¹ Busa, hinigugma nako nga mga kaigsoonan diin akong gihandom, ang akong kalipay ug korona, niining paagiha barog nga lig-on diha sa Ginoo, hinigugmang mga higala. ² Naghangyo ako kang Euodia, ug naghangyo ako kang Syntyche, paghiusa kamo sa hunahuna diha sa Ginoo. ³ Oo, hangyoon ko kamo, akong tinuod nga kauban, tabangi kining kababayen-an tungod kay sila naghago uban kanako sa pagpakaylap sa maayong balita, uban kang Clemente ug sa uban pa nga akong kauban nga mga isigka-magbubuhat, nga ang mga ngalan anaa sa Libro sa Kinabuhi. ⁴ Paglipay diha sa Ginoo kanunay. Usbon ko pag-ingon, paglipay. ⁵ Himoa nga ang inyong kalumo maila sa tanang katawhan. Ang Ginoo haduol na. ⁶ Ayaw kabalaka mahitungod sa bisan unsang butang. Hinuon, sa tanang butang pinaagi sa pag-ampo ug mga paghangyo, uban ang pagpasalamat, ipahibalo ang imong mga hangyo sa Dios, ⁷ ug ang kalinaw sa Dios, nga diin molabaw sa tanan nga panabot, magabantay sa inyong mga kasingkasing ug sa inyong mga panghunahuna diha kang Cristo Jesus. ⁸ Sa kataposan, mga igsoon, bisan unsa nga butang nga tinuod, bisan unsa nga butang nga halangdon, bisan unsa nga butang nga matarong, bisan unsa nga butang nga putli, bisan unsa nga butang nga matahom, bisan unsa nga butang nga maayo nga taho, kung anaay mga butang nga maayo kaayo, ug anaay mga butang nga madayeg, hunahunaa kining mga butanga. ⁹ Ang mga butang nga inyong natun-an ug nadawat ug nadungog ug nakita dinhi kanako, buhata kining mga butanga, ug ang Dios sa kalinaw mag-uban kaninyo. ¹⁰ Hilabihan ang akong kalipay diha sa Ginoo tungod kay sa kataposan karon nabag-o gayod ang inyong kabalaka alang kanako. Aduna gayod kamoy kabalaka kanako kaniadto, apan wala kamoy kahigayonan sa pagtabang. ¹¹ Kini dili tungod sa akong mga panginahanglan mao nga gisulti ko kini. Kay ako nakakat-on na nga makontento sa tanan nga mga kalisdanan. ¹² Nasayod ako kung unsa ang kabos, ug nasayod usab ako kung unsa ang anaa sa kadagaya. Sa matag paagi ug sa tanang mga butang nakat-unan ko na ang sekreto sa abundansya ug sa kagutmanan, unsaon sa pagkaharuhay ug anaa sa panginahanglan. ¹³ Mahimo nako ang tanang butang pinaagi kaniya nga naglig-on kanako. ¹⁴ Bisan pa niini, nagbuhat kamo ug maayo aron sa pag-ambit kanako sa akong mga kalisdanan. ¹⁵ Kamo nga mga taga Filipos nasayod nga sa sinugdanan sa maayong balita, sa dihang ako mibiya na sa Macedonia, walay simbahan nga mitabang kanako paagi paghatag ug pagdawat gawas lamang kaninyo. ¹⁶ Bisan sa dihang didto pa ako sa Tesalonica, nagpadala kamo ug hinabang alang sa akong mga panginahanglan sa makadaghan. ¹⁷ Kini dili kay ako nagapangita sa gasa. Hinuon, nagapangita ako sa bunga nga magapauswag sa inyong kaayohan. ¹⁸ Akong nadawat ang tanang mga butang, ug ug daghan pa. Anaa ako sa abundansya nadawat nako gikan kang Epaphroditus ang mga butang nga gikan kaninyo. Sila ang mga pahumot nga nangalisngaw sa kahumot, ang ginadawat nga halad ug makapahimuot sa Dios. ¹⁹ Ug ang akong Dios magdugang sa inyong mga panginahanglan sumala sa iyang madagayaong himaya diha kang Cristo Jesus. ²⁰ Karon sa atong Dios ug Amahan ang himaya sa walay kataposan ug sa kahangturan. Amen. ²¹ Magkumustahay ang tanang magtutuo diha kang Cristo Jesus. Ang mga kaigsoonan nga uban kanako nangumusta kaninyo. ²² Ang tanan nga mga magtutuo dinhi nangumusta kaninyo, ilabina kadtong anaa sa panimalay ni Caesar. ²³ Ang grasya ni Ginoong Jesu-Cristo mag-uban sa inyong espiritu.