¹ Agrippa akanena akuti kwa Pauli, ''nena wemwenecho.'' Upauli akowolosya inyobe pakwipoka. ² ''Numughosyu hee, mwene Agrippa inongwa yane pakuba pamaso papako ilelo ili yonkhulongana naba Yuda. ³ Nkhaninkhani pachifukwa chakuti wemumanyi umenye indaghilo zyaba Yuda nukulalusya, ponakulenganga ukuti ube mya univwe vyonkhunena. ⁴ Naloli, Abayuda bonsi bamenye namonikalilanga ukufuma kubulumendo muchisu chitu namu Yerusalemu. ⁵ Bamenye une ukufuma kubwandilo, nanthi bakulonda ukwitikizya, ukuti kikala ngati nemufalisayi pamo nkhaba newa kukomania indaghilo zya chipanga. ⁶ Ilelo nkhulongiwa pano chifukwa chalusubilo londilinalo lufingo lwa Chala loakalekela abatata bitu. ⁷ Ulufingo lunonyene lolo induko zyitu zyosi twelovu bakasubalila nukupokela pala bakumwiputa Uchala mubwanaloli ubusiku numusanya, pololusubilo lunonyene, mwene, lolusubilo lunonyene lo abayuda bakumpha inongwa. ⁸ Choni chomutakwitikizya ukuti nukusita kusubalila ukuti Uchala akuzusya abafwe? ⁹ Poilelo naloli une nhkulonda mbombe ivinthu ivinji hee umwati umwakususania hee nizina ilya Yesu waku Nazaleti. ¹⁰ Nkhabomba zyosi izi mu Yerusalemu. Nkhabingizya abinji mujele ukubombela amaka aghabulaghili ukufuma ku baputi abasongo sona bakabakoma nkhabikanga amavoti aghinji hee. ¹¹ Nkhabalanganga hee muma sinagogi nkhabalamulilanga ukuti bamutuke Uchala. Nkhaba nemukali hee kukwabo nukubakoma nakuvisu ivyakunzi. ¹² Bonkhubomba ivi nkhabuka ku Damasikasi nubulamulilo namaka ukufuma kubaputi abasongo. ¹³ Boinkhwenda muzila pakasi pamusanya, mwene nkhalinga akamesya ukufuma kumwanya kakabala hee ukulusya idzuba kakabalila papane nabanthu bonkhendanga nabo. ¹⁴ Lyotwaba pansi, nkhivwa izyu likunena kukwane lyo likati muchinenelo cha chihebeli, '''Sauli,Sauli, choni cho ukuvwima une? techochiza ukuti uwe uvwimanenge nune inthi uvulale bwaka. ¹⁵ Poinkhati, ''wewenu, mwene?'' umwene akamula akati ne Yesu yomukumuvwima. ¹⁶ Nyamuka wimilile pachifukwa ichi nakubonekela uwe ukuti ukuba waba wewambombo wane sona waba wekamboni wane pavinthu vyowavilinga navyo inthiwize uvulinge munthazi. ¹⁷ Inthinize nkhupoke kubanthu nakubakunzi kointhi nkhutumenge. ¹⁸ Ukubighula amaso ukufumyako kuchisi ukuya kubuswepu ukufuma kuchinamwene chasatana ukuya kwa Chala, ukuti bapokele ukufuma kwa Chala, ukuhobokelighwa imbibi ukwingila pipyana yachinamwene chakumwanya bobakuya pakusubalila mwi zina lyane. ¹⁹ Polelo, umwene Agrippa, nthakakomania vyo ichisetuka chakumwanya chikambuzya; ²⁰ loli wandile abakudamasikasi, poubuke mu Yerusalemu ponabamukaya bonsi abamuyudeya nakubapanzi nukubapa amzyu aghakuti mupinduke muye kwachala mubombenge imbombo izyakuyana nulupinduko. ²¹ Pachifukwa ichi abayuda bakamphinya mu tempheli bakalondanga ukunkhoma. ²² Polelo nkhapokela ubutuli ukufuma kwa Chala mphaka nisiku ili, nkhwimilila pano nukusimikizya kuvinandi nakuvikulu ichinthu ichinji nachimo pakuchila apo pavyo abaghonela nu Mose bakanena pavyo vikuya pakuboneka. ²³ Ukuti ukilisitu abaghile ukuti atamiwe sona ukuti wakwanda ukuti azyuke kubafwe nukufumusya izyu ilyabuswepu kubanthu bithu nabakunzi. ²⁴ Bo Upolo amala pakwipoka, Ufesitasi akanena izyu ikulu, ''kawapena; ubumanyi bwako inthibukupenie.'' ²⁵ Loli u Pauli akati, ''nthavulunganite, ndichete hee Fesitasi, loli nkhunena amazyu aghabwanaloli ukuti inongwa yende ichete. ²⁶ Pakuti umwene avimenye vyonsi vyonkhunena sona nkhunena nubwanaloli bonsi kukwache sona nkhukulenga nukunena papo patalipo chochivwamite kukwache; papo ivi vitakabombiwa kubuvwame. ²⁷ Ukusubila abaghonela, mwene Aggripa? menye ukuti ukusubalila. ²⁸ ''Aggripa akamubuzya u Pauli akati, ''mukabalilo akanandi undenge sona pinduke imbe nemukilisitu? ²⁹ Upauli akti, ''kwiputa kwa Chala, akabalilo akafupi pamo akatali tekokukwako kwene loli kubonsi bobakunivwa ilelo lunonyene, inthibabe ngati nene loli tebabe bapinyiwa nubunyolo.'' ³⁰ Poumwene akimilila nabalongozi bache nu Benisi nabobakikala nabo. ³¹ Bobafumamo munyumba bakanenezyana bakati umunthu uyo ataninongwa nayimo ukuti bangamukoma pamo ukuti abe mujele. ³² Aggripa akamubuzya u Festus, umunthu uyu ngemukamufumya nanthi atakapanganga apilu ukuya kwa Ceasar.