¹ ۔ ہے بائیو مے چُھ دِلُک تمنّا بؠیِہ چُھس تِہنٛدِ خٲطرٕہ خدایس دعا منگان زِ تِمن میلن نجات۔

² ۔ تکیازِ بُو چُھس تہُند گواہ زِ تِم چِھ خدایہ سٕنٛدِس بارس منز غٲرت تھاوان مگر سمجٕھ سان نٕہ کینٛہہ۔

³ ۔ تکیازِ تِم سپٕدؠ نٕہ خدایہ سٕنٛزِ راست بٲزی تابع کینٛہہ بلکہ ٲسٕؠ تؠمسٕنٛزِہ راستبٲزی نِشٕہ ناوٲقف آسِتھ پننؠ راستبٲزی قٲئم کرنٕچ کُوشِش کران۔ ⁴ ۔ تکیازِ پرتھ اکِس ایمان انَن وٲلؠ سٕنٛزِ راستبٲزی باپَتھ چُھ مسیح شریعتُک انجام۔

⁵ ۔ چناچِہ موسیٰ ہن چُھ یِہ لؠکھمُت زِ یُوس شخص تَتھ راستبٲزی پؠٹھ چِھ عمل کران یوسٕہ شریعتٕہ سٲتؠ چھے سُہ روزِ تؠمے وجہ سٲتؠ زندٕہ۔ ⁶ ۔ مگر یوسٕہ راستبٲزی ایمان سٲتؠ چھے سُہ چھے یِہ ونان زِ، ژٕہ مٕہ وَن پننِس دِلس منٛز یِہ زِ آسمانَس پؠٹھ کُس کھسِہ تاکِہ مسیحس والِہ بُون۔

⁷ ۔ یان تل پاتال کُس وسِہ تاکِہ مسیحس کھالِہ موردو منزٕہ زندٕہ کرِتھ ہؠوٚر۔ ⁸ ۔ بلکہ کیا چھے ونان؟۔ یِہ زِ کلام چھی ژے نزدیک بلکہ چُھ چٲنِس ٲسس منز تٕہ چٲنِس دِلس منز۔ یِہ چُھ سوۓ ایمانُک کلام یمِچ مُنادی اسٕؠ کران چِھ۔

⁹ ۔ زِ اگر ژٕہ پننِہ زبٲنؠ سٲتؠ عیسیٰ سٕنٛدِس خداوند آسنَس اقرار کرکھ تٕہ پننِس دِلس منز ایمان انَکھ زِ خداین کوٚر سُہ موردو منزٕہ زندٕہ تٕہ نجات لبَکھ۔

¹⁰ ۔ تکیازِ راستبٲزی خٲطرٕہ چِھ آسان دِلٕہ سٲتؠ ایمان انُن تٕہ نجات خٲطرٕہ چُھ اقرار ٲسٕہ سٲتؠ یِوان کرنٕہ۔ ¹¹ ۔ چناچِہ کتابِ مُقدّس چھے ونان یِہ زِ یُوس اکھاہ تَس پؠٹھ ایمان انِہ سُہ گژِھنٕہ شرمِندٕہ کینٛہہ۔

¹² ۔ تکیازِ یہودؠن تٕہ یُونانؠن منز چھؠنٕہ کانٛہہ فرق۔ امِہ موجوب زِ سُوۓ چُھ سارنٔی ہُند خداوند تٕہ پننؠن سارنٔی دُعا کرن والؠن خٲطرٕہ چھُ فیاض۔

¹³ ۔ تکیازِ یُوس اکھاہ خداوند سُند ناوٗ ہؠیِہ سُہ لبِہ نجات۔ ¹⁴ ۔ مگر یس پؠٹھ نٕہ تِمو ایمان اُوٚن تَس کِتھٕہ کٔنؠ منگن دُعا تٕہ یمسٕنٛز ذکر نٕہ تِمو بُوز تَس پؠٹھ کِتٕھہ کٔنؠ انَن ایمان تٕہ منٲدی کرن وٲلِس ورٲۓ کِتٕھہ کٔنؠ بوزن؟۔

¹⁵ ۔ تٕہ یوتام نٕہ تِم یِن سوزنٕہ منٲدی کِتٕھہ کنؠ کرن۔ چناچِہ لؠکِھتھ چُھ زِ کٲتیاہ خوشنُما چِھ تِہنٛدؠ قدم یِم اصل چیزن ہنٛز خوشخبری چِھ دِوان۔ ¹⁶ ۔ مگر سٲلمو کٔرنٕہ یِہ خوشخّبری قبول کینٛہہ۔ چناچِہ یسعیاہ چُھ ونان "ہے خداوندا سٲنِس، پیغامس پؠٹھ اُوننٕہ کٲنسِہ ایمان"۔

¹⁷ ۔ ادٕہ ایمان چھ بوزنٕہ سٲتؠ پٲدٕہ سپدان تٕہ بوزُن مسیح سٕنٛدِ کلامٕہ سٲتؠ۔ ¹⁸ ۔ مگر بُو چُھس ونان۔ کیا تِمو بُوزنا؟ چناچِہ لؠکِتھ چُھ۔ تِہنٛز آواز وٲژ تمام رُوۓ زمینَس پؠٹھ تٕہ تِہنزٕہ کتھٕہ دنیاہکِس اندس تام ¹⁹ ۔ پتٕہ چُھس بُو ونان، کیا اسرائیل اوسنا وٲقف؟ موسیٰ ہن چُھ گوڈے وۄنمُت، تِمو سٲتؠ دِمو بُو توہِہ غٲرت یُوس قومی چُھنٕہ اکہ بیقٕل قومٕہ سٲتؠ کھالوۄ توہِہ بُو شرارت۔ ²⁰ ۔ پتٕہ ووٚن تؠمؠ یسعیاہن بڑٕہ دلیری سان یِہ " یِمو نٕہ بُو ژھونڑس تِمو لوبُس بُو۔ یِمو نٕہ مے پروژھ تِمن پؠٹھ سپدُن ظٲہر۔

²¹ ۔ مگر اسرائیلس مطلق چُھ یِتھ کنؠ ونان زِ بُو رودُس دہۓ دوہس اکِس نافرمان تٕہ سرکش قومس کُن پننؠ اتٕھہ دٲرِتھ۔