mahitungod sa balaod, usa ka Pariseo. ⁶ Kung bahin sa kasibot, gilutos ko ang simbahan; Mahitungod sa pagkamatarong ilalum sa balaod, walay ikasaway kanako. ⁷ Apan bisan unsang mga butang nga makaayo kanako, giisip ko sila ingon nga walay bili tungod kang Cristo. ⁸ Sa pagkatinuod, karon akong giisip kining tanang butang nga kapildihan tungod sa labing maayo nga kahibalo kang Cristo Jesus nga akong Ginoo. Tungod kaniya akong gisalikway ang tanang butang- giisip ko sila nga walay bili - aron akong maangkon si Cristo ⁹ ug mahikaplagan diha kaniya, wala magbaton sa pagkamatarong sa akong kaugalingon gikan sa balaod, apan pinaagi sa pagtuo diha kang Cristo - ang pagkamatarong nga gikan sa Dios sumala sa pagtuo. ¹⁰ Busa karon buot nako nga masayran siya ug ang gahom sa iyang pagkabanhaw ug ang pakig-ambit sa iyang mga pag-antos, mahimong sama sa iyang kamatayon, ¹¹ aron sa usa ka paagi akong masinatian ang pagkabanhaw gikan sa mga patay. ¹² Dili kay nadawat kona kining mga butanga, o nga ako nahimo na nga hingpit, apan nagpadayon ako aron nga akong makuptan ang mga butang kay ako gikuptan ni Cristo Jesus. ¹³ Mga igsoon, wala ako maghunahuna nga ako mismo nakakupot na niini. Apan adunay usa ka butang: Akong gikalimtan kung unsa ang nangagi ug nakigbisog alang sa umaabot. ¹⁴ Nagpadayon ako padulong sa dag-anan aron pagdaog sa ganti sa langitnong pagtawag sa Dios diha kang Cristo Jesus. ¹⁵ Kitang tanan nga mga hamtong, maghunahuna kita sama niini: Ug kung kamo naghunahuna sa lahi mahitungod sa bisan unsa, ang Dios usab magapadayag niana kaninyo. ¹⁶ Bisan pa niana, unsa ang atong nakab-ot, atong kuptan kini. ¹⁷ Pagsundog kanako, mga igsoon. Bantayi pag-ayo kadtong naglakaw pinaagi sa panag-ingnan diha kaninyo nga anaa kanamo. ¹⁸ Daghan ang nagalakaw, mahitungod niadtong kanunay nako nga ginasulti kaninyo, ug karon ako nagsulti kaninyo uban sa mga luha—daghan ang naglakaw ingon nga kaaway sa krus ni Cristo. ¹⁹ Ang ilang padulngan mao ang kalaglagan. Kay ang ilang dios mao ang ilang tiyan, ug ang ilang garbo mao ang ilang kaulawan. Sila naghunahuna mahitungod sa kalibotanong mga butang. ²⁰ Apan ang atong puluy-anan didto sa langit, nga diin kita usab nagpaabot alang sa manluluwas, ang Ginoong Jesu-Cristo. ²¹ Siya ang mag-usab sa atong maluyahong lawas ngadto sa lawas nga giporma sama sa iyang mahimayaon nga lawas, nga giporma pinaagi sa kusog sa iyang gahom aron dumalahan ang tanang butang sa iyang kaugalingon.