¹ U Sawuli akasimikizya nizyamfwa yache. popisiku lilanyene kukanda ukuvwimiwa ukukulu ku chalichi chochikaba mu Yulusalemu nabitiki bonsi bakasata mukaya aka yudeya namuSamaliya, ukupatula abatumwa. ² Abanthu abachala bakamusila u Sitefani nukumulilila hee nichitima. ³ Loli u Sawuli akayezya pakuchinangania ichalichi. akinjilanga inyumba ni nyumba, pakubakola bonsi abanalume nabanakazi, nukubabika munyumba ya bukayidi. ⁴ Abitiki bo bakabasasya bakalumbililanga amazyu. ⁵ U Filipu akabuka mukaya akakulu akasamaliya nukulumbilila izya kilisitu. ⁶ Ichilundilo chabanthu chikateghelezyanga kuvyo u Filipu akanenanga; bakamwivwa, sona bakalinga ivimanyisyo vyo akabomba. ⁷ Imizimu iyibibi yikafumanga mubobakanayo, nukulila namazyu aghakulu, abinji abalemale bakapolanga. ⁸ Po mukaba ulusekero mukaya akakulu kalanyene. ⁹ Loli pakabako umunthu yumo mukaya akakulu yo akitiziwanga ukuti Simoni, yo akapanganga amayele; akaswighisyanga abanthu aba samaliya bo akunena ukuti wakulondiwa nkhani. ¹⁰ Aba samaliya, abanandi na basongo bakamuteghelezya bakati, '' umunthu yu kakoti agha ghogho maka gha chala ghoghakwitiziwa aghakulu.'' ¹¹ Bakivwisyanga kukwache papo akaba ukuti abaswighisyapo akabalilo namayele ghache. ¹² Loli bakati bamusubalila u Filipu po akalumbililanga amazyu aghafumu bwa chala nizina lya Yesu kilisitu, bakoziwa, bonsi abanalume nabanakazi. ¹³ Nu simoni wepe akasubalila, bo oziwa akikalanga nu filipu. Bo alinga ivimanyisyo nimbombo iziza zikubombiwa, akaswigha. ¹⁴ Boabatumwa mu yerusalemu bivwa ukuti u samaliya apokela amazyu gha chala, bakabatumila upetulo nu yohani. ¹⁵ Bobiza bakabiputila ukuti bapokele umuzimu umuswepu. ¹⁶ Pakabalilo kalanyene, umuzimu umuswepu atakamwizilapo nayumo uwababo; bakoziwa bwaka mwizina ilya mwene u Yesu. ¹⁷ Po u petulo nu yohani bakabapalamansya ninyobe, bakapokela umuzimu umswepu. ¹⁸ Bo usimoni alinga ukuti umuzimu umuswepu wiza papabo ukwendela munyobe yabatumwa, akabapa indalama. ¹⁹ Akati, '' mumphe amaka, ukuti aliwensi yo nabikapo inyobe yane apokelenge umuzimu umuswepu.'' ²⁰ Loli u petulo akanena nawe, '' uwe poka nindalama zyako mukomanikile poka, pakuti ukwinong'ona pakusenda ichabupi chachala nindala. ²¹ ute nichigaba pamo ubuyo nabumo pambombo yino, chifukwa umoyo wako wutawolokite pachala. ²² popinduka kumbibi yako iyi, nukwiputa kwa mwene, ukuti akuhobokele pakwinong'ona ichinthu ngati ichi. ²³ Pakuti nkhulinga ukuti wizwile nukubaba kwa kanyongo sona we muzya wambibi. ²⁴ U simoni akamula akati, '' niputila kwa mwene, ukuti nachimo chowanena chingambonekelanga chingambonekelanga. ²⁵ Bobasimikizya nukunena izwi lya chala, u petulo nu yohani bakanyokela ku yerusalemu, ukulumbilila amazyu amiza mutwaya twa basamaliya. ²⁶ Po umungelo wachala akanena kwa Filipu ukuti, ''nyamuka buka kumbali iyakunthende kunzila yo yikufuma ku Yelusalemu yikuya ku Gaza. (iyi nzila ya munkholongo.) ²⁷ Akanyamuka nukubuka. Po kulanyene kukaba u munthu yumo yo akafuma ku Etiyopiya.ikambala limo lyo likaba lipasiwa, sona likaba lyakumanyikwa muchisu cha Etiyopiya. Yo akaba we songo uwabakulingilila ichuma. Akiza ku Yelusalemu pakwiputa. ²⁸ Bo akunyokela akikala mungolo yache, akabelenganga mwa Yesaya umughonela. ²⁹ Umuzimu ghukanena kwa Filipu, ''Buka uye wikale kupipi ni ngolo.'' ³⁰ Po u Filipu akasamalila ku kwache, akamwivwa akubelenga mwa Yesaya umughonela, akati, ''ukwivwisya vyo uli pabelenga?'' ³¹ Po akati, ''ningivwisa bulibuli, penepapo yumo anthanjilila?'' Akamubuzya u Filipu ukuti akwele mu ngolo ikale nawe. ³² Po amazyu amiza gho umu Etiyopiya akabelenga ghakaba agha, ''Akaba ngati we nang'onzi yobaya pakukoma, sona ngati mwana wa nang'onzi yo atakupoma ichongo pobali pakudumula ameya ghache, po atakighulapo umulomo wache. ³³ Panongwa yache ubwanaloli butakabapo. Wewenu yo angalongosola abaluko lwache? Pakuti ubumi bwache bakasenda pachisu cha pansi. ³⁴ Po ikambala likamulalusya u Filipu, nukuti, ''mbuzya mughonela buli yo akuneniwa, umwene, pamo uyunji?'' ³⁵ U Filipu akanda pakunena amazyi nukulumbilila izya Yesu kukwache. ³⁶ Bobabuka munzila, bakafika pa malo po pakaba aminzi po ikambala likati, ''Linga pali aminzi pano. Chochoni cho chingankhanisya pakoziwa?'' ³⁷ U Filipu akati, ''Pala ukusubalila nu moyo wako ghonsi, ungoziwa.'' Umu Etiyopiya akamula, ''Nkhusubalila ukuti u Yesu kilisitu mwana wa chala.'' ³⁸ Po umu Etiyopia akimika ingolo. Bakaya mu minzi, bonsi u Filipu ni kambala, po u Filipu akamozya. ³⁹ Bo afuma muminzi, umuzimu wachala ghukamusenda u Filipu, po ikambala litakamulinga sona, loli likabuka nulusekelo. ⁴⁰ Loli u Filipu akabonekela pa Azotasi nukwenda mukaya kalanyene, akalumbililanga amazyu kutwaya tonsi utukulu mpaka po akiza ku Kayisala.