2 ۔ زِ مے چُھ بوٚڑ غم تٕہ میون دِل چُھ برابر دُکھی روزان۔ 3 ۔ تکیازِ مے یوتام منظور زِ پننؠن بائین ہنٛدِ باپَتھ یِم جسمٕکِہ اعتِبار مے رشتٕہ چِھ گژھا بُو پانٕہ مسیحس محروم۔
4 ۔ تِم چِھ اسرائیلی تٕہ تِمن چُھ منگتٕہ آسنُک حق تٕہ جلال تٕہ عہد و شریعت تٕہ وعدٕہ چِھ تِہندِی۔
5 ۔ تٕہ قومٕکؠ بُزرگ چِھ تِہندِی تٕہ جسمٕکِہ اعتِبار سپُد مسیح تِہ تِموُی منزٕہ۔ یُوس سارنٔے تُھوٚد تٕہ ہمیشہ تام چُھ خداوندِ محمُود۔ آمین۔ 6 ۔ مگر یِہ کَتھ چھؠنٕہ زِ خدایہ سُند کلام سپُد باطِل۔ اوٕہ موکٕھہ زِ یِم اسرائیلکؠ اولاد چِھ تِم چھنٕہ سٲری اسرائیلؠ کینٛہہ۔
7 ۔ بؠیِہ آئؠنٕہ ابراہیمٕہ سٕنٛز نسل آسنکِہ وجہ سٲتؠ سٲری فرزند گٕنزرنٕہ، بلکِہ چُھ یِہ لؠکِتھ زِ چٲنؠ نسل یِیِہ اسحاق سٕنٛزٔی وننٕہ۔ 8 ۔ یعنی کِہ جِسمانی فرزند چِھنٕہ خدایہ سٕنٛدؠ فرزند کینٛہہ بلکِہ چِھ وعدٕکؠ فرزند گٕنٛزرنٕہ یِوان۔
9 ۔ تکیازِ وعدُک قول چُھ یِہ زِ بُو یِمٕہ تؠمِہ وقتہ مطٲبق تٕہ سارےس زؠیِہ نؠچُو۔ 10 ۔ صرف یوتُی یوٚت نٕہ کینٛہہ بلکِہ رِبقہ تِہ ٲس اکِس شخصہ یعنی سٲنِس بب اسحاق سٕنٛدِ سٲتؠ حٲملٕہ۔
11 ۔ تٕہ ونؠک تام نٕہ ٲسؠ لڑکٔے زامٕتؠ تٕہ نَہ ٲس تِمو نیکی یا بدی کٔرمژ، زِ تس اُوس وننٕہ آمُت زِ بُوڑ کرِ لوکٹِس خدمت۔
12 ۔ تاکِہ خدایہ سُند ارادٕہ یُوس برگُزیدگی پؠٹھ موقوف چُھ، سُہ آسنٕہ عملن پؠٹھ مبنی بلکہ ناد دِنٕہ وٲلِس پؠٹھ۔
13 ۔ چناچِہ لؠکِھتھ چُھ زِ مے کوٚر یعقوبس سٲتؠ محبت مگر عِیسوَس سٲتؠ نفرت۔ 14 ۔ ادٕہ اسٕؠ کیا ونو؟ کیا خدایس نِش چھا بے اِنصٲفی؟ ہرگِز نٕہ۔
15 ۔ تکیازِ سُہ چُھ موسیٰ ہس ونان، یَس پؠٹھ رحم کرُن منظور چُھ تٕہ یَس پؠٹھ ترس کھؠن منظور چُھ، تَس پؠٹھ کھؠمٕہ ترس۔
16 ۔ مگر یِہ چُھنہ ارادہ کرن وٲلِس پؠٹھ مُنحصِر کینٛہہ نَہ دُورن وٲلِس پؠٹھ بلکِہ رحم کرن وٲلِس خدایس پؠٹھ۔ 17 ۔ تکیازِ کتابِ مُقدّسس منز ووٚن خداین فرعونَس ز "مے کورُکھ توۓ کھڑا زِ چانِہ وجہ سٲتؠ کرٕہ بُو پننؠ قُدرت ظٲہر تٕہ میوٚن ناوٗ آسِہ تمام روئے زمینِہ پؠٹھ مشہُور۔
18 ۔ ادٕہ یَس پؠٹھ سُہ یژھان چُھ رحم کرُن تَس چُھ کران تٕہ یَس یژھان چُھ تَس چُھ سخت کران۔ 19 ۔ ادٕہ ونکھا ژٕہ مے زِ پتٕہ کیازِ چُھ سُہ شکایت کران؟۔ " کُس چُھ تؠمسٕندِس ارادس مقابلٕہ کران"۔
20 ۔ ہؠا انسانا خبر ژٕہ کُس چُکھ یُوٚس خدایس برونٛہہ کنِہ جواب چُھ دِوان؟ کیا بنؠومُت چیز ہؠکیا بناون وٲلِس ونِتھ زِ ژے کیازِ بنوتَھس بُو یُوٚتھ۔
21 ۔ کیا کرالےس چُحنا مؠژِ پؠٹھ اختیار کینٛہہ زِ اکے کُوٚندِ منزٕہ کڑِ سُہ اکھ بانٕہ عزّتٕہ خٲطرٕہ تٕہ بیاکھ بے عزّتی خٲطرٕہ۔ 22 ۔ ادٕہ کیا تعجُب چُھ اگر خدا پنُن غضب ظٲہر کرنٕکِہ تٕہ پننؠ قُدرت آشکار کرنٕکِہ ارادٕہ سٲتؠ غضبکؠن بانَن سٲتؠ یِم ہلاکتٕہ خٲطرٕہ یِم تیار ٲسؠ سپٕدمٕتؠ آوٗ سؠٹھا نرمی سٲتؠ پیش۔
23 ۔ تٕہ یِہ سپُد اوٕہ موکھٕہ زِ پننِہ جلالٕچ دولت کرِ رحمکؠو بانو ہنٛدِ ذریعہ آشکار یُوس تؠمؠ جلالٕہ خٲطرٕہ گوڈے اُوس تیار کوٚرمُت۔
24 ۔ یعنی سانِہ ذریعہ دیوٚتنٕہ تؠمؠ فقط یہودؠو منزٕہ ناد بلکہ غٲر قومو منزٕہ تِہ۔ 25 ۔ ییلِہ زن ہوسِیع سنزِ کتابِ منز تِہ چُھ خدا فرماوان زِ یُوٚسنٕہ میٲنؠ اُمّت ٲس، تَس ونٕہ بُوپننؠ اُمّت۔ تٕہ یُوٚسنٕہ ٹٲٹھ ٲس، تَس ونٕہ بُو ٹٲٹھ۔
26 ۔ تٕہ سپدِ یِتھ پٲٹھؠ زِ یَتھ جایِہ تِمن یِہ اُوس آمُت وننٕہ زِ توہؠ ٲسؠو میٲنؠ اُمّت، تَتھی جایِہ سُہ زندٕہ خدایہ سُند نؠچُو وننٕہ۔ 27 ۔ تٕہ یسعیاء چُھ اسرائیل سٕنٛدِ باپَتھ کرؠکھ دِتھ ونان زِ بنی اسرائیلن ہُند شُمار آسِہ سمندرچِہ سیکِہ برابر توتِہ بچن تِمو منزٕہ کم کینژھا۔
28 ۔ تکیازِ خداوند کرِ پنُن کلام مکمل تٕہ ختم کرِتھ تؠمِہ مطٲبق زمینہ پؠٹھ عمل۔
29 ۔ چناچہ یسعیاہن چُھ گوڈٕہ تِہ ونمُت زِ اگر نٕہ ربُ الافواج سٲنؠ کینٛہہ نسل باقی تھایِنٕہ تٕہ ٲسٕؠ گژھہو سدومٕکؠ پٲٹھؠ تٕہ عمورہس برابر۔ 30 ۔ ادٕہ اسٕؠ کیا ونَو؟ یِہ زِ غٲر قومو یِم راستبٲزی ٲسنٕہ تلاش کران تِمو کٔر راستبٲزی حٲصل یعنی سُوٚ راستبٲزی یُوٚسٕہ ایمان سٲتؠ چھے۔
31 ۔ مگر اسرائیل یُوس راستبٲزی اُوس تلاش کران سُہ وُۄتنٕہ تَتھ شریعتس تام۔ 32 ۔ کؠمِہ خٲطرٕہ؟۔ امِہ خٲطرٕہ زِ تِمو کوٚرنٕہ سُہ ایمانٕہ سٲتؠ تلاش۔ تِمو کھؠو تؠمِہ ٹھوکرٕہ کھؠنچِہ کنِہ سٲتؠ ٹھوکرٕہ۔
33 ۔ چناچِہ لؠکِھتھ چُھ زِ وُچھؠو بُو چُھس تھاوان صِیُّونس منز ٹھوکرٕہ لگنٕچ کٔنؠ تٕہ ٹھوکرٕہ کھؠنٕچ کٔنؠ تٕہ یُوس تَتھ پؠٹھ ایمان انِہ سُہ گژھنٕہ شرمندٕہ