3 ۔ ادٕہ اگر شوہر سٕنزِ زندگی منز سُو بیکِس مردس سٲتؠ کرِ تٕہ سُوٚ یِیِہ زِنٲنؠ وننٕہ۔ مگر اگر شوہر مودُس تٕہ تیلِہ چھے سُہ تؠمِہ شریعتٕہ نِشٕہ آزاد۔ یوتانؠ زَن بؠکِس مردس سٲتؠ تِہ کرِ تٕہ زِنٲنؠ یِینٕہ گنزرنٕہ۔ 4 ۔ ادٕہ ہے میانؠو بائیو، توہؠ تِہ بنؠو مسیح سٕندِ بدنکِہ وسالتٕہ شریعتکِہ اعتبارٕہ سٲتؠ امِہ موجوب موردٕہ زِ تمِس دوؠمِس سٕنٛدؠ بنؠو یُوس موردو منزٕہ زندٕہ آوٗ کرنٕہ تاکِہ اسٕؠ سٲری کرو خدایہ سٕندِ باپَتھ پھل پٲدٕہ۔
5 ۔ تکیازِ ییلِہ اسٕؠ جسمٲنی آسؠ اتی یُوسٕہ گنہٕچ خوٲہش شریعتکِہ ذریعہ پٲدٕہ ٲس سپدان سُہ ٲس سانؠن اعضاہن منز موتُک پھل پٲدٕہ کرنٕہخٲطرٕہ اثر کران۔ 6 ۔ مگر یمِہ چیز کِس قٲدس منز ٲسؠ تؠمکِہ اعتِبارٕہ گے اسٕؠ مرِتھ ونؠ شریعتٕہ نِشٕہ تَتھ کنؠ آزاد زِ اسٕؠ چِھ روحکِہ نیِہ طورٕہ پٲٹھؠ خدمت کران۔ نَہ کہ لفظن ہنٛدِ پرانِہ طورٕہ پٲٹھؠ۔ 7 ۔ ادٕہ اسٕؠ کیا ونو؟ کیا شریعت چھا گناہ؟۔ ہرگِز نٕہ، بلکِہ بغیر شریعت ہیکنٕہ بُو گناہ پہچٲنِتھ۔ مثلاً اگر شریعت یِہ ونِہؠنٕہ زی ژٕہ مٔہ کر لالٕچ تٕہ بُو کتِہ زانٕہو لالٕچ۔
8 ۔ مگر گناہن کٔر مے منز موقع لبِتھ حکمکِہ ذریعہ لالٕچ پٲدٕہ تکیازِ شریعتٕہ ورٲۓ چُھ گناہ موردٕہ۔ 9 ۔ اکِس زمانَس منز اُوسُس بُو شریعتٕہ ورٲۓ زندٕہ۔ مگر ییلِہ حکم آوٗ تٕہ گناہ گو زندٕہ تٕہ بُو مۄدُس۔
10 ۔ تٕہ یمِہ حکمٕچ چاہت زندگی ٲس، سُویٔ بنؠو میٲنِس حقّس منز موتُک ذریعہ۔ 11 ۔ تکیازِ بُو ڈولنَس گُنہن موقع لبِتھ حُکمکِہ ذریعہ تٕہ تؠمکے ذریعہ ژُھننَس بُو مٲرِتھ تِہ۔
12 ۔ ادٕہ شریعت چُھ پاک تٕہ حکم تِہ چُھ پاک تٕہ وَتھ تِہ چھے اصل۔ 13 ۔ اتی یُوس چیز اصل چُھ کیا سُہ سپٕدیاہ میانِہ باپَتھ موت ثٲبِت؟۔ ہرگِز نٕہ، بلکہ گنٛہن کوٚر میانِہ باپَتھ اصل چیز کِہ ذریعہ موت پٲدٕہ کرِتھ مورنَس بُو۔ تاکِہ تؠمسُند گناہ سپدُن آسِہ ظٲہر تٕہ حکمکِہ ذریعہ سپدِ گناہ حدٕہ کھوٚتٕہ زیادٕہ مکرو معلوم۔
14 ۔ کیا اسٕؠ چھا زانان زِ شریعت چھے روحٲنی مگر بُو چُھس جسمٲنی تٕہ گنہکؠو اتھو کٔننٕہ آمُت۔ 15 ۔ تٕہ یِہ بُو کران چُھس تِہ چھؠنٕہ مے پے تکیازِ یمؠک بُو ارادٕہ چُھس کران تٕہ چُھسنٕہ کران۔ بلکہ یَتھ سٲتؠ مے نفرت چھے تی چُھس کران۔
16 ۔ تٕہ اگر بُو تَتھ پؠٹھ عمل چُھس کران یمؠک ارادٕہ بُو چُھسنٕہ کران تٕہ بُو چُھس مانان زِ شریعت چُھ اصل۔ 17 ۔ اتی اَتھ صورتَس منز چُھس نٕہ بُو امؠک کرن وۄل کینٛہہ بلکِہ چُھ گناہ یُوٚس مے منز بسِتھ چُھ۔
18 ۔ تکیازِ بُو چُھس زانان زِ میٲنِس جِسمس منز چھؠنٕہ کانٛہہ تِہ نیکی۔ البتہ ارادٕہ چُھ مے منز موجود مگر نیک کامِہ چھؠنٕہ میانِہ اتٕھہ یِوان۔ 19 ۔ چناچِہ یِمٕہ نیکی ہُند بُو ارادٕہ چُھس کران۔ تِہ چھسںٕہ کران۔ مگر یمٕہ بدی ہُند ارادٕہ چُھس کران۔ تِہ چُھس کران۔
20 ۔ اتی اگر بُو تِہ چُھس کران یمؠک ارادٕہ چُھسنٕہ کران تٕہ تؠمؠک کرن وۄل چُھسنٕہ بُو بلکِہ چُھ گناہ یُوٚس مے منز بسِتھ چُھ۔
21 ۔ غرض بُو چُھس تِس شریعت لبان زِ ییلِہ بُو نیکی ہُند ارادٕہ چُھس کران تٕہ بدی چھے مے نِش حٲضر آسان۔ 22 ۔ تکیازِ باطنی انسانیتکِہ اعتِبار چُھس بُو خرایہ سٕنز شریعت زیادٕہ پسند کران۔
23 ۔ مگر مے چھے پننؠن اعضاہن منز بیکِہ قٕسمٕچ شریعت اتِھ یِوان۔ یُوسٕہ مکیانِہ عقلِہ ہٕنٛزِ شریعتٕہ سٲتؠ لڑِتھ مے تَتھ گنٛہچِہ شریعتِہ ہٕنٛدِس قٲدَس منز چھے انان یُوٚسٕہ میانؠن اعضاہن منز موجود چھے۔ 24 ۔ واۓ کوتاہ کم بخت انسان چُھس یمِہ موتکِہ بدنٕہ تَلٕہ کُس موکلایِہ مے؟۔
25 ۔ بُو چُھس پننِس خداوندِ عیسیٰ مسیح سٕندِ وسالٕہ سٲتؠ خدایہ سُند شُکر کران۔ غرض چُھس پانٕہ پننِہ عقلِہ سٲتؠ خدایہ سٕنٛزِ شریعتُک تابع۔ مگر جسمٕہ سٲتؠ چُھس گنہکِہ شریعتُک تابع۔