¹ ۔ ادٕہ اسؠ کیا ونَو؟۔ کیا گُناہ روزوا کران یوٚتھ زن فضل زیادٕہ سپدِ؟۔

² ۔ ہرگِز نہ اسٕؠ یِم گُناہکِہ اعتبارٕہ مومٕتؠ چِھ، پتٕہ کتھہ پٲٹھؠ گنزرو اسٕؠ تَتھ منز بؠیِہ زندگی؟۔

³ ۔ کیا توہؠ چُھو نا زانان زِ اسِہ یِیتِہو عیسیٰ مسیحَس منز شٲمل گژھنُک بپتسمٕہ نیُو تٕہ سُہ نیُو اسِہ تؠمسٕندِس موتَس منز شٲمل گژھنُک بپتِسمٕہ؟۔ ⁴ ۔ اتی سپٕدؠ اسٕؠ موتَس منز شٲمل گژھنکہ بپتسمٕہکِہ وسالتٕہ تَس سٲتؠ دفن۔ تاکِہ یِتھ پٲٹھؠ مسیح ببٕہ سٕندِ جلالکِہ وسالتٕہ تَس سٲتؠ دفن، تاکِہ وسالتٕہ موردو منزٕہ زندٕہ کرنٕہ آوٗ۔ تِتَھے کنؠ پکَو اسٕؠ تِہ نَیِہم زندگی منز۔

⁵ ۔ تکیازِ ییلِہ اسٕؠ تؠمسٕنزِہ موتچِہ شکلِہ منز تَس سٲتؠ رلَے، تٕہ بیشک روزہ اسٕؠ تؠمسٕنزِ زندٕہ وتھنٕچِہ شکلِہ منز تِہ تَس سٲتؠ رلِتھ۔ ⁶ ۔ حالانکِہ اسٕؠ چِھ زانان زِ سٲنؠ پرٲنؠ انسٲنیت آیِہ تَس سٲتؠ مصلُوب کرنٕہ زی گنہُک بدن گژِھ بیکار تاکِہ اسٕؠ روزو نٕہ برونٛہہ کُن گُنہٕچِہ غلامی منز۔

⁷ ۔ تکیازِ یُوس مُود سُہ گوٚ گُنہو نِشٕہ بھری۔ ⁸ ۔ ادٕہ ییلِہ اسٕؠ مسیحَس سٲتؠ مُودؠ تٕہ اسِہ چُھ یقین زِ تَس سٲتؠ زندٕہ تِہ۔

⁹ ۔ تکیازِ یِہ چِھ زانان زِ مسیح ییلِہ موردو منزٕہ زندٕہ وتھمُت چُھ سُہ صرنِہ بؠیِہ دوبارٕہ کینٛہہ۔ یعنی تَس چُھنٕہ دوبارٕہ موتُک اختیار کینٛہہ۔ ¹⁰ ۔ تکیازِ مسیح یُوس اکِہ لٹِہ مُود گنہٕکِہ اعتِبار سٲتؠ، مگر ونؠ ییلِہ زندٕہ سپُد تٕہ خدایہ سٕندِ اعتِبار سپُد زندٕہ۔

¹¹ ۔ یِتَھے کنؠ زٲنؠو توہؠ تِہ پنُن پان گنہکِہ اعتِبار سٲتؠ موردٕہ، مگر خدایہ سٕندِ اعتِبار سٲتؠ زانؠو مسیح عیسیٰ ہس منز زندٕہ۔ ¹² ۔ اتی کرِنٕہ گناہ تُہندِس فٲنی بدنس منز کینٛہہ زِ توہؠ رُوزؠو تؠمسٕنزن خواہشاتن تابِع۔

¹³ ۔ تٕہ پننٕؠ وُستخان مَہ کرؠو اپزؠک ہتھیار بننٕہ خطرٕہ گُنہن حوالٕہ، بلکِہ کرؠو پنُن پان موردو منزٕہ زندٕہ سمجِھتھ خدایس حوالٕہ تٕہ پننٕؠ وُستخان کرؠو پزرُک ہتھیار بننٕہ باپَتھ خدایَس حوالٕہ۔

¹⁴ ۔ امِہ موکٕھہ زِ توہِہ پؠٹھ آسنٕہ گنہُک اختیار کینٛہہ تکیازِ توہؠ ٲسیونٕہ شریعتٕکؠ ماتحت کینٛہہ بلکِہ آسؠو فضلٕکؠ ماتحت۔ ¹⁵ ۔ ادٕہ کیا سپُد؟۔ کیا اسٕؠ کرواہ امِہ موکٕھہ گناہ زِ شریعتَس چھنٕہ ماتحت کینٛہہ بلکہ چِھ فضلس ماتحت؟۔ ہرگِز نٕہ۔

¹⁶ ۔ کیا توہؠ چُھونا زانان زِ یمسٕنزِ فرمانبردٲری خٲطرٕہ توہؠ پنُن پان غلٲمی ہنٛدؠ پٲٹھؠ حوالہ چُھوٗ کران۔ توہؠ چُھو تؠمسٕدؠ غلام یمسٕندؠ فرمانبردار چُھوٗ چاہے گنہس یمؠک انجام موت چُھ، چاہے فرمانبردٲری یمؠک انجام راستبٲزی چھے۔ ¹⁷ ۔ مگر خدایہ سُند شُکر اگر زن توہؠ گنہٕکؠ غلام ٲسؠو توتِہ سپدیو دِلٕہ سٲتؠ تؠمِہ تعلیم ہنٛدؠ فرمانبردار یمکِس سانچس منز توہؠ تھاونٕہ ٲسؠو آمتؠ۔

¹⁸ ۔ تٕہ گنہو نِشٕہ آزاد سپدِتھ اُو راستبٲزی ہنٛدٕؠ غلام گنزرنٕہ۔ ¹⁹ ۔ بُو چُھسو تُہنزِ انسٲنی کمزری سببٕہانسٲنی طوٚر ونان یِتھٕہ پٲٹھؠ توہِہ پننٕؠ اعضاء بدکٲری کرنٕہ باپَتھ ناپاکی تٕہ بدکٲری ہٕنٛزِ غلٲمی حوالٕہ کرِ مٕتؠ ٲسؠو، تِتَھے پٲٹھؠ کرؠو ونؠ پننٕؠ اعضاء پاک گژھنٕہ خٲطرٕہ راستبٲزی ہٕنٛز غلٲمی حوالٕہ۔

²⁰ ۔ تکیازِ توہؠ آسِؠو گنہٕکؠ غلام تٕہ راستبٲزی ہٕندِ اعتبارٕہ ٲسؠو آزاد۔

²¹ ۔ ادٕہ یِمو کتھو سٲتؠ توہؠ ونؠ شرمندٕہ چُھوٗ تِمو سٲتؠ کیا پھل ٲسؠو توہؠ تؠمِہ وقتٕہ لبان؟۔ تکیازِ تِمن ہُند انجام اُوس موت۔ ²² ۔ مگر ونؠ میُولو توہِہ پنُن پھل گنہو نِشٕہ آزاد گژِھتھ تٕۃ خدایہ سٕنٛدؠ غلام ٲسِتھ۔ یمِہ سٲتؠ پاکیزگی حٲصل چھے سپدان تٕہ امؠک انجام چھے اندی زندگی۔

²³ ۔ تکیازِ گنہٕچ مزُورؠ چُھ موت، مگر خدایہ سٕنٛز بخشِش چھے سٲنِس خداوندِ عیسیٰ مسیحس منز ہمیشٕہ ہٕنٛز زندگی۔