¹ Kung aduna may pagdasig diha kang Cristo, kung aduna may kahupayan gikan sa gugma, kung aduna may panaghiusa sa Espiritu, kung aduna may pagkamalumo ug kaluoy, ² unya himoa ang akong kalipay nga bug-os pinaagi sa samang paghunahuna, adunay samang gugma, hiniusa diha sa espiritu, ug adunay susama nga katuyoan. ³ Pagbuhat sa walay paghinakog o pagpagarbo. Hinuon uban sa pagpaubos isipa ang uban nga mas maayo kay kanimo. ⁴ Kinahanglan nga ang matag-usa kaninyo magtan-aw dili lamang sa iyang kaugalingong kaayohan, kondili usab sa kaayohan sa uban. ⁵ Himoa kini nga huna-huna sa inyong kaugalingon sama usab kang Cristo Jesus. ⁶ Kinsa, bisan tuod siya naglungtad diha sa dagway sa Dios , apan wala niya hunahunaa nga siya tupong sa Dios isip usa ka butang nga pagahuptan . ⁷ Hinuon, gihaw-asan niya ang iyang kaugalingon pinaagi sa pagkuha sa dagway sa usa ka sulugoon, ug siya natawo sa dagway sa mga tawo. ⁸ Nagpauobs siya sa iyang kaugalingon ug nahimong masinugtanon hangtod sa kamatayon, bisan sa kamatayon sa krus. ⁹ Busa ang Dios usab nagbayaw kaniya. Gihatagan siya ug ngalan nga labaw sa tanang ngalan. ¹⁰ Gibuhat niya kini aron sa ngalan ni Jesus ang matag tuhod magapiko, ang mga tuhod niadtong anaa sa langit ug sa yuta ug sa ilalom sa yuta. ¹¹ Gibuhat niya kini aron ang matag dila kinahanglan magasugid nga si Jesu-Cristo ang Ginoo, alang sa himaya sa Dios nga Amahan. ¹² Busa unya, akong mga hinigugma, ingon nga kamo kanunay nagatuman, dili lamang diha sa akong atubangan apan karon mas labaw kung wala ako, ikinabuhi ang inyong kaugalingon nga kaluwasan uban sa kahadlok ug pagkurog. ¹³ Kay ang Dios mao ang nagalihok diha kaninyo nga mobuot ug mobuhat alang sa iyang kalipay. ¹⁴ Buhata ang tanang butang sa walay pagbagulbol ug panaglalis. ¹⁵ Sa ingon niini nga paagi mamahimo kamong walay ikasaway ug putli, mga anak sa Dios nga walay tatsa taliwala sa hiwi ug dautan nga kaliwatan, diin kamo nagadan-ag ingon nga mga kahayag sa kalibutan. ¹⁶ Nagkupot sa pulong sa kinabuhi aron nga sa adlaw ni Cristo makapasigarbo ako nga wala ako midagan nga kawang o naghago nga kawang. ¹⁷ Apan bisan pa kung ako ibubo ingon nga halad sa sakripisyo ug pag-alagad sa inyong pagtuo, nalipay ako ug magmaya ako uban kaninyong tanan. ¹⁸ Sa samang paagi kamo usab managlipay ug magmaya uban kanako. ¹⁹ Apan naglaum ako ni Ginoong Jesus nga ipadala si Timoteo diha kaninyo sa dili madugay, aron ako usab madasig sa dihang ako mahibalo sa mga butang mahitungod kaninyo. ²⁰ Kay kanako wala nay lain nga sama kaniya, nga tinuoray nga nabalaka alang kaninyo. ²¹ Kay silang tanan nagapangita sa ilaha lamang kaugalingon nga kaayohan, dili sa mga butang ni Jesu-Cristo. ²² Apan kamo nasayod sa iyang bili, tungod kay ingon nga usa ka anak sa iyang amahan, busa siya usab nag-alagad uban kanako sa maayong balita. ²³ Busa malaumon ako nga ipadala siya sa dili madugay kung makita ko kung unsa ang mga butang nga moabot kanako. ²⁴ Apan ako masaligon diha sa Ginoo nga ako usab maka-anha sa dili madugay. ²⁵ Apan ako naghunahuna nga kinahanglan ipadala si Epaphroditus balik kaninyo. Siya akong igsoon ug kauban sa pagpamuhat ug kauban nga sundalo, ug inyong mensahero ug sulugoon sa akong mga panginahanglan. ²⁶ Kay siya naguol pag-ayo, ug nangandoy siya nga makauban kamong tanan, tungod kay nadungog ninyo nga siya nagsakit. ²⁷ Siya nagsakit gayod pag-ayo nga hapit siya mamatay. Apan ang Dios naluoy kaniya, ug dili lamang kaniya, apan usab kanako, aron nga dili ako masubo diha sa kasub-anan. ²⁸ Busa labing matinguhaon ako nga ipadala siya, aron nga sa dihang inyo siyang makita pag-usab malipay kamo, ug mugamay ang akong kabalaka. ²⁹ Dawata si Epaphroditus uban sa tanang kalipay diha sa Ginoo. Tahora ang mga tawo nga sama niya. ³⁰ Kay kini nga buluhaton alang kang Cristo hapit siya mamatay. Gibutang niya sa piligro ang iyang kinabuhi sa pag-alagad kanako ug gipuno niya kung unsa ang wala ninyo mabuhat sa pag-alagad kanako.